ސެޕްޓެމްބަރު 15 ގައި މިނިވަން މުއައްސަސާތަކުގެ ކޮމިޓީގައި ހިނގި ހަމަނުޖެހުމުގައި ހުސައިން އިމްރާން، ހުސައިން ސަމީރު އަދި މައުރޫފު ޒާކިރު ހިމެނޭ މައްސަލައިގައި ގެއްލުންވި މައިކްރޮފޯނުގެ އަގު 24،413 ރުފިޔާއަށް އަރާކަން ކަނޑައަޅާފައިވޭ.
މީޑިއާ ރެގިއުލޭޓް ކުރުމުގެ ބިލް ފާސް ކުރުމަށް ސެޕްޓެމްބަރު 15، 2025 ގައި ބޭއްވި މިނިވަން މުއައްސަސާތަކާ ބެހޭ ކޮމިޓީގެ ބައްދަލުވުމުގައި ހިނގި ހަމަނުޖެހުމުގެ ތެރެއިން.
ރައްޔިތުންގެ މަޖިލީހުގެ މައިކްރޯފޯނަށް ގެއްލުން ދިން މައްސަލައެއް ގައި ބަދަލު ނެގުމުގެ ގޮތުން ތިން މެމްބަރުންގެ މުސާރައިން 8 ހާހަށް ވުރެ ގިނަ ރުފިޔާ އުނިކޮށްފި އެވެ.
ޑިސެމްބަރު މަހުގެ މަޖިލިހުގެ އިދާރާ އިން ފޮނުވި މުސާރަ ސްލިޕް ގައި އެ މެމްބަރުންގެ މުސާރައިން 8،134ރ. އުނިކޮށްފައިވާކަން މި ނޫހަށް ވަނީ ކަށަވަރު ކުރެވިފަ އެވެ.
މެމްބަރުން ޖުރިމަނާ ކުރާ ގޮތަށް ނިންމީ މަޖިލީހުގެ އިމްތިޔާޒާއި ސުލޫކީ ކޮމިޓީން ކަމަށް ކުރިން ވަނީ ރިޕޯޓު ކޮށްފަ އެވެ.
ރައްޔިތުންގެ މަޖިލީހުގައި ހިނގި ހަމަނުޖެހުންތަކެއްގައި މައިކްރޮފޯން ސިސްޓަމަށް ގެއްލުން ދިން ވަކި ދެ މައްސަލަ އެއް ގައި މަޖިލީހުން ވަނީ އެ ކަމުގައި ޝާމިލުވި ކަމަށް ތުހުމަތު ކުރެވޭ މެމްބަރުންގެ އަތުން ޖުމްލަ 28,253.92 ރުފިޔާ ނެގުމަށް ނިންމާފައެވެ.
މި ދެ މައްސަލައިގެ ތެރެއިން އެއް މައްސަލަ ހިނގާފައިވަނީ މީޑިއާ ބިލާ ގުޅޭ ކޮމިޓީ ބައްދަލުވުމެއްގައެވެ. އަނެއް މައްސަލަ ހިނގާފައިވަނީ މަޖިލީހުގެ ޖަލްސާއެއް ގައި ހޫނު ބަހުސެއް ކުރިއަށް ދަނިކޮށެވެ.
