ޣައްޒާ އަށާއި ޢަރަބި ތިން ޤައުމަކަށް ދެމުންގެންދާ ހަމަލާތައް ހުއްޓާނުލާނެ ކަމަށް އިޒްރޭލުގެ ހަނގުރާމަ އާ ބެހޭ ވަޒީރު ވަޢުދުވެއްޖެ

ޣައްޒާ އަށާއި ޢަރަބި ތިން ޤައުމަކަށް ދެމުންގެންދާ ހަމަލާތައް ހުއްޓާނުލާނެ ކަމަށް އިޒްރޭލުގެ ހަނގުރާމަ އާ ބެހޭ ވަޒީރު ވަޢުދުވެއްޖެ އެވެ.

އިޒްރޭލުގެ މިނިސްޓަރ އޮފް މިލިޓަރީ އެފެއަރޒް  އިޒްރޭލް ކަޓްޒް ވަނީ، ސަރަހައްދުގައި އަސްކަރީ ހަމަލާތައް ކުރިއަށް ގެންދާނެ ކަމަށް ބުނެފަ އެވެ. ހަމަލާ ދޭނެ ކަމަށް ބުނި ތަންތަނުގެ ތެރޭގައި ޣައްޒާ ވެސް ހިމެނެ އެވެ.

ޣައްޒާ އަކީ ޢާންމު ރައްޔިތުންނަށް ބޮޑެތި ގެއްލުންތަކެއް ލިބި، ކާނާ އަދި ބޭސް ނުލިބި އިޒްރޭލުގެ ހިސޯރު ގެ ދަށުގައި ހިތާމަވެރި އިންސާނިއްޔަތާ ޚިލާފު ކާރިސާ އެއް ކުރިމަތިވެފައިވާ ތަނެކެވެ.

ހިބްރޫ ބަހުން ނެރޭ ދުވަހު ނޫސް 'މާރީވް' އިން ކަޓްޒް އާ ހަވާލާދީ ބުދަ ދުވަހު ރިޕޯޓްކޮށްފައިވާ ގޮތުގައި، އިޒްރޭލުގެ ވައިގެ ސިފައިންގެ ޕައިލެޓުންނަށް ހިންގި ތަމްރީނު ކޯހެއްގައި ވާހަކަ ދައްކަމުން އޭނާ ވަނީ، އިޒްރޭލުން "ލުބްނާން، ސީރިއާ، ޣައްޒާ ސިޓީ އަދި ޔަމަންގައި އެމީހުންގެ އޮޕަރޭޝަންތައް ކުރިއަށް ގެންދާނެ" ކަމަށް ބުނެފައެވެ. މި ރަސްމިއްޔާތުގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި ޗީފް އޮފް ސްޓާފް ލެފްޓިނަންޓް ޖެނެރަލް އަޔާލް ޒަމީރު ވެސް ބައިވެރިވިއެވެ.

އޭނާ އިތުރަށް ބުނީ، "ލުބްނާން ގައި، ހިޒްބުﷲ އާ ދެކޮޅަށް ބާރަށް ހަރަކާތްތެރިވަމުން ގެންދާނަން؛ ކަމަށާއި ސީރިއާގައި، ޖަބަލް އަލް-ޝެއިޚް ސަރަހައްދުންނާއި ސެކިއުރިޓީ ޒޯން ކިޔާ ސަރަހައްދުން އިޒްރޭލު ފަހަތައް ނުޖެހޭނެ ކަމަށެވެ. އަދި ޣައްޒާ ސިޓީގައި، ޙަމާސް ނައްތާލައި އެ ސަރަހައްދު ހަތިޔާރު ނެތް ސަރަހައްދަކަށް ހެދުމަށް އިޒްރޭލުން ކަނޑައަޅާފައި ކަަމަށް އޭނާ ބުންޏެވެ.

އިޒްރޭލުގެ ހަނގުރާމައިގެ ވަޒީރު ފާހަގަކުރި ގޮތުގައި، އަންސާރުﷲ ވެރިކަންކުރާ ޔަމަނުގެ ސަރުކާރުގެ ގާބިލުކަން ވަރުގަދަވިޔަ ނުދިނުމަށްޓަކައި، އިޒްރޭލު ސަރުކާރުން ޔަމަނަށް ދެމުންގެންދާ ހަމަލާތައް ހުއްޓާނުލާނެ ކަމަށެވެ.

ކަޓްޒް ވަނީ މިދިޔަ ޖޫން މަހު، އީރާނާ ދެކޮޅަށް 12 ދުވަހުގެ މުއްދަތެއް ގައި ދެވުނު އަނިޔާވެރި ހަމަލާތަކަށް އިޝާރާތް ކޮށް، އެމެރިކާ އާ ގުޅިގެން އިޒްރޭލުން "އީރާނުގެ ނިއުކްލިއަރ އަދި ސްޓްރެޓީޖިކް ގާބިލިއްޔަތައް އަމާޒު ކޮށް ބޮޑެތި ގެއްލުންތަކެއް ދިން" ކަމަށް ދަޢުވާކޮށްފަ އެވެ.

އިޒްރޭލުގެ އަސްކަރިއްޔާ އިން 2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާގައި ހިންގި ނަސްލު ނައްތާލުމުގެ ހަނގުރާމައިގައި މަދުވެގެން 70,942 ފަލަސްތީނު ރައްޔިތުން މަރާލާފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި 171,195 މީހުން ވަނީ ޒަޚަމްވެފަ އެވެ.

އޮކްޓޯބަރު 10 ގައި ޣައްޒާ ހަނގުރާމަ ހުއްޓާލުމުގެ އެއްބަސްވުމެއް ޤާއިމުވި ނަމަވެސް، އިޒްރޭލުން އެއްބަސްވުމާ އެއްގޮތަށް ޢަމަލުކޮށްފައެއް ނުވެއެވެ. އެއްބަސްވެފައިވާ މިންވަރަށް އެހީގެ ކާނާ އާއި ބޭސް ސާމާނު ބަރުކޮށްފައިވާ އުޅަނދުތައް ޣައްޒާ އަށް ވަނުމަށް ހުރަސް އަޅަމުން ދިއުމުގެ ސަބަބުން، ޣައްޒާ ގައި ދިގުދެމިގެންދާ ނުރައްކާތެރި ސިއްޙީ ކާރިސާ" އެއްގެ ގޮތުގައި ސިފަކޮށްފައިވާ ހާލަތު ވަނީ އިތުރަށް ގޯސްވެފައެވެ.