ބުއްދިވެރި ގޮތަކީ މަދޫރޯ ވެރިކަމުން ދުރުވުން: ޓަރްމްޕް

އެމެރިކާ އާއި ވެނެޒުއެލާއާ ދެމެދު ނުތަނަވަސްކަން އުފެދިފައިވާއިރު، އެންމެ ބުއްދިވެރި ގޮތަކީ ވެނެޒުއެލާގެ ރައީސް ނިކޮލަސް މަދޫރޯ ވެރިކަމުން ދުރުވުން ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ހޯމަ ދުވަހު ޓްރަމްޕް މިހެން ވިދާޅުވެފައިވާއިރު، އެމެރިކާ އިން އަންނަނީ ވެނެޒުއެލާއާ ދެކޮޅަށް ވަރުގަދަ އަސްކަރީ އޮޕަރޭޝަނެއް ކުރިއަށް ގެންދަމުންނެވެ. އެގޮތުން ކެރީބިއަން ކަނޑުގައި އެމެރިކާގެ އަސްކަރިއްޔާގެ ޙަރަކާތްތެރިކަން އިތުރު ކޮށްފައިވާއިރު، އެމެރިކާ އިން އަންނަނީ ވެނެޒުއެލާގެ ކައިރިން ތެޔޮ ޓޭންކަރު ތަކެއް ވެސް ހިފަހައްޓަމުންނެވެ. 

އެގޮތުން އެމެރިކާ އިން ވަނީ މިހާތަނަށް ވެނެޒުއެލާގެ ކައިރިން ތިން ތެޔޮ ޓޭންކަރެއް ހިފަހައްޓައިފަ އެވެ. އެކަމަށް އިޝާރާތް ކުރައްވައި ޓްރަމްޕް ވިދާޅުވެފައި ވަނީ، އެމެރިކާ އިން ހިފަހައްޓާފައިވާ ވެނެޒުއެލާގެ ތެޔޮ ޓޭންކަރުތައް ވިއްކާލުމުގެ ފުރުސަތު އޮތް ކަމަށެވެ. އެހެން ނޫން ނަމަ، އެ ޓޭންކަރުތައް ބަހައްޓާނީ އެމެރިކާގެ ބެލުމުގެ ދަށުގައި ކަމަށް ވެސް އޭނާ ވިދާޅުވި އެވެ. 

އެމެރިކާ އިން ވެނެޒުއެލާއާ ދެކޮޅަށް ހިންގަމުން އަންނަ އޮޕަރޭޝަނަކީ މަސްތުވާ ތަކެއްޗާ ދެކޮޅަށް ކަމަށް ބުނެ ހިންގާ އޮޕަރޭޝަނެކެވެ. ޕެސިފިކް ކަނޑާއި، ކެރީބިއަން ކަނޑުގައި މަސްތުވާ ތަކެތީގެ ވިޔަފާރި ކުރާ ކަމަށް ބުނެ އެމެރިކާ އިން ވަނީ މިހާތަނަށް 20 އުޅަނދަކަށް ހަމަލާ ދީފަ އެވެ. އެމެރިކާ އިން ދީފައިވާ ހަމަލާ ތަކުގައި މިހާތަނަށް 100 މީހަކު މަރުވެފައިވާ ކަމަށް ރިޕޯޓު ކޮށްފައިވާއިރު، އެމެރިކާގެ އެ ހަމަލާ ތަކަކީ ޤާނޫނާ ޚިލާފަށް ދެމުން އަންނަ ހަމަލާ ތަކެއް ކަމަށް ބައިނަލްއަޤުވާމީ މުޖުތަމައުން އަންނަނީ ފާހަގަ ކުރަމުންނެވެ. 

ޓްރަމްޕް ވަނީ އެކި ފަހަރު މަތިން މަދޫރޯ އަށް އިންޒާރު ވެސް ދެއްވައިފަ އެވެ. ވެނެޒުއެލާއާ ދެކޮޅަށް އެމެރިކާ އިން ހިންގަމުން އަންނަ އޮޕަރޭޝަނަކީ އެ ޤައުމުގެ ވެރިކަން ބަދަލު ކުރުމުގެ މަޤުސަދުގައި ކުރިއަށް ގެންދާ ޙަރަކާތެއް ކަމަށް އެ ޤައުމުން ވަނީ ތުހުމަތު ކޮށްފަ އެވެ. އެމެރިކާގެ މަޤުސަދަކީ ވެނެޒުއެލާގެ ވެރިކަން ބަދަލު ކުރުންތޯ ސުވާލު ކުރުމުން ޓްރަމްޕް ވިދާޅުވީ، އެކަން އެހެން ވެސް ވެދާނެ ކަމަށެވެ. އެހެން ނަމަވެސް، ކަންތައް ކުރާނެ ގޮތެއް ނިންމާނީ މަދޫރޯ ކަމަށް ޓްރަމްޕް ވިދާޅުވި އެވެ.

