މި ހަމަލާތަކާއެކު، ސެޕްޓެމްބަރު މަހުގެ ކުރީކޮޅުން ފެށިގެން މިހާތަނަށް އެމެރިކާ އިން ކަނޑުމަތީގައި ދިން މިފަދަ ހަމަލާތަކުގެ އަދަދު 33 އަށް އަރާފައިވާއިރު، މި ހަމަލާތަކުގައި މަދުވެގެން 112 މީހުން ވަނީ މަރުވެފައި.
އެމެރިކާގެ ނޭވީގެ ޖެރަލްޑް އާރ ފޯޑް ކެރިއާ ސްޓްރައިކް ގްރޫޕް ކެރިބިއަން ކަނޑާ ދިމާއަށް ދަތުރުކުރާއިރު، އެފް/އޭ-18އީ/އެފް ސުޕަރ ހޯނެޓްސް އާއި އެމެރިކާގެ ވައިގެ ސިފައިންގެ ބީ-52 ސްޓްރެޓޯފޯޓްރެސް އެސްކޯޓް ކުރަނީ
މަސްތުވާތަކެތި އުފުލާކަމަށް ތުހުމަތުކުރެވޭ އުޅަނދުތަކަކަށް އެމެރިކާއިން ދިން ހަމަލާތަކެއްގައި ފަސް މީހަކު މަރުވެއްޖެ ކަމަށާއި، ސަލާމަތްވި މީހުން ހޯދުމުގެ މަސައްކަތް ކުރަމުންދާ ކަމަށް އެމެރިކާގެ އަސްކަރިއްޔާއިން ހާމަކޮށްފިއެވެ.
މި ހަމަލާތަކާއެކު، ސެޕްޓެމްބަރު މަހުގެ ކުރީކޮޅުން ފެށިގެން މިހާތަނަށް އެމެރިކާ އިން ކަނޑުމަތީގައި ދިން މިފަދަ ހަމަލާތަކުގެ އަދަދު 33 އަށް އަރާފައިވާއިރު، މި ހަމަލާތަކުގައި މަދުވެގެން 112 މީހުން ވަނީ މަރުވެފައެވެ.
އެމެރިކާގެ ސަަަދަން ކޮމާންޑުން ބުދަ ދުވަހު ނެރުނު ބަޔާނެއްގައި ބުނެފައިވަނީ، މަސްތުވާތަކެތި ވަގަށް ބޭރުކުރާ ކަމަށް ތުހުމަތުކުރެވޭ އުޅަނދުތަކަކަށް ދިން އާ ހަމަލާތަކެއްގައި ފަސް މީހުން މަރުވެފައިވާ ކަމަށެވެ. އަދި ކަނޑަށް ވެއްޓުނު މީހުން ހޯދުމުގެ މަސައްކަތް ފެށުމަށް އެ ގައުމުގެ ކޯސްޓްގާޑަށް މިހާރު ވަނީ އަމުރުކޮށްފައެވެ. ނަމަވެސް، މި ހަމަލާތައް ދިން ވަކި ސަރަހައްދެއް އެ ބަޔާނުގައި ހާމަކޮށްފައެއް ނުވެއެވެ. މީގެ ކުރިން މިފަދަ ހަމަލާތައް އާންމުކޮށް ދީފައިވަނީ ކެރީބިއަން ކަނޑާއި ޕެސިފިކް ކަނޑުގެ އިރުމަތީ ސަރަހައްދުތަކުގައެވެ.
އަސްކަރިއްޔާ އިން ސޯޝަލް މީޑިއާގައި އާންމުކޮށްފައިވާ ވީޑިއޯއަކުން ފެންނަ ގޮތުގައި، ހަމަލާ ދިން އިރު ތިން އުޅަނދެއް އެކުގައި ދަތުރުކުރަމުން ދިޔައެވެ. އަދި ހަމަލާ ދިނުމުގެ ކުރިން އެ އުޅަނދުތަކުގެ މެދުގައި މަސްތުވާތަކެތި ބަދަލުކޮށްފައިވާ ކަމަށް އަސްކަރިއްޔާއިން ބުނި ނަމަވެސް، އެކަމުގެ އެއްވެސް ހެއްކެއް މިހާތަނަށް ދައްކާފައެއް ނުވެއެވެ.
ހަމަލާގެ ތަފްސީލް ހާމަކުރަމުން އަސްކަރިއްޔާ އިން ބުނީ، ފުރަތަމަ އުޅަނދަށް ދިން ހަމަލާގައި އޭގައި ތިބި ތިން މީހުން މަރުވި ކަމަށެވެ. އެއާއެކު ދެން ތިބި މީހުން އުޅަނދުތައް ދޫކޮށް ކަނޑަށް ފުންމާލި ކަމަށާއި، އޭގެ ފަހުން ދިން ހަމަލާތަކުގައި އެ އުޅަނދުތައް ވަނީ ފައްތާލާފައެވެ. އަދި ފަހުން ދިން ހަމަލާއެއްގައި އިތުރު ދެ މީހަކު މަރުވި ކަމަށްވެސް ބަޔާނުގައިވެއެވެ.
