އިރުމަތީ ޕެސިފިކް ކަނޑުގައި އެމެރިކާ އިން ދިން ހަމަލާގައި މީހަކު މަރާލައިފި

މަސްތުވާ ތަކެތި އުފުލާ ކަމަށް ޝައްކު ކުރެވުނު އުޅަނދަކަށް، އިރުމަތީ ޕެސިފިކްގައި އެމެރިކާ އިން ދިން ހަމަލާއެއްގައި މީހަކު މަރުވެފައިވާ ކަމަށް އެމެރިކާގެ އަސްކަރިއްޔާ އިން ހާމަ ކޮށްފި އެވެ.

އޮޕަރޭޝަން ސަދާން ސްޕިއަރ ގެ ނަމުގައި ހިންގާ މި އޮޕަރޭޝަން ގެ އެންމެ ފަހުގެ ހަމަލާ އާ ބެހޭ ގޮތުން އެމެރިކާގެ ސަދާން ކޮމާންޑް އިން ސޯޝަލް މީޑިއާގައި ކޮށްފައިވާ ޕޯސްޓެއްގައި ބުނެފައި ވަނީ، އިރުމަތީ ޕެސިފިކްގައި މަސްތުވާ ތަކެތި އުފުލުމަށް ބޭނުން ކުރާ މަގު ތަކުގައި ދަތުރު ކުރަމުން ދިޔަ އުޅަނދަކަށް ހަމަލާ ދީފައިވާ ކަމަށެވެ. އަދި އެ ހަމަލާ ދީފައި ވަނީ އަސްކަރިއްޔާ އަށް ލިބުނު އިންޓެލިޖެންސް މައުލޫމާތުގެ މައްޗަށް ބިނާކޮށް ކަމަށް ބުނެފައިވެ އެވެ. 

ނަމަވެސް، އެ އުޅަނދުގައި މަސްތުވާ ތަކެތި އުފުލާފައިވާ ކަމުގެ އެއްވެސް ހެއްކެއް ސަދާން ކޮމާންޑަށް ދެއްކިފައި ނުވެ އެވެ. ސަދާން ކޮމާންޑް އިން ހާމަ ކޮށްފައިވާ ވީޑިއޯ އިން ގެންނަނީ، އުޅަނދުގެ އެއް ފަރާތުން ފެން ތަކެއް ދޫކުރަމުން ދާ މަންޒަރެވެ. އެއާ އެކު އުޅަނދަށް އަމާޒުކޮށް ހަމަލާ ދީފައިވާއިރު، އުޅަނދުގައި ރޯވާ މަންޒަރު ވެސް ފެނެ އެވެ. 

މީގެ ކުރިން ވެސް އެމެރިކާާ އިން ވަނީ އުޅަނދު ތަކަށް ހަމަލާ ދޭ މަންޒަރު ފެންނަ ވީޑިއޯ ހިއްސާ ކޮށްފަ އެވެ. ކުރީގެ ވީޑިއޯ ތަކުގައި ފެންނަނީ ހަމަލާ ދީ އުޅަނދު ވަގުތުން ގޮއްވާލާ މަންޒަރެވެ. ބައެއް ވީޑިއޯ ތަކުގައި، ރޮކެޓު ފަދަ ހަތިޔާރު ބޭނުން ކޮށްގެން ހަމަލާ ދޭ މަންޒަރު ވެސް ފެނިފައިވެ އެވެ. 

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ބުނެފައި ވަނީ، އެ ހަމަލާ ތަކުގެ މައިގަނޑު މަޤުސަދަކީ އެމެރިކާ އަށް މަސްތުވާ ތަކެތި އެތެރެ ކުރުން ހުއްޓުވުން ކަމަށެވެ. ވެނެޒުއެލާގެ ރައީސް ނިކޮލަސް މަދޫރޯގެ ސަރުކާރާ ދެކޮޅަށް އެމެރިކާ އިން މި އޮޕަރޭޝަން ފަށާފައިވާއިރު، ވެނެޒުއެލާ އިން ވަނީ އެމެރިކާގެ އެންމެހާ ތުހުމަތުތައް ދޮގު ކޮށްފަ އެވެ.

މިއަހަރުގެ ސެޕްޓެމްބަރު މަހުން ފެށިގެން އެމެރިކާ އިން މި ހަމަލާތައް ދެމުން އަންނައިރު، ހަމަލާ ތަކުގައި މިހާތަނަށް ވެސް ގިނަ ބަޔަކު މަރުވެފައިވާ ކަމަށް ވަނީ ރިޕޯޓު ކޮށްފަ އެވެ. އެއާ އެކު، އެމެރިކާ އިން ދެމުން އަންނަ މި ހަމަލާ ތަކަކީ ބައިނަލްއަޤުވާމީ އެންމެހާ ޤާނޫނުތަކާ ޚިލާފަށް ދެމުން އަންނަ ހަމަލާތަކެއް ކަމަށް މާހިރުން ފާހަގަ ކޮށްފައިވެ އެވެ. 

އެކަމަ ގުޅިގެން އެމެރިކާގެ ޤާނޫނު ހަދާ މަޖިލީހުގެ މެމްބަރުންގެ އިތުރުން، އިންސާނީ ހައްގު ތަކަށް މަސައްކަތް ކުރާ ފަރާތްތަކުން ވެސް އަންނަނީ ފާޑު ކިޔުން އަމާޒު ކުރަމުންނެވެ. އެގޮތުން ހަމަލާތައް ދެމުން އަންނަނީ މަސްތުވާ ތަކެތީގެ ވިޔަފާރީގައި އުޅޭ މީހުންނާ ދެކޮޅަށް ކަމަށް ބުނެފައި ވީ ނަމަވެސް، އެކަމުގެ އެއްވެސް ހެއްކެއް ދެއްކިފައި ނުވާ ކަމަށް ވަނީ ފާހަގަ ކޮށްފަ އެވެ.