ޕެސިފިކްގައި ކަނޑުގައި އެމެރިކާ އިން އަނެއްކާ ވެސް ހަމަލާ އެއް ދީ އިތުރު 5 މީހަކު މަރާލައިފި
ޕެސިފިކް ކަނޑުގައި މަސްތުވާތަކެތީގެ ވިޔަފާރިވެރިންނަށް ތުހުމަތު ކުރެވޭ ފަސް މީހަކު އެމެރިކާ ސިފައިން މަރާލުމުން މި އޮޕަރޭޝަނުން މަރުވި މީހުންގެ އަދަދު 104 އަށް އަރައިފި. ޓްރަމްޕް ސަރުކާރުން ސެޕްޓެމްބަރުން ފެށިގެން ކެރިބިއަން ކަނޑާއި ޕެސިފިކް ކަނޑުގައި މިފަދަ ހަމަލާތައް ދެނީ މަސްތުވާތަކެތީގެ ވިޔަފާރީގައި ބައިވެރިވާ ކަމުގެ އެއްވެސް ހެކިއެއް ނެތި. ކޮންގްރެސްގެ ހުއްދަ ނެތި މި ހަމަލާތައް ދިނުމުން އޮޕަރޭޝަންގެ ގާނޫނީ ހައިސިއްޔަތާ މެދު ސުވާލު އުފެދިފައިވޭ.
ކެރީބިއަން ކަނޑުގައި އޮތް އެއާކްރާފްޓް ކެރިއާ ޔޫއެސްއެސް ޖެރަލްޑް އާރ. ގައި ރޭގަނޑުގެ ވަގުތުގައި ހަނގުރާމަތީ މަތިންދާ ބޯޓުތައް އޮޕަރޭޓް ކުރަނީ - ޑިސެމްބަރު 7، 2025
ބުރާސްފަތި ދުވަހު އިރުމަތީ ޕެސިފިކް ކަނޑުގައި ދެ ބޯޓެއްގައި ތިބި މަސްތުވާތަކެތީގެ ވިޔަފާރިވެރިން ކަމަށް ތުހުމަތު ކުރެވޭ އިތުރު ފަސް މީހަކު މަރާލާފައިވާ ކަމަށް އެމެރިކާ ސިފައިން ހާމަ ކޮށްފި އެވެ.
މިއާ އެކު މަސްތުވާ ތަކެއްޗާ ދެކޮޅަށް އެމެރިކާ އިން ހިންގާ ކަމަށް ބުނާ މި އޮޕަރޭޝަން ގައި ހަމަލާދީ މަރާލި މީހުންގެ އަދަދު 100 އަށް ވުރެ މައްޗަށް ހިނގައްޖެ އެވެ.
ޓްރަމްޕް ސަރުކާރުން ސެޕްޓެމްބަރު މަހުން ފެށިގެން ކެރިބިއަން ކަނޑާއި އިރުމަތީ ޕެސިފިކް ކަނޑުގައި މިފަދަ ހަމަލާތައް ދެމުން ގެންދާ އިރު، އެ ބޯޓުތައް މަސްތުވާތަކެތީގެ ވިޔަފާރީގައި ބައިވެރިވެފައިވާކަމުގެ އެއްވެސް ހެއްކެއް ދައްކާފަ އެއް ނުވެ އެވެ. އެއާއެކު، މި އޮޕަރޭޝަންތަކުގެ ގާނޫނީ ހައިސިއްޔަތާ ބެހޭ ގޮތުން އެތައް ސުވާލެއް ވަނީ އުފެދިފަ އެވެ.
ފަހުގެ ހަމަލާތައް ހިންގާފައިވަނީ "މަސްތުވާތަކެތީގެ ވިޔަފާރީގެ އޮޕަރޭޝަންތަކުގައި ބައިވެރިވެފައިވާ" ބައިނަލްއަގުވާމީ ކަނޑުގައި އޮތް ދެ ބޯޓަކަށް ކަމަށް އެމެރިކާގެ ސައުތު ކޮމާންޑުން އެކްސްގައި ބުނެފައިވެއެވެ.
ފުރަތަމަ ބޯޓުން ތިން މީހަކު މަރުވެފައިވާއިރު، ދެވަނަ ބޯޓުން ދެ މީހަކު މަރުވެފައިވާ ކަމަށް ބުނެފައިވެއެވެ.
ރަސްމީ ޑޭޓާގެ މައްޗަށް ބިނާކޮށް އޭއެފްޕީން ހަދާފައިވާ ތަފާސް ހިސާބުތަކަށް ބަލާއިރު، މި ހަމަލާތަކުން މިހާތަނަށް 104 މީހަކު މަރުވެފައިވެއެވެ.
މަސްތުވާތަކެއްޗާ ދެކޮޅަށް ހިންގާ ކަމަށް ބުނާ އޮޕަރޭޝަނެއް ގައި ސިފައިން ބޭނުންކުރުމާއި، ވެނެޒުއެލާ އަށް އެއްގަމު މަގުން ހަމަލާއެއް ދިނުމުގެ ފުރުސަތު އެބައޮތް ކަމަށް ޓްރަމްޕް ވިދާޅުވުމުން، މި ހަރަކާތްތަކަށް އެމެރިކާގެ ގާނޫނު ހަދާ މަޖިލިސް - ކޮންގްރެސްގެ ހުއްދަ ހޯދަންޖެހޭ ކަމަށް ސުވާލު އުފެދިފައިވެއެވެ.
އެމެރިކާގެ ގާނޫނު ބުނާ ގޮތުން ހަނގުރާމައިގެ އަމަލެއް ގައި އެމެރިކާ އަށް ބައިވެރިވެވޭނީ ކޮންގްރެސް އިން ފާސް ކޮށްގެންނެވެ.
އަނެއްކޮޅުން ކޮންގްރެސް ގެ ހުއްދަ ނެތި ޓްރަމްޕް ސަރުކާރުން ދެމުން މިދާ ހަމަލާތައް ހުއްޓުވުމަށް އިދިކޮޅު ޑިމޮކްރަޓްސް އަށް ނިސްބަތްވާ ހައުސް އޮފް ރެޕްރެޒެންޓޭޓިވްސް އަށް ބުދަ ދުވަހު ހުށަހެޅި ދެ ގަރާރެއް ޓްރަމްޕްގެ ޕާޓީ އަށް ނިސްބަތްވާ މެމްބަރުން ވަނީ މަޖިލިހުން ބޭރު ކޮށްލާފަ އެވެ. .
