މަދޫރޯ އާއި އޭނާގެ އަނބިކަނބަލުން ހިމެނޭހެން ހަތް މީހަކަށް އެމެރިކާ އިން އަނެއްކާ ވެސް ފިޔަވަޅު އަޅައިފި

ވެނެޒުއެލާގެ ރައީސް ނިކޮލަސް މަދޫރޯ އާއި އޭނާ ގެ އަނބިކަނބަލުން ހިމެނޭހެން، އެ މީހުންގެ އާއިލާގެ ހަތް މެމްބަރަކާ ދެކޮޅަށް އެމެރިކާ އިން އަނެއްކާ ވެސް ފިޔަވަޅު އަޅައިފި އެވެ. 

ހުކުރު ދުވަހު އެމެރިކާގެ ޓްރެޒަރީ ޑިޕާޓްމަންޓް އިން އެކަން ހާމަ ކޮށްފައިވާއިރު، މިއީ ވެނެޒުއެލާ އާއި މަދޫރޯ އަށް އިތުރަށް ޕްރެޝަރު ކުރުމަށް އެމެރިކާ އިން ނިންމާާފައިވާ ނިންމުމެކެވެ. 

އެމެރިކާގެ ޓްރެޒަރީ ޑިޕާޓްމަންޓް އިން ނެރެފައިވާ ބަޔާނެއްގައި ބުނެފައި ވަނީ، މަދޫރޯ އާއި އޭނާ ގެ އަނބިކަނބަލުން އަދި އާއިލާގެ ހަތް މެމްބަރަކަށް ފިޔަވަޅު އަޅާފައިވާ ކަމަށެވެ. އެގޮތުން މަދޫރޯ އަކީ މަސްތުވާ ތަކެތީގެ ނުބައި ދައުލަތެއް ދެމެހެއްޓުމަށް އެހީތެރިވެދޭ މީހެއް ކަމަށް، ޓްރެޒަރީ ސެކްރެޓަރީ ސްކޮޓް ބެސެންޓް ވަނީ ތުހުމަތު ކުރައްވައިފަ އެވެ. 

ބެސެންޓްގެ ބަޔާނުގައި ބުނެފައި ވަނީ، ވެނެޒުއެލާ އިން އެމެރިކާ އަށް މަސްތުވާ ތަކެތި އެތެރެ ކުރަމުން އަންނަ ކަމަށާއި، އެމެރިކާ އިން އެކަމަށް ފުރުސަތު ނުދޭނެ ކަމަށެވެ. އަދި މަދޫރޯ އާއި އޭނާ ގެ ކުށްވެރި ކަމުގައި ބައިވެރިވާ މީހުންގެ ސަބަބުން އެމެރިކާގެ ސުލްޙަ އާއި، އެ ޤައުމުގެ ހަމަޖެހުމަށް ނުރައްކާ ވަމުން އަންނަ ކަމަށް ވެސް ބުނެފައިވެ އެވެ. 

މީގެ އިތުރުން ބެސެންޓްގެ ބަޔާނުގައި ބުނެފައި ވަނީ މަދޫރޯގެ ޣައިރު ޤާނޫނީ އަދި ޑިކްޓޭޓާޝިޕް ދެމެހެއްޓުމަށް އެހީތެރި ވަމުން އަންނަ ފަރާތްތަކާ ދެކޮޅަށް ވެސް އެމެރިކާ އިން ފިޔަވަޅު އަޅާނެ ކަމަށެވެ. އެކަމާ ގުޅިގެން ކޮމެންޓެއް ހޯދުމަށް ވެނެޒުއެލާގެ އިންފޮމޭޝަން މިނިސްޓްރީގައި އެދިފައި ވީ ނަމަވެސް، ކޮމެންޓެއް ދީފައި ނުވާ ކަަމަށް ރޮއިޓާސް އިން ވަނީ ބުނެފަ އެވެ. 

މަސްތުވާ ތަކެއްޗާ ދެކޮޅަށް ކަމަށް ބުނެ އެމެރިކާ އިން އޮޕަރޭޝަންތައް ކުރިއަށް ގެންދިޔަ ނަމަވެސް، މަދޫރޯ އާއި އޭނާ ގެ ސަރުކާރުން ބުނަމުން އަންނަނީ އެއީ އެމެރިކާ އިން އެ ޤައުމުގެ ވެރިކަން ބަދަލު ކުރުމަށް ހިންގާ ކަމެއް ކަމަށެވެ. އަދި އެމެރިކާގެ އެންމެހާ ތުހުމަތުތަް ދޮގު ކުރާ ކަމަށް ވެސް މަދޫރޯ ވަނީ އެކި ފަހަރު މަތިން ވިދާޅުވެފަ އެވެ. 

އެމެރިކާާ އިން އަޅާފައިވާ ފިޔަވަޅު ތަކުގެ ތެރޭގައި މަދޫރޯ އާއި އޭނާ ގެ އާއިލީ މެމްބަރުންގެ މުދާތައް ހިފެހެއްޓުން ހިމެނެ އެވެ. އަދި އެ ފަރާތްތަކާ ގުޅުން އޮންނަ ވިޔަފާރީތަކާއި، ކުންފުނިތަކާ ދެކޮޅަށް ވެސް ވަނީ ދަތި ކުރުމުގެ ފިޔަވަޅު އެޅުމަށް ނިންމައިފަ އެވެ. މީގެ ކުރިން ވެސް އެމެރިކާ އިން މިފަދަ ނިންމުމެއް ނިންމާފައިވެ އެވެ. 

ޓްރަމްޕް ވަނީ އެކި ފަހަރު މަތިން މަދޫރޯ އަށް އިންޒާރު ވެސް ދެއްވައިފަ އެވެ. އެގޮތުން މަދޫރޯގެ ދުވަސްތައް ނިމިއްޖެ ކަމަށް ޓްރަމްޕް ވިދާޅުވެފައިވެ އެވެ. ޓްރަމްޕްގެ އެންގެވުމަށް ކެރީބިއަން ސަރަހައްދުގައި އެމެރިކާގެ އަސްކަރީ އޮޕަރޭޝަންތައް ފުޅާ ކޮށްފައިވާއިރު، މަސްތުވާ ތަކެތި އުފުލާ ކަމަށް ބުނެ އެމެރިކާ އިން އަންނަނީ ބޯޓު ތަކަށް ހަމަލާ ވެސް ދެމުންނެވެ.