ކަނޑަށް ވެއްޓުނު މީހުން ހޯދުމުގެ މަސައްކަތް ކޯސްޓްގާޑުން ފަށާފައި މިވަނީ، މީގެ ކުރިން ސެޕްޓެމްބަރު މަހު ދިން ހަމަލާއެއްގައި ސަލާމަތްވި މީހުންނަށް އަމާޒުކޮށް އަސްކަރިއްޔާއިން އަލުން ހަމަލާދީ އެމީހުން މަރާލި މައްސަލައިގައި ބޮޑެތި ފާޑުކިޔުންތަކެއް އަމާޒުވެފައިވާ ދަނޑިވަޅެއްގައެވެ. ބައެއް ގާނޫނީ މާހިރުންނާއި ޑިމޮކްރެޓިކް ޕާޓީގެ މެންބަރުން އެއީ ޖިނާއީ ކުށެއް ކަމަށް ބުނަމުންދާއިރު، ރައީސް ޓްރަމްޕްގެ ސަރުކާރުން ބުނަނީ އެއީ ގާނޫނީ ގޮތުން ހުއްދަ އަމަލެއް ކަމަށެވެ.
ރޮއިޓާސް ނިއުސް އެޖެންސީން ރިޕޯޓްކުރާ ގޮތުގައި، އުޅަނދުތައް ދޫކޮށް ކަނޑަށް ފުންމާލި އަށް މީހަކު ހޯދުމުގެ މަސައްކަތް ޕެސިފިކް ކަނޑުގައި މިހާރު ދަނީ ކުރަމުންނެވެ. މި މަސައްކަތުގައި ސީ-130 މަރުކާގެ މަތިންދާބޯޓެއް ދަނީ ބޭނުންކުރަމުންނެވެ.
ރައީސް ޓްރަމްޕް ވަނީ މި ހަމަލާތަކަކީ އެމެރިކާއަށް މަސްތުވާތަކެތި އެތެރެވުން ހުއްޓުވުމަށް ކުރާ "ހަނގުރާމައެއް" ކަމަށް ސިފަކުރައްވައި އެކަން ދިފާއުކުރައްވާފައެވެ. މީގެ އިތުރުން، ވެނެޒުއޭލާގެ ރައީސް ނިކޮލަސް މަދޫރޯގެ ސަރުކާރަށް ޕްރެޝަރު ކުރުމުގެ ގޮތުން އެ ސަރަހައްދަށް 15،000 އަށްވުރެ ގިނަ ސިފައިން ވަނީ ފޮނުވާފައެވެ. އެމެރިކާ އިން ތުހުމަތުކުރާ ގޮތުގައި މަދޫރޯގެ ސަރުކާރުން ދަނީ މަސްތުވާތަކެތީގެ ވިޔަފާރިއަށް އެހީތެރިވަމުންނެވެ. ނަމަވެސް ވެނެޒުއޭލާއިން މި ތުހުމަތުތައް ދޮގުކުރެއެވެ. އެ ގައުމުން ބުނާ ގޮތުގައި އެމެރިކާގެ އަސްލު ބޭނުމަކީ މަދޫރޯގެ ސަރުކާރު ވައްޓާލައި، އެ ގައުމުގައި ހުރި ދުނިޔޭގެ އެންމެ ބޮޑު ތެޔޮ ރިޒާވަށް އަތްގަދަކުރުމެވެ.
ހޯމަ ދުވަހު ޓްރަމްޕް ވިދާޅުވި ގޮތުގައި، ވެނެޒުއޭލާގައި މަސްތުވާތަކެތި ބަރުކުރާ ސަރަހައްދަކަށް އެމެރިކާއިން ވަނީ ހަމަލާދީފައެވެ. މިއީ ވެނެޒުއޭލާގެ އެއްގަމު ސަރަހައްދަކަށް އެމެރިކާއިން ހަމަލާދިން ކަމަށް ރިޕޯޓްކުރެވުނު ފުރަތަމަ ފަހަރެވެ. ނަމަވެސް، މި ހަމަލާއަކީ އަސްކަރިއްޔާއިން ދިން ހަމަލާއެއް ނޫން ކަމަށް އޮފިޝަލުން ބުނެ އެވެ. މީގެ ކުރިން ޓްރަމްޕް ވަނީ ވެނެޒުއޭލާގައި ސިއްރު އޮޕަރޭޝަންތައް ހިންގުމުގެ ހުއްދަ ސީ.އައި.އޭ އަށް ދެއްވާފައެވެ.
