ހުޅަނގު އައްސޭރި ގައި އިޒްރޭލުގެ ސިފައިން ބަޑިޖަހައި ފަލަސްތީނުގެ ޒުވާނަކު ޝަހީދުކޮށްލައިފި

ހިސޯރުކޮށްފައިވާ ފަލަސްތީނުގެ ވެސްޓް ބޭންކް (ހުޅަނގު އައްސޭރި) ގައި، ބުރާސްފަތި ދުވަހުގެ ފަތިހުގެ ވަގުތެއްގައި، އިޒްރޭލުގެ ސިފައިން ބަޑިޖަހައި ފަލަސްތީނުގެ ޒުވާނަކު ޝަހީދުކޮށްލައިފި އެވެ.

އިޒްރޭލު ސިފައިން މި ހަމަލާ ދިނީ އެމީހުންނާ ދިމާލަށް އޮއްގައު އުކި ބަޔަކަށް އަމާޒުކޮށް ކަމަށް އެ ގައުމުގެ އަސްކަރިއްޔާ އިން ބުނެފައިވެއެވެ.

ނާބުލުސްގެ ލުބާން އަލް-ޝަރުގިއްޔާ އަވަށާ ކައިރި މައި މަގަކުން އިތުރު ދެ މީހަކަށް ވެސް ހަމަލާދީފައިވާ ކަމަށް އިޒްރޭލުގެ އަސްކަރިއްޔާގެ ބަޔާނުގައިވެ އެވެ. އިޒްރޭލުން އެ މީހުންނަކީ ހަނގުރާމަވެރިންގެ ގޮތުގައި ސިފަކޮށްފައިވާއިރު، އޮއްގައު އުކުމަކީ ދިން  ހަމަލާ އެއް ކަމަށް ވަނީ ދައުވާކޮށްފައެވެ.

ހުޅަނގު އައްސޭރީގެ ފަލަސްތީނު އޮތޯރިޓީން ހާމަކުރި ގޮތުގައި، މި ހަމަލާގައި ޝަހީދުވެފައިވަނީ އުމުރުން 26 އަހަރުގެ ޚައްޠާބް އަލް-ސަރުހާން އެވެ. އަދި މި ހާދިސާގައި އިތުރު މީހަކު ޒަޚަމްވެފައިވާ ކަމަށް ވެސް އެ ފަރާތުން ބުނެ އެވެ.

ފަލަސްތީނުގެ ރަސްމީ ނިއުސް އެޖެންސީ "ވަފާ" އިން ރިޕޯޓްކޮށްފައިވާ ގޮތުގައި، އިޒްރޭލު ސިފައިން ވަނީ ބުދަ ދުވަހު ލުބާން އަލް-ޝަރުގިއްޔާ އަވަށަށް ވަންނަ މައި ދޮރާށި ބަންދުކޮށް، އެ އަވަށަށް ވަދެ ނިކުމެ އުޅޭ އިތުރު ކުދި މަގުތައް ވެސް ބަންދުކޮށްފައެވެ.

އދ. އިން ހާމަކޮށްފައިވާ ތަފާސްހިސާބުތަކަށް ބަލާއިރު، 2023 ވަނަ އަހަރުގެ އޮކްޓޯބަރު މަހުން ފެށިގެން 2025 ވަނަ އަހަރުގެ އޮކްޓޯބަރު މަހާ ހަމައަށް ހުޅަނގު އައްސޭރީގައި އެކަނިވެސް ފަލަސްތީނުގެ 1000ށް ވުރެ ގިނަ ފަލަސްތީނު މީހުން ވަނީ ޝަހީދުކޮށްލާފަ އެވެ. މީގެ ތެރެއިން ގިނަ މީހުން ޝަހީދުވެފައި ވަނީ އިޒްރޭލު ސިފައިން ހިންގާ އަސްކަރީ ހަރަކާތްތަކުގަ އާއި، ގަވައިދާ ޚިލާފަށް ވަޒަންވެރިވެގެން އުޅޭ ހަރުކަށި ޔަހޫދީން ދޭ އަނިޔާވެރި ހަމަލާތަކުގަ އެވެ. ހަމަ އެ މުއްދަތުގެ ތެރޭގައި ފަލަސްތީނު މީހުން ދިން ހަމަލާތަކުގައި އިޒްރޭލުގެ 57 މީހަކު ވަނީ މަރުވެފައެވެ.