ހަނގުރާމަ ހުއްޓާލުމަށް އެއްބަސްވީ ފަހުން ވެސް ކޮންމެ ދުވަހަކު އިޒްރޭލު ސިފައިން ގެންދަނީ ފަލަސްތީނު ގެ ކުޑަކުދިން މަރަމުން: ޔުނިސެފް

ހަނގުރާމަ ހުއްޓާލުމަށް އެއްބަސްވީ ފަހުން ވެސް ކޮންމެ ދުވަހަކު، އިޒްރޭލު ސިފައިން ފަލަސްތީނު ގެ ކުޑަކުދިން މަރަމުން ގެންދާ ކަމަށް ޔުނިސެފް އިން ބުނެފި އެވެ.

އޮކްޓޯބަރު 11 ވަނަ ދުވަހުން ފެށިގެން، ހަނގުރާމަ ހުއްޓުވުމުގެ އެއްބަސްވުން ހިނގަމުން އަންނައިރު، ޣައްޒާ ސްޓްރިޕް ގައި ހަނގުރާމަ އާ ގުޅުން ހުރި ހާދިސާތަކު ގައި މަދުވެގެން 67 ކުއްޖަކު މަރުވެފައިވެއެވެ. އިތުރު އެތައް ބަޔަކު ޒަހަމްވެފައިވެއެވެ. މިއީ ހަނގުރާމަ ހުއްޓުވުމުގެ އެއްބަސްވުމަށް އަމަލު ކުރަން ފެށިފަހުން ކޮންމެ ދުވަހަކު ދެކުއްޖަކާ ގާތްކުރާ އަދަދަކަށް ކުދިން މަރުވަމުންދާ ކަމަށް ޖެނީވާގައި ހުންނަވާ ޔުނިސެފްގެ ތަރުޖަމާނު ރިކާޑޯ ޕައިރޭސް ވިދާޅުވެފައި ވެއެވެ.

އޮކްޓޯބަރު 10 ވަނަ ދުވަހު އެމެރިކާގެ މެދުވެރިވެގެން އެކުލަވާލި ހަނގުރާމަ ހުއްޓުވުމުގެ އެއްބަސްވުމަށް އަމަލު ކުރަން ފެށި ފަހުން، ފަލަސްތީނުގެ ފެކްޝަންތަކާއި، އިންސާނީ ހައްގުތަކުގެ ޖަމާއަތްތަކާއި، ސަރުކާރު އިދާރާތަކުން ރެކޯޑްކޮށްފައިވާ ޑޭޓާތަކުން ދައްކާގޮތުގައި، އިޒްރޭލުގެ ސިފައިން އެތައް ހަމަލާތަކެއް ދީފައިވާއިރު، އެއިން ކޮންމެ ހަމަލާއަކީ ވެސް ހަނގުރާމަ ހުއްޓުވުމުގެ އެއްބަސްވުމާ ޚިލާފު ވުމެއްގެ ގޮތުގައި ފާހަގަ ކުރެވެ އެވެ.

ޔުނިސެފްގެ ޓީމުތަކުން ބުނާގޮތުގައި، ޣައްޒާ ގެ ކުޑަކުދިން އަދި ވެސް އުޅެމުން ދަނީ ވަރަށް ހިތާމަ ވެރި ނިކަމެތި ހާލަތުގަ އެވެ. އެތަނުން ފެންނަމުންދަނީ، ހަނގުރާމައިގެ ހަމަލާތަކުގައި އަތްފައި ނެތިފައިވާ ކުޑަކުދިން އެއްވެސް ހިޔާވަހި ކަމެއް ނެތި ބޭރުގައި ނިދަން ތިބޭ ހިތާމަވެރި މަންޒަރުތަކެވެ. އަނެއްބައި ކުދިން ދިރިއުޅެނީ ފެންބޮޑުވެފައިވާ، ވަގުތީ ހިޔާތަކުގެ ތެރޭގަ އެވެ.

އިޒްރޭލުގެ ސަރުކާރުން 2023 ވަނަ އަހަރުގެ އޮކްޓޯބަރު މަހު ޣައްޒާ ގައި ފަލަސްތީނުގެ ޣައްޒާ ގައި ހިންގި ނަސްލު ނައްތާލުމުގެ ހަނގުރާމައިގައި، ގާތްގަނޑަކަށް 70،000 މީހުން މަރުވެފައިވާއިރު، އޭގެ ތެރޭގައި އެންމެ ގިނައިން ހިމެނެނީ އަންހެނުންނާއި ކުދިންނެވެ. އަދި 170،000 އަށްވުރެ ގިނަ މީހުން ޒަހަމްވެފައިވާއިރު، އެ ސަރަހައްދުގެ ގިނަ އިމާރާތްތައް ވަނީ ބިމާ ހަމަކޮށްލާފަ އެވެ.