ވެސްޓް ބޭންކު (ހުޅަނގު އައްސޭރި) ގައި އިޒްރޭލުގެ އަނިޔާވެރިކަން އިތުރުވުމުން ދާތީ ތިންވަނަ އިންތިފާޟާ އެއް ގެ އިންޒާރު ޕޮޕިއުލާ ފްރަންޓް ފޯ ދަ ލިބަރޭޝަން އޮފް ޕަލަސްޓައިން (ޕީއެފްއެލްޕީ) އިން ދީފި އެވެ.

ޕީއެފްއެލްޕީ އިން އިންޒާރު ދީފައިވާ ގޮތުގައި، އިޒްރޭލުގެ އަނިޔާވެރިކަން އިތުރުވަމުން ދިއުމުގެ ސަބަބުން ފަލަސްތީނު ރައްޔިތުންގެ ރުޅިވެރިކަން އުތުރިއަރައި، ހިފާފައިވާ ވެސްޓް ބޭންކު އޮތީ ތިންވަނަ އިންތިފާޟާއެއް (އިންޤިލާބެއް) ފެށުމާ ވަރަށް ގާތުގި ކަމަށެވެ.

ޕީއެފްއެލްޕީން މި އިންޒާރު ދިނީ ހުކުރު ދުވަހު ނެރުނު ބަޔާނެއްގަ އެވެ.

ހުކުރު ދުވަހުގެ ފަތިހުގެ ވަގުތެއްގައި، ހިފާފައިވާ އަލް-ޤުދުސް ގެ އުތުރުގައި އޮންނަ ކަފްރު އަޤަބް އަވަށަށް އިސްރާއީލުން އަރައި، ޢުމުރުން 18 އަހަރުގެ ޢަމްރު އަލް-މަރްބޫ އާއި 16 އަހަރުގެ ސާމީ މަޝާއިޚް ޝަހީދުކޮށްލި ހާދިސާ އަށް އިޝާރާތްކޮށް އެ ބަޔާނުގައި ބުނެފައި ވަނީ، މިފަދައިން ތަކުރާރުކޮށް ދެމުން އަންނަ ހަމަލާތަކުގެ ސަބަބުން އުފެދޭ ހުޅުގަނޑު ހަމަ ހިމޭންކަން އަންދާލާނެ ކަމަށެވެ. އަދި ފަލަސްޠީނު ރައްޔިތުންގެ ހިތްތަކުގައި އުތުރި އަރާ ރުޅިވެރިކަން، އިޒްރޭލުގެ އިސްތިޢުމާރީ ބާރާ ދެކޮޅަށް އަލިފާން ފަރުބަދަ އެއް ފަދައިން ގޮވާނެ ކަމަށެވެ.

އެ ޖަމާޢަތުން ބުނީ، ހިފާފައިވާ ހުޅަނގު އައްސޭރީގެ އެކި ހިސާބުތަކުގައި ޔަހޫދީ އާބާާދީތަކުގެ އަނިޔާވެރިކަން އިތުރުވެ، މުދަލަށް ގެއްލުންދީ، އާންމު ފަލަސްޠީނު ރައްޔިތުންނަށް ހަމަލާ ދިނުން އިތުރުވުމުން ހާމަވަނީ، އެމީހުން ގެ ކަށީގައި ހިފާފައިވާ ނަސްލީ ތަފާތު ކުރުމުގެ އާދަ ކަމުގަ އެވެ.

ބަޔާނު ގައި އިޒްރޭލު ބޮއިކޮޓްކޮށް އެ ޤައުމުގެ ވެރިން އެކަހެރިކުރުމަށް ބައިނަލްއަޤްވާމީ މުޖުތަމަޢަށް ގޮވާލާފައި ވެއެވެ. އެ ޖަމާޢަތުން ބުނީ "މި ސަރަޙައްދުގެ ސުލްހަ ހާސިލު ކުރެވޭނީ ހަމައެކަނި [އިޒްރޭލުގެ] އިސްތިޢުމާރުގެ މޫތައް ލުހެލައިގެން،" ކަމަށެވެ.

އިޒްރޭލުން ޣައްޒާ އަށް އަރާ ހިންގި ނަސްލު ނައްތާލުމުގެ ހަނގުރާމަ، 2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހު ފެށުމާ ހަމައިން، ހުޅަނގު އައްސޭރީ ގައި ހިންގާ އަނިޔާވެރި އަމަލުތައް ވަނީ އިތުރުކޮށްފައެވެ. އެ ތާރީޚުން ފެށިގެން މިހާތަނަށް، އިސްރާއީލު ސިފައިންނާއި ޔަހޫދީ ވަޒަންވެރިން ވަނީ ހިފާފައިވާ ސަރަޙައްދުތަކުގައި އެތައް ސަތޭކަ ފަލަސްތީނު ރައްޔިތުން ޝަހީދުކޮށްލާފައެވެ.

1967 ވަނަ އަހަރު އިޒްރޭލުން ހުޅަނގު އައްސޭރި އާއި އިރުމަތީ އަލް-ޤުދުސް ހިފުމަށްފަހު ޤާއިމުކޮށްފައިވާ 230 އަށް ވުރެ ގިނަ ޔަހޫދީ އާބާާދީތަކުގައި 700،000 އަށް ވުރެ ގިނަ ޔަހޫދީން ދިރިއުޅެމުން ދެއެވެ.