ވެނެޒުއެލާ ކައިރީ އޮތް ތެޔޮ ޓޭންކަރެއް އެމެރިކާ އިން ހިފައިފި

ވެނެޒުއެލާގެ ކައިރީގައި އޮތް ތެޔޮ ޓޭންކަރެއް އެމެރިކާ އިން ހިފައިފި އެވެ. 

އެމެރިކާގެ ސެކްރެޓަރީ އޮފް ހޯމްލޭންޑް ސެކިއުރިޓީ ކްރިސްޓީ ނޯއެމް ވިދާޅުވީ ޑިސެމްބަރު މަހުގެ ވިހި ވަނަ ދުވަހުގެ ހެނދުނުގެ ވަގުތެއް ގައި އެމެރިކާގެ ކޯސްޓް ގާޑުން، ދިފާއީ ޑިޕާޓްމަންޓުގެ އެހީތެރިކަމާ އެކު ވެނެޒުއެލާގެ ކައިރިން އެންކަރު ކޮށްފައި އޮތް ތެޔޮ ޓޭންކަރެއް ހިފާފައިވާ ކަމަށެވެ. އޭނާ ވަނީ އެ މައުލޫމާތު ސޯޝަލް މީޑިއާގެ އެކްސް އެކައުންޓު މެދުވެރިކޮށް ހިއްސާ ކުރައްވައިފަ އެވެ. އެ ޕޯސްޓުގައި ޝާއިއު ކޮށްފައިވާ ވީޑިއޯ އިން ފެންނަނީ، ހެލިކޮޕްޓަރަކުން ކަނޑު މަތީގައި އޮތް ބޮޑު ޓޭންކަރަކަށް ތިރި ކުރާ މަންޒަރެވެ.

 އެކަމާ ގުޅޭ ގޮތުން ވެނެޒުއެލާ އިން ވަނީ ވަރަށް ބޮޑަށް ނުރުހުން ފާޅު ކޮށްފަ އެވެ. އެގޮތުން ވެނެޒުއެލާ އިން ބުނެފައި ވަނީ އެއީ ވައްކަމާއި، މީހުން ވަގަށް ހައްޔަރު ކުރުމުގެ އަމަލެއް ކަމަށެވެ. އެމެރިކާ އިން އެ ޓޭންކަރު ހިފާފައިވާއިރު، މިއީ އެމެރިކާގެ ރައީސް ޑޮނަލްޑް ޓްރަމްޕް، ވެނެޒުއެލާ އަށް ދަތި ކުރުމަށް ކުރިއަށް ގެންދާ ޙަރަކާތް ތަކުގެ ތެރޭގައި ހިމެނޭ އަމަލެއް ކަމަށް މާހިރުން ވަނީ ފާހަގަ ކޮށްފަ އެވެ. 

އެމެރިކާގެ މި އަމަލާ ގުޅިގެން ވެނެޒުއެލާގެ ސަރުކާރުން ވަރަށް ބޮޑަށް ނުރުހުން ފާޅު ކޮށްފައިވާއިރު، އެމެރިކާ އިން ހިންގަމުން އަންނަ އޮޕަރޭޝަނަށް މީގެ ކުރިން ވެސް ވަނީ ފާޑު ކިޔުން އަމާޒު ކޮށްފަ އެވެ. މީގެ އިތުރުން، އެ އަމަލު ހިންގާފައިވާ ފަރާތްތައް ޒިންމާދާރު ކުރުވެން ޖެހޭނެ ކަމަށާއި، އެ މީހުން އަދުލު އިންސާފުގެ ކުރި މައްޗަށް ގެނެވެން ޖެހޭ ކަމަށް ވެސް ވެނެޒުއެލާ އިން ބުނެފައިވެ އެވެ. 

އެމެރިކާގެ ހޯމްލޭންޑް ސެކިއުރިޓީ އިން ހާމަ ކޮށްފައިވާ ގޮތުގައި އެ ޓޭންކަރަކީ ސެންޗުރީސް ނަމަކަށް ކިޔާ ބޯޓެކެވެ. އެމެރިކާ އިން ތުހުމަތު ކޮށްފައިވާ ގޮތުގައި އެ ބޯޓުން ވަނީ އެމެރިކާގެ ދަތި ކުރުން ތަކުގެ ތެރޭގައި ހިމެނޭ ކަމަށް ޝައްކު ކުރެވޭ ތެލުގެ ބާވަތެއް އުފުލައިފަ އެވެ. ތެލުގެ ސިޕްމަންޓުތައް ބަލަހައްޓާ އޮންލައިން ޚިދުމަތެއް ކަމަށްވާ ޓޭންކާޓްރެކާސް އިން ބުނެފައިވާ ގޮތުގައި، ސެންޗުރީސް އަކީ ޗައިނާގެ ވެރި ކަމުގެ ދަށުން ހިންގާ، ޕެނަމާގެ ދިދަ ޖަހައިގެން ދަތުރު ކުރާ ޓޭންކަރެއް ކަމަށެވެ.

މީގެ އިތުރުން މި ޓޭންކަރުން މި މަހުގެ ކުރީ ކޮޅު ވެނެޒުއެލާގެ ބަނދަރަކުން އެއް މިލިއަން ސަތޭކަ ހާސް ބެރަލްގެ ތެޔޮ އުފުލާލަފައިވާ ކަމަށާއި، ޑިސެމްބަރު މަހުގެ 15 ވަނަ ދުވަހު ވެނެޒުއެލާގެ އިޤްތިޞާދީ ސަރަހައްދުން ބޭރަށް ގެންދިޔަ ކަމަށް ވެސް ވަނީ ބުނެފަ އެވެ. ވެސެލްފައިންޑާ ޑޭޓާ ބޭސްގައި ވެސް މި ޓޭންކަރުން އެންމެ ފަހުން ފެނިފައި ވަނީ ވެނެޒުއެލާގެ ކަނޑުގެ ސަރަހައްދުން ކަމަށް ބަޔާން ކޮށްފައިވެ އެވެ. 

އެމެރިކާގެ ރިޔާސީ ގަނޑުވަރު، ވައިޓް ހައުސްގެ ޑެޕިއުޓީ ޕްރެސް ސެކްރެޓަރީ އަންނާ ކެލީ ވިދާޅުވީ އެ ޓޭންކަރުގައި ވެނެޒުއެލާގެ ދައުލަތުގެ ތެޔޮ ކުންފުންޏެއް ކަމަށްވާ، ޕީޑީވީއެސްއޭގެ ދަތި ކުރުމުގެ ދަށުގައި ހިމެނޭ ތެލެއް ހިމެނޭ ކަމަށާއި، އެ ޓޭންކަރަކީ ވެނެޒުއެލާގެ ވަށައިގެން ޙަރަކާތްތެރިވާ ތެޔޮ ޓޭންކަރު ތަކުން ހިންގާ، އޮޅުވާލައިގެން ދިދަ ޖަހައިގެން ދަތުރު ކުރާ ޓޭންކަރެއް ކަމަށެވެ.