ވެސްޓް ބޭންކްގެ ޖެނިން ސިޓީ ކައިރީގައި އިޒްރޭލު ސިފައިން ހިންގި އޮޕަރޭޝަންތަކުގައި ދެ ފަލަސްތީނު މީހުން ވަނީ ޝަހީދު ކޮށްލާފަ އެވެ. ފަލަސްތީނު ހެލްތު މިނިސްޓްރީން ބުނީ 16 އަހަރުގެ ކުއްޖަކާއި 22 އަހަރުގެ ފިރިހެނަކު ބަޑިޖެހުމުން މަރުވި ކަމަށެވެ. ޣައްޒާ ހަނގުރާމަ ފެށުމާ އެކު ވެސްޓް ބޭންކް ގައި 1،000 އަށް ވުރެ ގިނަ ފަލަސްތީނު މީހުން މަރުވެފައިވާއިރު، 44 އިޒްރޭލު މީހުން މަރުވެފައިވެ އެވެ.
ހުޅަނގު އައްސޭރީގައި އޮންނަ ރާމަالله ގެ އަލީ މިސްކިތުގައި އިޒްރޭލު ސިފައިން ހިންގި ރެއިޑެއްގައި ސިފައިންގެ މީހަކު ބަޑި ދިއްކޮށްގެން - ޑިސެމްބަރު 9، 2025
އިޒްރޭލުން ހިސޯރު ކޮށްފައި އޮންނަ ފަލަސްތީނުގެ ވެސްޓް ބޭންކް (ހުޅަނގު އައްސޭރި) ގެ އުތުރުގައި ހޮނިހިރު ދުވަހު ދެ ފަލަސްތީނު މީހުން މަރާލާފައިވާ ކަމަށް އިޒްރޭލު ސިފައިން ބުނެފި އެވެ.
ސިފައިންގެ ބަޔާނެއްގައި ބުނީ "ޤަބަތިއްޔާ ސަރަހައްދުގައި ހިންގި އޮޕަރޭޝަނެއްގެ ތެރޭގައި، ޓެރަރިސްޓަކު ސިފައިންނަށް ހުރަސް އެޅުމުން، އެމީހުން ބަޑިޖަހާ އެ ޓެރަރިސްޓު ނައްތާލީ" ކަމަށެވެ.
"އެއާއެކު، ސީލަތު އަލް-ހަރިތިއްޔާ ސަރަހައްދުގައި ހިންގި އިތުރު އޮޕަރޭޝަނެއްގެ ތެރޭގައި، ޓެރަރިސްޓަކު ސިފައިންނާ ދިމާލަށް ގޮވާ އެއްޗެއް އެއްލުމުން، އެމީހުން ބަޑިޖަހާ އެ ޓެރަރިސްޓު ނައްތާލީ."
މި ދެ ސަރަހައްދު ވެސް އޮންނަނީ ޖެނިން ސިޓީގެ ކައިރީގައެވެ.
އިޒްރޭލު ސިފައިން ރިޕޯޓްކުރި ގޮތުން މި ހާދިސާ ތަކުގައި އެމީހުންގެ ސިފައިންގެ ތެރެއިން އެއްވެސް މީހަކަށް އަނިޔާއެއް ލިބިފައި ނުވާ ކަމަށެވެ.
ފަލަސްތީނުގެ ހެލްތު މިނިސްޓްރީއާ ހަވާލާދީ ވަފާ ނިއުސް އޭޖެންސީ އިން ބުނީ 16 އަހަރުގެ ފިރިހެން ކުއްޖަކު "އިޒްރޭލުގެ އިސްތިއުމާރީ ބާރުން ބަޑިޖެހުމުގެ ސަބަބުން ލިބުނު ޒަހަމްތަކުން" މަރުވި ކަމަށެވެ.
އަދި ސީލަތު އަލް-ހަރިތިއްޔާ ގައި "އިސްތިއުމާރީ ބާރުން ހިންގި ރެއިޑެއްގެ ތެރޭގައި މެޔަށް ބަޑިޖެހުމުގެ ސަބަބުން" 22 އަހަރުގެ ފިރިހެނަކު މަރުވި ކަމަށް ވެސް ރިޕޯޓްކުރިއެވެ.
1967 ވަނަ އަހަރުން ފެށިގެން އިޒްރޭލުން ހިސޯރު ކޮށްފައިވާ ވެސްޓް ބޭންކް ގައި ހިނގާ އަނިޔާވެރިކަން އިތުރުވެފައިވަނީ 2023 އޮކްޓޯބަރު 7 ގައި އިޒްރޭލުން ޣައްޒާ ހަނގުރާމަ ފެށުމާ އެކުގައެވެ.
އޮކްޓޯބަރު މަހު އިޒްރޭލާއި ހަމާސް އާއި ދެމެދު ހަނގުރާމަ ހުއްޓާލުމުގެ އެއްބަސްވުމަކަށް އައި ނަމަވެސް ވެސްޓް ބޭންކު ގައި ހިންގާ އަނިޔާވެރިކަން ދަށްވެފައެއް ނުވެއެވެ.
ޣައްޒާ ހަނގުރާމަ ފެށުމާ އެކު ވެސްޓް ބޭންކްގައި އިޒްރޭލު ސިފައިންނާއި އެތަނުގައި ގާނޫނާ ޚިލާފަށް ވަޒަންވެރިވެގެން އުޅޭ ޔަހޫދީން ވަނީ 1،000 އަށްވުރެ ގިނަ ފަލަސްތީނު މީހުން މަރާލާފައިވާ ކަމަށް، ފަލަސްތީނުގެ ހެލްތު މިނިސްޓްރީގެ ތަފާސްހިސާބުތަކަށް ބިނާކޮށް އޭއެފްޕީން ހަދާފައިވާ ހިސާބުން ދައްކައެވެ.
އިޒްރޭލުގެ އޮފިޝަލް ތަފާސްހިސާބުތަކުން ދައްކާ ގޮތުގައި، ފަލަސްތީނުގެ ހަމަލާތަކުގައި ނުވަތަ އިޒްރޭލު ސިފައިންގެ އޮޕަރޭޝަންތަކުގައި، ސިފައިންނާއި އާންމުން ހިމެނޭ ގޮތުން، މަދުވެގެން 44 އިޒްރޭލު މީހުން މަރުވެފައިވެއެވެ.
މަސްދަރު: އޭއެފްޕީ
