އިޒްރޭލު ސިފައިން ޣައްޒާ އިން މުޅިން ނުފައިބާނެ ކަމަށް އިޒްރޭލުގެ ދިފާއީ ވަޒީރު ހާމަ ކޮށްފި

އިޒްރޭލު ސިފައިން ޣައްޒާ އިން މުޅިން ދުވަހަކު ވެސް ނުފައިބާނެ ކަމަށް ޑިފެންސް މިނިސްޓަރ އިޒްރޭލް ކަޓްޒް ހާމަ ކޮށްފި އެވެ.

އޭގެ އިތުރުން އުތުރު ޣައްޒާ ގައި އިޒްރޭލުން އަސްކަރީ ދަނޑުވެރިކަމުގެ މަރުކަަޒެއް ގާއިމު ކުރާނެ ކަން ވެސް އޭނާ ހާމަ ކުރިއެވެ. 

ކަޓްޒް މި މޭރުމުން ވާހަކަ ދެއްކީ، އިޒްރޭލުގެ ދިފާޢީ ބާރުގެ ބިންޔާމިން ބްރިގޭޑްގެ މައި މަރުކަޒު ބަދަލު ކުރުމަށާއި، ފަލަސްތީނުގެ ހުޅަނގު އައްސޭރީގައި އިޒްރޭލުން ޤަވާއިދާ ޚިލާފަށް ތަރައްގީ ކޮށްފައިވާ ބައިތު އީލް ކިޔާ ސަރަޙައްދުގައި އިތުރު 1,200  މީހުން ވަޒަންވެރިކުރުމަށްޓަކައި ގެދޮރު އެޅުމަށް ހަދާފައިވާ އެއްބަސްވުމެއް ފާހަގަކުރުމަށް ބޭއްވި ރަސްމިއްޔާތެއްގައެވެ.

ހުޅަނގު އައްސޭރީގައި އިޒްރޭލުން ކުރިއަށް ގެންދާ މިފަދަ ވަޒަންވެރި ކުރުވުމުގެ ޕްރޮގްރާމް ތަކަކީ ބައިނަލް އަގްވާމީ ގާނޫނުތަކާއި އދ. ގެ ނިންމުންތަކާ މުޅިން ޚިލާފު ކަމެއް ކަމަށް އދ. އާއި ބައިނަލްއަޤްވާމީ މުޖުތަމަޢުގެ ބޮޑުބައެއް ދެކެއެވެ.

ކަޓްޒް ގެ ވާހަކައިގައި މިކަން ކުރާނީ ރަނގަޅު ވަގުތު ރަނގަޅު ގޮތަށް ކަމަށާއި، ބަޔަކު މީހުން ނުރުހުނަސް ގޮތް ނިންމުމުގެ ބާރު އޮތީ އިޒްރޭލަށް ލިބިފައިކަން ފާހަގަ ކުރިއެވެ.

އިޒްރޭލާއި ޣައްޒާގައި ހަރަކާތްތެރިވާ ޙަމާސް އާ ދެމެދުގައި އޮކްޓޯބަރު 10 އިން ފެށިގެން ހަނގުރާމަ ހުއްޓާލުމަށް ވެފައިވާ އެއްބަސްވުމަށް އިޒްރޭލުން ދަނީ ތަކުރާރުކޮށް ޚިލާފުވަމުން ކަމަށް ހަމާސް އިން ދަނީ ބުނަމުންނެވެ.

2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހު ޣައްޒާ ގައި އިޒްރޭލުން ހަނގުރާމަ ފެށި ފަހުން، ޣައްޒާގެ ޞިއްޙަތާ ބެހޭ ވުޒާރާއިން ހާމަކޮށްފައިވާ ގޮތުގައި، އިޒްރޭލުގެ އަސްކަރިއްޔާ އިން ޣައްޒާ ގައި 70,000 އަށް ވުރެ ގިނަ މީހުން ވަނީ މަރާލާފައެވެ.

އެ ސަރަޙައްދުގައި ދިރިއުޅޭ ދެ މިލިއަނަށް ވުރެ ގިނަ ރައްޔިތުންގެ ތެރެއިން ގިނަ ބަޔަކު ވަނީ އެމީހުންގެ ގެދޮރު ދޫކޮށް އެހެން ތަންތަނަށް ބަދަލުވެފައެވެ. އޭގެ ތެރެއިން ގިނަ ބަޔަކަށް އެއްފަހަރަށް ވުރެ ގިނަ ފަހަރު ވަނީ ގެދޮރު ދޫކޮށް ދާން ޖެހިފައެވެ.