އެކަން ފާހަގަ ކުރައްވައި ޓްރަމްޕް ވިދާޅުވީ މަދޫރޯ ވެރިކަމުން ދުރުވުމަކީ އެންމެ ބުއްދިވެރި ގޮތް ކަމަށެވެ. އެހެން ނަމަވެސް، އެކަމަށް ގޮތެއް ހޯއްދަވާނެ ކަމަށް ޓްރަމްޕް ވިދާޅުވި އެވެ. ޓްރަމްޕް ވިދާޅުވީ "ޓަފް" ގޮތެއްގައި ކަންކަން ކުރަން މަދޫރޯ ބޭނުންވާ ނަމަ، މިއީ މަދޫރޯ އަށް އެގޮތަށް ކަންތައް ކުރެވޭނެ އެންމެ ފަހު ފަހަރު ކަމަަށެވެ. 

އެ ވާހަކަތައް ދައްކަވަމުން ޓްރަމްޕް ވަނީ، ކޮލަމްބިއާގެ ރައީސް ގުސްޓާވޯ ޕެޓްރޯ އަށް ވެސް ފާޑު ވިދާޅުވެފަ އެވެ. ވެނެޒުއެލާއާ ދެކޮޅަށް އެމެރިކާ އިން ހިންގަމުން އަންނަ ކަންތައްތަކާ ގުޅޭ ގޮތުން ޕެޓްރޯ އަންނަނީ އެމެރިކާ އަށް ފާޑު ވިދާޅުވަމުންނެވެ. އެކަމާ ގުޅޭ ގޮތުން ސުވާލު ކުރުމުން ޓްރަމްޕް ވިދާޅުވީ، ޕެޓްރޯ އަކީ އެމެރިކާގެ ރަޙުމަތްތެރިއެއް ނޫން ކަމަށެވެ. އަދި ޕެޓްރޯ އަކީ ވަރަށް ނުބައި މީހެއް ކަމަށާއި، އޭނާ އަކީ ކޮކެއިން އުފައްދައިގެން އެމެރިކާ އަށް އެ ތަކެތި ފޮނުވާ ކަމަށް ވެސް ޓްރަމްޕް ވިދާޅުވި އެވެ. އެހެންކަމުން އޭނާއާ މެދު އިތުރަށް ސަމާލުވާން ޖެހޭ ކަމަށް ވެސް ޓްރަމްޕް ވިދާޅުވެފައިވެ އެވެ. 

އެމެރިކާ އިން ދޭން ފެށި ހަމަލާތަކާ އެކު ޓްރަމްޕް ވަނީ، ވެނެޒުއެލާ އަށް ވަންނަ ތެޔޮ ޓޭންކަރު ތަކާއި، އެ ޤައުމުން ބޭރުވާ ތެޔޮ ޓޭންކަރުތަކާ ދެކޮޅަށް ފިޔަވަޅު އަޅުއްވާނެ ކަމަށް ވިދާޅުވެފަ އެވެ. އެމެރިކާގެ ކޯސްޓު ގާޑުން ވެނެޒުއެލާ ކައިރިން ތިން ޓޭންކަރެއް ހިފަހައްޓާފައިވާއިރު، އެމެރިކާގެ ކަމާ ގުޅުން ހުރި އިދާރާ ތަކުން ވަނީ އެކަމުގެ މަންޒަރު ވެސް އާންމު ކޮށްފަ އެވެ. 

ޓްރަމްޕްގެ މި ވާހަކަތަކަ ގުޅިގެން މަދޫރޯ ވެސް ވަނީ ވާހަކަ ދައްކަވައިފަ އެވެ. ނަމަވެސް، ޓްރަމްޕް އަށް ސީދާ ގޮތެއްގައި ރައްދު ދެއްވުމުގެ ބަދަލުގައި މަދޫރޯ ވިދާޅުވެފައި ވަނީ ކޮންމެ ލީޑަރަކު ވެސް އެ މީހެއްގެ ޤައުމުގެ ކަންކަމަށް ސަމާލުކަން ދޭން ވާނެ ކަމަށެވެ. މަދޫރޯ މިހެން ވިދާޅުވެފައިވާއިރު، އޭނާ އާއި ޓްރަމްޕް ވަނީ މީގެ ކުރިން ފޯނުން ގުޅުއްވައިގެން މަޝްވަރާ ވެސް ކުރައްވައިފަ އެވެ.