ވެނެޒުއެލާގެ ނައިބު ރައީސް ހުންނެވީ ރަޝިޔާގައި ކަމަށް ބުނާ ވާހަކަ ދޮގު ކޮށްފި

ވެނެޒުއެލާގެ ނައިބު ރައީސް ޑެލްސީ ރޮޑްރިގޭޒް ހުންނެވީ ރަޝިޔާގައި ކަމަށް ބުނާ ވާހަކަ، ރަޝިޔާ އިން ދޮގު ކޮށްފި އެވެ.

އެމެރިކާގެ ރައީސް ޑޮނަލްޑް ޓްރަމްޕްގެ އަމުރުފުޅަށް، ހޮނިހިރު ދުވަހު އެމެރިކާގެ އަސްކަރިއްޔާ އިން ވަނީ ވެނެޒުއެލާގެ ރައީސް ނިކޮލަސް މަދޫރޯ ހައްޔަރު ކޮށްފަ އެވެ. މަަދޫރޯ އާއި އޭނާގެ އަނބިކަނބަލުން އެމެރިކާ އިން ހައްޔަރު ކޮށްގެން ގެންދިޔައިރު، ވެނެޒުއެލާގެ އެންމެ އިސް ފަރާތަކަށް މިހާރު ހުންނެވީ ނައިބު ރައީސް ޑެލްސީ ރޮޑްރިގޭޒް އެވެ. 

ރޮޑްރިގޭޒްގެ މައުލޫމާތު އިނގޭ ހަތަރު މަސްދަރަކުން މީޑިއާ ތަކަށް ބުނެފައިވާ ގޮތުގައި، އެކަަމަނާ ހުންނެވީ ރަޝިޔާގަ އެވެ. ނަމަވެސް، ރަޝިޔާގެ ފޮރިން މިނިސްޓްރީ އިން ނެރެފައިވާ ބަޔާނުގައި ވަނީ އެކަން ދޮގު ކޮށްފަ އެވެ. ރޮޑްރިގޭޒް ހުންނެވީ ރަޝިޔާގައި ނޫން ކަމަަށް އެ ޤައުމުން ބުނެފައިވާއިރު، އިތުރު ސުވާލު ތަކެއް މިހާރު ވަނީ އުފެދިފަ އެވެ. 

ރޮޑްރިގޭޒްގެ ބޭބެ، އަދި ވެނެޒުއެލާގެ ޤައުމީ މަޖިލީގުގެ ރައީސް ޖޯޖް ރޮޑްރިގޭޒް ހުންނެވީ ވެނެޒުއެލާގެ ވެރި ރަށް ކަރަކަސްގައި ކަމަށް ބައެއް މަސްދަރު ތަކުން ވަނީ ބުނެފަ އެވެ. 

ވެނެޒުއެލާގެ ނައިބު ރައީސް ރޮޑްރިގޭޒް ހުންނެވި ސީދާ ތަނެއް އިނގެން ނެތް ނަމަވެސް، ހޮނިހިރު ދުވަހު އޭނާ ވަނީ ސަރުކާރުގެ ޓީވީ މެދުވެރިކޮށް އޯޑިއޯ ބަޔާނެއް އާންމު ކުރައްވައިފަ އެވެ. އެ ބަޔާނުގައި އޭނާ ވަނީ ވެނެޒުއެލާގެ ރައީސް މަދޫރޯ އާއި، އޭނާގެ އަނބިކަނބަލުން ސަލާމަތު ތިބި ކަމުގެ ހެކި ދެއްކުމަށް ގޮވާލައްވައިފަ އެވެ. 

މީގެ އިތުރުން އޭނާ ގޮވާލައްވާފައި ވަނީ މަދޫރޯ އާއި އޭނާގެ އަނބިކަނބަލުން ވަގުތުން މިނިވަން ކުރުމަށެވެ. އަދި ވެނެޒުއެލާގެ ރައީސް އަކީ މަދޫރޯ ކަމަށާއި، ވެނެޒުއެލާގެ ދިފާއުގައި ކުރަން ޖެހޭ ކޮންމެ މަސައްކަތެއް ކުރައްވާނެ ކަމަށް، ނައިބު ރައީސް ރޮޑްރިގޭޒް ވަނީ ވިދާޅުވެފަ އެވެ. 

ހޮނިހިރު ދުވަހު އެމެރިކާ އިން ވެނެޒުއެލާ އަށް އަމާޒުކޮށް ހަމަލާ ދީފައިވާއިރު، މިއީ ދެ ޤައުމުގެ ދެ މެދުގައި ގިނަ ދުވަސް ތަކެއް ވަންދެން އޮތް ނުތަނަވަސް ކަމުގެ ތެރޭގައި ހިނގި ކަންތައްތަކެވެ. އެމެރިކާގެ ހަމަލާއާ ގުޅިގެން ބައިނަލްއަޤުވާމީ މުޖުތަމައުން ވެސް އަންނަނީ ކަންބޮޑުވުން ފާޅު ކުރަމުންނެވެ. 

މި ހާދިސާއާ ގުޅިގެން ބައިނަލްއަޤުވާމީ މީޑިއާ ތަކުގައި އަންނަނީ ގިނަ ސުވާލު ތަކެއް އުފައްދަމުންނެވެ. އެގޮތުން ވެނެޒުއެލާގެ ސަރުކާރުގެ އިސް ވެރިން ތިބީ ހެޔޮ ޙާލުގައިތޯ، އަދި އެ ބޭފުޅުން ކޮބައިތޯ ވަނީ ސުވާލު އުފައްދައިފަ އެވެ.