މައުރޫފް ހައްޔަރުކޮށް މުއްދަތު ޖެހީ ޤާނޫނާއި ޚިލާފަށް، މިއީ އަސާސީ ހައްގުތަކަށް އަރައިގަތުން : ނިޝާން

މަސްވެރިން ގެ އިހުތިޖާޖުން ހައްޔަރު ކުރި މައުރޫފް ޒާކިރު ހައްޔަރުކޮށް މުއްދަތު ޖެހީ ޤާނޫނާއި ޚިލާފަށް ކަމަށާއި މިއީ އަސާސީ ހައްގުތަކަށް އަރައިގަތުން ކަމަށް އޭނާ ގެ ޤާނޫނީ ވަކީލް މުހައްމަދު ނިޝާން އިބްރާހިމް ވިދާޅުވެއްޖެ އެވެ.

ނިޝާން އެފަދައިން ވިދާޅުވީ ހޮނިހިރު ދުވަހުގެ ރޭ އެމްޑީޕީގެ ހަރުގެ ޖަލްސާގައި ވާހަކަ ދައްކަވަމުންނެވެ. ރާއްޖޭގެ ޤާނޫނުއަސާސީގައި ބުނާ ގޮތުން މީހަކު ހައްޔަރު ކުރާތާ 24 ގަޑި އިރު ތެރޭގައި ބަންދުގެ މުއްދަތު ޖަހަން ޖެހޭކަން ސާފުކޮށް ސުވާލެއް ނުއުފެދޭ މިންވަރަށް ބަޔާންކޮށްފައިވާ ކަމަށް ނިޝާން ވިދާޅުވި އެވެ.

Advertisement

މައުރޫފް ހައްޔަރު ކުރީ ބުރާސްފަތި ދުވަހު 12:24 ގައި ކަމަށާއި އޭނާ ގެ ބަންދުގެ މުއްދަތު ޖެހުމަށް ކޯޓަށް ހާޒިރުކޮށްފައި ވަނީ ހުކުރު ދުވަހުގެ 2 ޖެހި ފަހުން ކަމަށް ނިޝާން ވިދާޅުވި އެވެ. އެހެންކަމުން އޭނާ އާއި މެދު އަމަލުކުރީ ގާނޫނީ އިޖުރާއަތު ތަކާއި އެއްގޮތަށް ކަަމަށް ނުބެލެވޭ ކަމަށް ނިޝާން ވިދާޅުވި އެވެ.

ބޮޑު ކަންނެލި ޔޫނިއަން އިން ބޭއްވި އިވެންޓެއްގެ ތެރެއިން މައުރޫފް ހައްޔަރު ކުރި މައްސަލައިގައި އޭނާ ގެ މައްޗަށް ކުރާ ތުހުމަތުތަކާއި މެދު ސުވާލު އުފެދޭ ކަމަށް ނިޝާން ވިދާޅުވި އެވެ. އެގޮތުން މައުރޫފް ގެ ކުށެއް ކުރުމުގެ ނިޔަތް އޮތުމާއި، ކުށެއް ކުރުމަށް ވާގިވެރިވުމާއި، ކުށެއް ކުރުމަށް ހިތްވަރު ދިނުމަށް ރިއާޔަތްކޮށް މައުރޫފް ގެ މައްޗަށް ތުހުމަތު ކުރަމުންދާކަން ނިޝާން ފާހަގަކުރެއްވި އެވެ.

މި މައްސަލައިގައި މެންބަރު މައުރޫފް އަށް ފުލުހުން ކުރާ ތުހުމަތުތަކަކީ ކަނޑު ދަތުރުފަތުރު ކުރުމަށް ހުރަސްއެޅުމާއި، ކޯސްޓް ގާޑް އުޅަނދަށް ގެއްލުން ދިނުމުގެ ތުހުމަތު ގެ އިތުރުން ފުލުހުންގެ ވާޖިބު އަދާކުރުމަށް ހުރަސްއެޅުމުގެ ތުހުމަތެވެ. މައްސަލައިގައި ލިބިފައިވާ ހެކީ ގެ ގޮތުގައި ބަޔާން ކޮށްފައި ވަނީ ހަމަ އެކަނި ފުލުހުން ދީފައިވާ ބަޔާން ތަކެވެ. އިތުރު ހެއްކެއް ހުށަހަޅާފަ އެއް ނުވެ އެވެ.

ނިޝާން ވިދާޅުވީ މައުރޫފް ގެ މައްޗަށް ކުރާ ތުހުމަތުތަކުގެ ޤާނޫނީ އެއްވެސް ބުރަދަނެއް ނެތް ކަމަށެވެ. 

"އަޅުގަނޑު ސިފައިންނާއި ފުލުހުންނަށް ބަދު ބަހެއް ބުނަނީ އެއް ނޫން. އެ ބޭފުޅުން ކުރިކަމެއްގެ ސަބަބުން ނެރު ބަންދު ވީ. މައުރޫފް ކުރެއްވި ކަމަކުންނެއް ނޫން." ނިޝާން ވިދާޅުވި އެވެ.

ބޮޑު ކަންނެލީގެ މަސްވެރިން ކުރަމުން ގެންދާ ސުލްހަވެރި މުޒާހަރާގެ ތެރެއިން ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު ހައްޔަރުކުރުމުން އެކަމަށް ވަރަށް ބޮޑަށް ފާޑުކިޔުން އަމާޒުވި އެވެ. އޭނާ ހައްޔަރު ކުރީ މެމްބަރުންނަށް ލިބޭ އިމްތިޔާޒްތަކާއި ވެސް ޚިލާފަށެވެ. މައުރޫފް ދޫކޮށްލީ އޭނާ ހައްޔަރު ކުރިތާ 3 ދުވަސް ފަހުން ހޮނިހިރު ދުވަހުގެ ރޭ 09:17 ގަ އެވެ.