އިންޓަނޭޝަނަލް ކްރިމިނަލް ކޯޓު ގެ ދެ ފަނޑިޔާރަކަށް އެމެރިކާ އިން ފިޔަވަޅު އަޅައިފި

އިންޓަނޭޝަނަލް ކްރިމިނަލް ކޯޓް (އައިސީސީ) ގެ ދެ ފަނޑިޔާރަކަށް އެމެރިކާ އިން ފިޔަވަޅު އެޅުމުން އެކަން ވަރަށް ބޮޑަށް އެ ކޯޓުން ކުށްވެރިކޮށްފިއެވެ.

ބުރާސްފަތި ދުވަހު އައިސީސީ އިން ނެރުނު ބަޔާނެއް ގައި ބުނީ އެމެރިކާ އިން އެޅި ފިޔަވަޅުތަކަކީ، ވަކި ފަރާތަކަށް ނުޖެހޭ އަދުލު އިންސާފު ގާއިމު ކުރާ މުއައްސަސާ އަކަށް "ފާޅުގައި ދިން ހަމަލާ އެއް" ކަމަށެވެ.

އެ ބަޔާނުގައި އައިސީސީ އިން ބުނެފައި ވަނީ، ގާނޫނު ތަންފީޒުކުރާ ފަނޑިޔާރުންނަށް ބިރުދެއްކުމަކީ ބައިނަލްއަގުވާމީ ގާނޫނީ އޮނިގަނޑު މުޅިން ނުރައްކަލަށް ހުށަހަޅާ ކަމެއް ކަމަށެވެ.

މި ފިޔަވަޅުތައް އިއުލާނު ކުރެއްވީ އެމެރިކާގެ ސްޓޭޓް ސެކްރެޓަރީ މާކޯ ރޫބިއޯ އެވެ. އޭނާ އިއުލާނު ކުރެއްވި ފިޔަވަޅު ތައް އަމާޒު ކުރި ފަނޑިޔާރުންނަކީ އިޒްރޭލަށް "ޣައިރު ގާނޫނީ ގޮތުން ޓާގެޓްކުރާ" ބެއެއްގެ ގޮތުގައި އޭނާ ސިފަ ކުރެއްވި އެވެ.

އިޒްރޭލުގެ ރުހުމެއް ނެތި އިޒްރޭލުގެ ރައްޔިތުންގެ ތަހުގީގު ކުރުމުގެ މަސައްކަތްތަކުގައި އެ ފަނޑިޔާރުން ބައިވެރިވި ކަމަށް އޭނާ ވިދާޅުވިއެވެ.

"މި ފަރާތްތަކަކީ އިޒްރޭލުގެ ރުހުމެއް ނެތި، އިޒްރޭލުގެ ރައްޔިތުން ތަހުގީގުކުރުމަށާއި، ހައްޔަރުކުރުމަށާއި، ބަންދުކުރުމަށާއި، ނުވަތަ ދައުވާކުރުމަށް އައިސީސީ އިން ކުރާ މަސައްކަތްތަކުގައި ސީދާ ބައިވެރިވި ފަރާތްތަކެކެވެ. އޭގެ ތެރޭގައި ޑިސެމްބަރު 15 ގައި އިޒްރޭލުން އައިސީސީ އަށް ހުށަހެޅި އިސްތިއުނާފާ ދެކޮޅަށް އައިސީސީ އިން ނެރުނު ހުކުމަށް ތާއީދުކޮށް، ވާގިވެރިވި ފަރާތްތަކާއެކު ވޯޓުދިނުން ހިމެނެއެވެ،" ރޫބިއޯ  ބަޔާނުގައި ވިދާޅުވިއެވެ.

އައިސީސީގެ މައި މަރުކަޒު ގާއިމު ކޮށްފައި ހުންނަ ގައުމު ކަމަށްވާ ނެދަލޭންޑްސް އިން ވެސް އެމެރިކާގެ މި ފިޔަވަޅުތައް ކުށްވެރިކޮށް، ބައިނަލްއަގުވާމީ ކޯޓުތައް ނުފޫޒެއް ނެތި މިނިވަންކަމާއެކު މަސައްކަތް ކުރަން ޖެހޭ ކަމަށް ބުންޏެވެ.

125 ގައުމެއް މެމްބަރުންގެ ގޮތުގައި ހިމެނޭ އައިސީސީ އަށް މިއަހަރު ފެބްރުއަރީ މަހު ވެސް ފިއްތުންތައް އެމެރިކާ އިން ކުރިމަތިކުރުވި އެވެ. އޭރު ކޯޓާ ދެކޮޅަށް ފިޔަވަޅު އެޅީ އެމެރިކާ އަށާއި އިޒްރޭލަށް ޓާގެޓްކޮށްގެން ޣައިރު ގާނޫނީ މަސައްކަތްތައް އެ ކޯޓުން ކުރާތީ ކަމަށް ބުނެފައިވެ އެވެ.

އޮކްޓޯބަރު 2023 ގެ ފަހުން އިޒްރޭލުން ވަނީ 70،667 ފަލަސްތީނު ރައްޔިތުން މަރާލާފައެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އޭގެ އިތުރުން 171،000 މީހުން ޣައްޒާ އަށް އިޒްރޭލުން ދިން ހަމަލާތަކުގައި ޒަޚަމްވެފައިވެ އެވެ.

ގާނޫނީ ތަޖުރިބާކާރުން ބުނަނީ އެމެރިކާގެ އެހީތެރިކަމާ އެކު އިޒްރޭލުން ޣައްޒާ ގައި އިންސާނިއްޔަތާ ޚިލާފު ހަނގުރާމައިގެ އެތައް ޖަރީމާ އެއް ހިންގާފައިވާ ކަމުގައެވެ.

އައިސީސީ އިން ވަނީ މި ތުހުމަތު ތަކާ ގުޅިގެން އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ އާއި ކުރީގެ ދިފާއީ ވަޒީރު ޔޯވް ގަލަންޓް ހައްޔަރު ކުރުމުގެ އަމުރު ނެރެފަ އެވެ.

އެމެރިކާ އާއި އިޒްރޭލަކީ އައިސީސީ ބަލައިގަންނަ ގައުމުތަކެއް ނޫނެވެ.