އެމެރިކާގެ ޚާރިޖީ ވަޒީރު މާކޯ ރޫބިއޯ ވިދާޅުވީ ވެނެޒުއޭލާގައި އޮތީ ޣައިރު ގާނޫނީ ސަރުކާރެއް ކަމަށާއި، އެއީ އީރާން، ހިޒްބުﷲ އާއި ނާކޯ-ޓެރަރިސްޓް ޖަމާޢަތްތަކާ ގުޅިގެން މަސައްކަތް ކުރާ ސަރުކާރެއް ކަމަށެވެ. ވެނެޒުއެލާގެ ލީޑަރަށް ނާކޯ-ޓްރެފިކިންގެ ތުހުމަތު ކުރެވިފައިވާ ކަމަށް ރޫބިއޯ ވިދާޅުވިއެވެ. އެމެރިކާގެ ގައުމީ މަސްލަހަތު ދިފާޢު ކުރުމަށް ގައުމީ ބާރުގެ ހުރިހާ އުންސުރެއް ބޭނުން ކުރާނެ ކަމަށް އޭނާ ވިދާޅުވި.
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ
ވެނެޒުއޭލާގެ ރައީސް މަދޫރޯގެ ސަރުކާރަކީ ޣައިރު ގާނޫނީި ސަރުކާރެއް ކަމަށް އެމެރިކާގެ ޚާރިޖީ ވަޒީރު މާކޯ ރޫބިއޯ ވިދާޅުވެއްޖެ އެވެ.
ވެނެޒުއެލާ އާއި އެމެރިކާ އާ ދެމެދު ހިނގަމުންދާ ހަމަނުޖެހުންތަކާ ގުޅޭ ސުވާލަކަށް ޖަވާބު ދެއްވަމުން ރޫބިއޯ ވިދާޅުވީ އެމެރިކާ އިން ހިންގަމުންދާ އޮޕަރޭޝަންގެ މަގްސަދަކީ "ސަރަހައްދީ ހަމަޖެހުމާއި ސަލާމަތް" ކަމަށެވެ.
"ވެނެޒުއެލާއާ ގުޅޭ ގޮތުން، ހުކުރު ދުވަހު ނޫސް ކޮންފަރެންސް އެއްގައި ވާހަކަ ދައްކަވަމުން ރޫބިއޯ ވިދާޅުވީ، ވެނެޒުއޭލާ ގައި އޮތީ ޣައިރު ގާނޫނީ ސަރުކާރެއް ކަމަށެވެ. އެއީ "އީރާނާ ގުޅިގެން މަސައްކަތް ކުރާ، ހިޒްބުﷲ އާ ގުޅިގެން މަސައްކަތް ކުރާ، މަސްތުވާތަކެތީގެ ވަގު ވިޔަރާރި ކުރާ އަދި ނާކޯ-ޓެރަރިސްޓް ޖަމާޢަތްތަކާ ގުޅިގެން މަސައްކަތް ކުރާ ސަރުކާރެއް،" ކަމަށް ވެސް ރޫބިއޯ ވިދާޅުވި އެވެ.
އޭނާ އިތުރަށް ވިދާޅުވީ، ޓްރަމްޕް ސަރުކާރުން ފިޔަވަޅު އަޅަން ފެށުމުގެ ކުރިން، ވެނެޒުއެލާގެ ލީޑަރާއި އޭނާގެ އާއިލާ އަށް "ނާކޯ-ޓްރެފިކިން" ގެ ތުހުމަތު ކުރެވިފައިވާ ކަމަށެވެ.
ޓްރަމްޕް ގެ ސަރުކާރަކީ ދުނިޔޭގައި ސުލްހަ ގާއިމު ކުރުމަށް މަސައްކަތް ކުރާ ސަރުކާރެއްގެ އިމޭޖު ދެއްކުމަށް ކުރާ މަސައްކަތައް ވެނެޒުއެލާ އަށް އަސްކަރީ ގޮތުން ބިރުދެއްކުން އިތުރުވަމުން އެ އިމޭޖަށް ވާނީ ކިހިނެއްތޯ ސުވާލު ކުރުމުން ރޫބިއޯ ވިދާޅުވީ، "އެމެރިކާގެ ގައުމީ މަސްލަހަތު ދިފާޢު ކުރުމަށްޓަކައި، ގައުމީ ބާރުގެ ހުރިހާ އުންސުރެއް ބޭނުން ކުރުމުގެ ހައްގު ލިބިގެންވެއެވެ.،" "އަދި އެއީ އެއްވެސް މީހަކަށް ދެކޮޅު ހެދޭނެ ކަމެއް ނޫން،" ކަމަށް ވެސް އޭނާ ވިދާޅުވިއެވެ.
