ވެނެޒުއެލާގެ މަސްތުވާތަަކެތި އުފުލާ ބަނދަރަކަށް ހަމަލާ ދީފައިވާ ކަމަށް ޓްރަމްޕް ވިދާޅުވެއްޖެ

މަސްތުވާ ތަކެއްޗާ ދެކޮޅަށް އެމެރިކާ އިން ކުރިއަށް ގެންދާ އޮޕަރޭޝަންގައި، ވެނެޒުއެލާގެ މަސްތުވާ ތަކެތި އުފުލާ ބަނދަރަކަށް ހަމަލާ ދީފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

މަސްތުވާ ތަކެއްޗާ ދެކޮޅަށް ކަމަށް ބުނެ އެމެރިކާ އިން ވެނެޒުއެލާއާ ދެކޮޅަށް ޚާއްސަ އަސްކަރީ އޮޕަރޭޝަނެއް ފަށާފައިވާއިރު، މީގެ ކުރިން ހަމަލާ ދީފައި ވަނީ ކެރީބިއަން ސަރަހައްދުން ދަތުރު ކުރާ އުޅަނދު ތަަކަށެވެ. ނަަމަވެސް، މިފަހުން ދިން ހަމަލާ އަކީ ބިމަށް އަމާޒުކޮށް ދީފައިވާ ފުރަތަމަ ހަމަލާ އެވެ. 

ހޯމަ ދުވަހު ޓްރަމްޕް އެކަން އިއުލާން ކުރައްވާފައިވާއިރު، އެމެރިކާގެ ސިފައިން ވަނީ އިރުމަތީ ޕެސިފިކް ކަނޑުގައި މަސްތުވާ ތަކެތި އުފުލާ ކަމަށް ބުނާ ބޯޓަކަަށް ވެސް އިތުރު ހަމަލާއެއް ދީފަ އެވެ. އެ ހަމަލާ ތަކުގައި މަދު ވެގެން ދެ މީހަކު މަރުވެފައިވާ ކަމަށް ވަނީ ހާމަ ކޮށްފަ އެވެ. 

ވެނެޒުއެލާ އަށް ދިން ހަމަލާއާ ގުޅޭ ގޮތުން ޓްރަމްޕް އެންމެ ފުރަތަމަ ވާހަކަ ދައްކަވާފައި ވަނީ ހުކުރު ދުވަހު އޭނާ ދެއްވި ރޭޑިއޯ އިންޓަވިޔުއެއްގަ އެވެ. ނަމަވެސް، ހޯމަ ދުވަހު ނޫސްވެރިން އެ ސުވާލު އަމާޒު ކުރުމުން ޓްރަމްޕް ވިދާޅުވީ، އެމެރިކާ އިން މަސްތުވާ ތަކެތި ބަރުކުރާ ތަނަކަށް ހަމަލާ ދީފައިވާ ކަމަށެވެ. 

އެމެރިކާގެ ފްލޮރިޑާގައި އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫއާ ބައްދަލު ކުރައްވަމުން ޓްރަމްޕް ވިދާޅުވީ، މަސްތުވާ ތަކެތި ބަރު ކުރަމުން ދިޔަ ބަނދަރު ސަރަހައްދުގައި "ބޮޑު" ހަމަލާއެއް ދީފައިވާ ކަމަށެވެ. ޓްރަމްޕް ވިދާޅުވީ އެ ބަނދަރުގައި އޮތް ބޯޓު ތަކަށް ބަރު ކުރަމުން ދިޔައީ މަސްތުވާ ތަކެތި ކަމަށާއި، އެމެރިކާ އިން އެ ހުރިހާ ބޯޓަކާ ދެކޮޅަށް ހަމަލާ ދީފައިވާ ކަމަށެވެ. 

ނަމަވެސް، އެ ބަނދަރަށް ހަމަލާ ދިނީ އެމެރިކާގެ ސިފައިންތޯ، ނުވަތަ ސީއައިއޭ އިން ތޯ، ނުވަތަ އެ ހަމަލާ ދިނީ ކޮން ފަރާތަކުން ތޯ ސުވާލު ކުރުމުން ޓްރަމްޕް ވަކި ޖަވާބެއް ދެއްވާފައި ނުވެ އެވެ. ޓްރަމްޕް ވިދާޅުވީ އެ ހަމަލާ ދިނީ ކޮން ބައެއްކަން އެނގިވަޑައިގަންނަވާ ކަމަށާއި، ނަމަވެސް އެއީ ކޮން ބައެއްކަން ބުނަން ބޭނުން ނުވާ ކަމަށެވެ. ނަމަވެސް، އެއީ ބަނދަރު ސަރަހައްދަށް ދިން ހަމަލާއެއް ކަމަށް ޓްރަމްޕް ތަކުރާރުކޮށް ވިދާޅުވި އެވެ. 

އެ ހަމަލާއާ ގުޅޭ ގޮތުން ވެނެޒުއެލާ އިން މިހާތަނަށް ވަކި އެއްޗެއް ބުނެފައި ނުވެ އެވެ. އަދި އެމެރިކާގެ ހަމަލާއެއް ވެނެޒުއެލާގައި ދީފައިވާ ކަމަށް ވެނެޒުއެލާގެ މިނިވަން މީޑިއާގައި ރިޕޯޓު ކޮށްފައި ނުވާ ކަމަށް ވެސް، އަލް ޖަޒީރާގައި ވަނީ ބުނެފަ އެވެ. 

މިފަދަ ހަމަލާއެއް ދީފައިވާ ކަމަށް ޓްރަމްޕް ވިދާޅުވެފައި މި ވަނީ، އެމެރިކާ އިން ވެނެޒުއެލާއާ ދެކޮޅަށް އަޅަމުން އަންނަ ފިޔަވަޅުތައް ވަރުގަދަ ކޮށްފައިވާ ދަނޑިވަޅެއްގަ އެވެ. މިއީ ވެނެޒުއެލާ އިން އެމެެރިކާ އަށް މަސްތުވާ ތަަކެތި އެތެރެ ކުރާ ކަމަށް ތުހުމަތުކޮށް، އެކަމާ ދެކޮޅަށް މީގެ ދުވަސް ތަކެއް ކުރިން ޓްރަމްޕް ފައްޓަވާފައިވާ އޮޕަރޭޝަނެކެވެ. 

އެމެރިކާ އާއި ޓްރަމްޕް، ވެނެޒުއެލާ އަށް މިފަދަ ތުހުމަތު ތަކެއް ކޮށްފައި ވީ ނަމަވެސް، ތަކުރާރުކޮށް އެ ޤައުމުން ބުނަމުން އަންނަނީ އެއީ ދޮގު ވާހަކަ ތަކެއް ކަމަށެވެ. އަދި އެމެރިކާ އިން ބޭނުން ވަނީ، ވެނެޒުއެލާގެ ރައީސް ނިކޮލަސް މަދޫރޯގެ ސަރުކާރު ބަދަލުކޮށް، އެމެރިކާގެ އަޅުވެތި ކަމުގައި އެ ޤައުމު ބާއްވަން ކަމަށް ވަނީ ބުނެފަ އެވެ.