ބޯހިޔާވަހި ކަމަށް ޚާއްސަ ކުރި އަހަރު، ބަޖެޓުން އެއްވެސް ރައްޔިތަކަށް ބޯހިޔާވަހިކަން ލިބިފައިވޭތޯ ރައްޔިތުން ބަލަން ޖެހޭ: އެމްޑީޕީ
އެމްޑީޕީން ބޭއްވި ނޫސްވެރިންގެ ބައްދަލުވުމުގައި މި ސަރުކާރުގެ ސިޔާސަތުތަކަށް ވަނީ ވަރަށް ބޮޑަށް ފާޑު ކިޔާފަ. ހުރިހާ ކަމެއްގައި ވެސް ރައްޔިތުންނަށް އޮޅުވާލުމަށް މަސައްކަތް ކުރާ ކަމަށާއި، ފާޅުކަން ބޮޑު ގޮތެއްގައި ވަޒީރުން ވެސް ދޮގު ހައްދަވާ ކަމަށް ބުނެފައިވޭ. އަދި ހަމައެކަނި މި އަހަރަށް ބެލުމަށްފަހު ވެސް މި ސަރުކާރަށް ނޫނެކޭ ރައްޔިތުން ބުނަން ޖެހޭ ކަަމަށް އެމްޑީޕީން ބުނޭ.
ހޯމަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވާހަކަ ދައްކަވަނީ
ބޯހިޔާވަހިކަމަށް ޚާއްސަ ކުރި އަހަރު، ފާއިތުވެދިޔަ އިރު ބަޖެޓުން އެއްވެސް ރައްޔިތަކަށް ބޯހިޔާވަހިކަން ލިބިފައިވޭތޯ ރައްޔިތުން ބަލަން ޖެހޭ ކަމަށާއި، ރައީސް ޑރ.މުހައްމަދު މުއިއްޒު ސަރުކާރުގެ ކުރަމުންދާ މަސައްކަތްތަކާ މެދު ސުވާލު އުފައްދަން ޖެހޭ ކަމަށް އެމްޑީޕީން ބުނެފި އެވެ.
ހޯމަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި މިސަރުކާރުގެ ސިޔާސަތުތަކަށް ވަނީ ވަރަށް ބޮޑަށް ފާޑު ކިޔާފަ އެވެ. ހުރިހާ ކަމެއްގައި ވެސް ރައްޔިތުންނަށް އޮޅުވާލުމަށް މަސައްކަތް ކުރާ ކަމަށާއި، ފާޅުކަން ބޮޑު ގޮތެއްގައި ވަޒީރުން ވެސް ދޮގު ހައްދަވާ ކަމަށް ބުނެފައިވެ އެވެ. ރިޔާސީ އިންތިޚާބުގެ ކެންޕޭން އަދި ރައްޔިތުން މަޖިލީހުގެ ކެންޕޭންގައި ރައީސް މުއިއްޒު ވެވަޑައިގެންނެވި ވައުދުތައް ނުފުއްދަވާ ކަމަށާއި، ކުރިއަށް އޮތް ކައުންސިލް އިންތިޚާބާ ދިމާކޮށް ވެސް ގިނަ ވައުދުތައް ވެވަޑައިގަންނަވާނެ ކަމަށް އެމްޑީޕީން ބުނެ އެވެ.
މި ނޫސްވެރިންގެ ބައްދަލުވުމުގައި ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވަނީ މިފަހުން ރައީސް މުއިއްޒު މާލެ ސިޓީގެ ރައްޔިތުންނާ އެކު ބޭއްވެވި ބައްދަލު ކުރެއްވުންތަކަށް އަލިއަޅުއްވާލައްވާ ވާހަކަ ދައްކަވާފަ އެވެ.