ފުރަތަމަ މައްސަލައިގައި ހިމެނޭ މެމްބަރުންގެ މުސާރައިން ފައިސާ ކެނޑިކަން ކަށަވަރު ކުރެވިފައިވާ އިރު އެ މައްސަލަ އަކީ، ސެޕްޓެންބަރު 15 ގައި މިނިވަން މުއައްސަސާތަކުގެ ކޮމިޓީގައި ހިނގި ހަމަނުޖެހުމަކާ ގުޅޭ މައްސަލަ އެކެވެ. މައްސަލަ ހިނގީ ޝަކުވާ ބޮޑުވި މީޑިއާ ބިލު ފާސްކުރުމަށް އުޅުމުންނެވެ. މަޖިލީހުގެ އިމްތިޔާޒުތަކާއި ސުލޫކީ ކޮމިޓީން ބުނެފައިވާ ގޮތުގައި، މައިކްރޮފޯނަށް ގެއްލުންވީި ހެންވޭރު ދެކުނު ދާއިރާގެ މެންބަރު ހުސައިން އިމްރާން ލަތީފު (ޕީއެންސީ)، ތޮއްޑޫ ދާއިރާގެ މެންބަރު ހުސައިން ސަމީރު (އެމްޑީޕީ)، އަދި ކެންދޫ ދާއިރާގެ މެންބަރު މައުރޫފު ޒާކިރު (އެމްޑީޕީ) ގެ މެދުގައި ހިނގި ހަމަނުޖެހުމުގަ އެވެ. އަދި އެ މެމްބަރުންގެ އަތުން ބަދަލު ހޯދުމަށް ކޮމިޓީން ނިންމާފައިވެއެވެ.
މަޖިލީހުގެ ކޮމިޓީން ވަނީ މި މައިކްރޯފޯނުގެ އަގު 24,413.92 ރުފިޔާއަށް އަރާކަން ކަނޑައަޅާފައެވެ. މި ތިން މެމްބަރުން ޖޫރިމަނާކުރުމަށް ކޮމިޓީ އަށް ހުށަހެޅީ މަޑަވެލި ދާއިރާގެ މެންބަރު މުހައްމަދު ޝަމީޒު (ޕީއެންސީ) އެވެ. މިގޮތަށް ހުށަހެޅުމަށް ކިނބިދޫ ދާއިރާގެ މެންބަރު އަލީ އަޝްރަގު (ޕީއެންސީ) ތާއީދުކުރެއްވިއިރު، މެންބަރު ހުސައިން ނާސިހް ވެސް ހިމެނޭ ގޮތަށް ކޮމިޓީގެ ހުރިހާ މެންބަރުންގެ އިއްތިފާގުން މި ނިންމުން ފާސްކުރިއެވެ.
ދެވަނަ މައްސަލަ ހިނގާފައިވަނީ އޮކްޓޯބަރު މަހުގެ 22 ވީ ބުދަ ދުވަހު ބޭއްވި މަޖިލީހުގެ ޖަލްސާއެއްގަ އެވެ. މި މައްސަލާގައި ގެއްލުން ލިބިފައިވަނީ ޕީއެންސީ ޕާލިމެންޓަރީ ގްރޫޕްގެ ލީޑަރު އިބްރާހިމް ފަލާހުގެ މޭޒުގައި ހުރި މައިކްރޯފޯނަށެވެ. މި ހާދިސާ ހިނގާފައިވަނީ އިސްލާމީ ކަންތައްތަކާ ބެހޭ ވަޒީރު، އައްޑޫގައި ހިންގާ މަޝްރޫޢުތަކެއްގެ މަސައްކަތް ލަސްވެފައިވާ މައްސަލައާ ބެހޭގޮތުން ދެއްކެވި ވާހަކަތަކަކާ ގުޅިގެން ފަލާހާއި ހުޅުމާލެ ދެކުނު ދާއިރާގެ މެންބަރު ޑރ. އަހްމަދު ޝަމްހީދު (އެމްޑީޕީ) އާ ދެމެދު ހޫނު ބަހުސެއް ހިނގަމުން ދަނިކޮށެވެ.
މި މައްސަލާގައި ފަލާހާއި ޝަމްހީދު އާ ދެމެދުގައި ހިނގާފައިވާ ކަންކަން ތަހުގީގުކޮށް، އެކަށީގެންވާ ފިޔަވަޅު އެޅުމަށް ހިތަދޫ މެދު ދާއިރާގެ މެންބަރު އަހްމަދު އާޒާން މަރުޒޫގު (ޕީއެންސީ) ހުށަހެޅުއްވިއެވެ. މި ހުށަހެޅުމަށް ކިނބިދޫ ދާއިރާގެ މެންބަރު އަލީ އަޝްރަގު ތާއީދުކުރެއްވިއިރު، މާވަށު ދާއިރާގެ މެންބަރު އަހްމަދު ޝާކިރު (އެމްޑީޕީ) ދެކޮޅު ހެއްދެވިއެވެ. ޝާކިރު ދެކޮޅު ހެއްދެވީ، މަޖިލީހުގެ އިދާރާއިން ކޮމިޓީއަށް ފޮނުވާފައިވާ ސިޓީގައި މިކަމުގެ ޒިންމާވާ ފަރާތް ފާހަގަކޮށްފައިވާ ކަމަށް ވިދާޅުވަމުންނެވެ. ނަމަވެސް އެ މެމްބަރު ވަކި ފަރާތެއްގެ ނަން ހާމައެއް ނުކުރައްވައެވެ. އެހެން ނަމަވެސް ކޮމިޓީން ނިންމި ކަމަށް އެނގިފައިވަނީ މި މައްސަލައިގައި ޑރ. އަހްމަދު ޝަމްހީދު 3،000ރ. ގެ ބަދަލު ހޯދުމަށެވެ.
މި ދެވަނަ މައްސަލާގައި މައިކްރޯފޯނުގެ އަގު ކަމަށް ކަނޑައަޅާފައިވަނީ 3,840 ރުފިޔާ އެވެ. މި މައްސަލައިގައި ޝާމިލުވި މެމްބަރު ޖުރިމަނާ ކުރި ކަމެއް އަދި ކަށަވަރު ކުރެވިފައެއް ނުވެ އެވެ.
ރައްޔިތުންގެ މަޖިލީހުގެ ޖަލްސާތަކާއި ކޮމިޓީ ބައްދަލުވުން ތަކުގައި މައިކްރޮފޯނަށާއި މަޖިލީހުގެ ތަކެއްޗަށް ގެއްލުން ދިނުމަކީ އައު ކަމެއް ނޫނެވެ. 2013 ވަނަ އަހަރުގެ ސެޕްޓެމްބަރު މަހު، އޭރުގެ މަޖިލީހުގެ ރައީސް ޢަބްދުﷲ ޝާހިދު ގެ ގެ މޭޒުކޮޅު މަތީގައި ހުރި މައިކްރޯފޯނުގެ ކޭބަލް ކަނޑާލުމާ ގުޅިގެން، ރައްޔިތުންގެ މަޖިލީހުގެ ޖަލްސާއެއް ކެންސަލް ކުރެވުނު ފާހަގަކުރެވެ އެވެ. މިއީ، ޕްރޮގްރެސިވް ޕާޓީ އޮފް މޯލްޑިވްސް (ޕީ.ޕީ.އެމް) އާއި ޖުމްހޫރީ ޕާޓީ (ޖޭ.ޕީ) ގެ މެންބަރުން، މަޖިލީހުގެ ޖަލްސާ ކުރިއަށް ގެންދިއުމަށް ހުރަސްއެޅުމަށް ކުރި މަސައްކަތެއްގެ ތެރެއިން ހިނގާފައިވާ ކަމެކެވެ. ފަހުން ނެރެވުނު ރިޕޯޓުތަކުން ދައްކާގޮތުގައި، މި ހަމަނުޖެހުންތަކުގެ ތެރޭގައި މަޖިލީސް ތެރޭގައި ހުރި ކޮމްޕިއުޓަރ ސިސްޓަމްތަކާއި، ކެމެރާތަކާއި، ކޭބަލްތައް ވެސް ވަނީ ތޫނު އެއްޗެހި ބޭނުންކޮށްގެން ހަލާކުކޮށްފައެވެ.