މި ބައްދަލު ކުރެއްވުންތަކުގައި އެންމެ ގިނަ ރައްޔިތުން ކަންބޮޑުވުން ފާޅު ކޮށްފައިވަނީ ބޯހިޔާވަހިކަމާ ގުޅޭގޮތުން ކަމަށް މެންބަރު މައުރޫފް ވިދާޅުވި އެވެ. ހުރިހާ ބައްދަލު ކުރެއްވުމެއްގައި ރައީސް މުއިއްޒު ދެއްވީ ވަރަށް ޖެނަރަލް ޖަވާބެއް ކަމަށެވެ. އަދި ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ބޯހިޔާވަހި ކަމަށް ފަށާފައިވާ މަޝްރޫއުތައް ކުރިއަށް ގެންގޮސްދިނުމަށް ރައްޔިތުން އެދުމުން އެކަން ކޮށްދެއްވާނެ ކަމަށް ރައީސް މުއިއްޒު ވިދާޅުވި ނަމަވެސް އެގޮތަށް އެކަން ނުކުރައްވާ ކަމަށް މެންބަރު މައުރޫފް ވިދާޅުވި އެވެ.
މެންބަރު މައުރޫފް ވިދާޅުވީ ރައީސް މުއިއްޒު ރައްޔިތުންނާ ބައްދަލު ކުރައްވަނީ ހެޔޮ ނިޔަތެއް އޮވެގެން ނޫން ކަމަށާއި، އެއީ ރައްޔިތުން މޮޔަ ހެއްދުމުގެ ގޮތުން ކުރާ ކަމެއް ކަމަށެވެ.
ބޯހިޔާވަހިކަމުގެ ކަންބޮޑުވުންތައް ހިއްސާކުރީމަ މިދިޔަ ސަރުކާރުން ބޯހިޔާވަހިކަމަށް ފަށާފައިވާ މަޝްރޫއުތައް ކުރިއަށް ގެންގޮސްދިނުމަށް އެދުމުން އެކަން އެގޮތަށް ކޮށްދެއްވާނެ ކަމަށް ވިދާޅުވެ އަނެއް ދުވަހު އެކަން ކުރަން ކަނޑައަޅާފައި ހުންނަ ބިންތައް ބޮޑު އަގުގައި ބޭރުގެ ކުންފުނިތަކަށް ވިއްކާލާ މަންޒަރު އަޅުގަނޑުމެންނަށް މިފެންނަނީ. ރައީސް މުއިއްޒަކީ ހަގީގަތުގައި ރައްޔިތުންނަށް މަލާމަތް ކުރައްވާ ރައްޔިތުންނަށް ހެޔޮ އެދި ވަޑައިގަންނަވާ ބޭފުޅެއް ނޫނޭ. އަބަދުވެސް ރައްޔިތުންނަށް ޖޯކު ޖައްސަވަނީ. ރައީސް މުއިއްޒު ހީ ކުރައްވަނީ ދިވެހި ރައްޔިތުންނަކީ ބޭނުންއިރަކު ބޭނުން ގޮތަކަށް މޮޔަ ހައްދައިގެން ގެންގުޅެވޭނެ ބައެއް ކަމަށް.ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު
ކުރިއަށް އޮތް ލޯކަލް ކައުންސިލް އިންތިޚާބަށް އިޝާރާތް ކުރައްވައި މެންބަރު މައުރޫފް ވިދާޅުވީ ކުރިއެކޭ އެއްގޮތަށް މިފަހަރު ވެސް ރައީސް މުއިއްޒު ވަރަށް ގިނަ ވައުދުތައް ވެވަޑައިގަންނަވާނެ ކަމަށެވެ. ނަމަވެސް މިފަހަރު ރައްޔިތުން ވަރަށް ބޮޑަށް ހޭލަން ޖެހޭ ކަމަށާއި، އެ ދޮގު ތަކުގައި ޖެހިގެން ނުވާނެ ކަމަށެވެ.
ހަމައެކަނި މި އަހަރަށް ބެލުމަށްފަހު ވެސް މި ސަރުކާރަށް ނޫނެކޭ ރައްޔިތުން ބުނަން ޖެހޭ ކަމަށާއި، މިއީ ބޯހިޔާވަހިކަމުގެ އަހަރަށް ވާއިރު، ރައީސް މުއިއްޒުގެ ސަރުކާރުގެ މިހާތަނަށް އެންމެ ގައު ބުރިއެއް ވެސް ނުބޭއްވޭ ކަމަށް މެންބަރު މައުރޫފް ވިދާޅުވި އެވެ. މި ސަރުކާރުގައި ރައްޔިތަކަށް ލިބުނު ބޯހިޔާވަހިކަމަކާ ގުޅޭގޮތުން ރައްޔިތުން ސުވާލު އުފައްދަން ޖެހޭ ކަމަށް އޭނާ ވިދާޅުވި އެވެ.
