ސަރުކާރުން ލޯކަލް ކައުންސިލްތަކު ގެ ގާނޫނަށް ގެނައި އިސްލާހުތަކު ގެ ސަބަބުން މި ފަހަރުގެ ކައުންސިލް އިންތިހާބުގައި 550 ގޮނޑި މަދުވާނެ ކަމަށް އިލެކްޝަންސް ކޮމިޝަނުން ބުނެފި އެވެ. ދެހާސް މީހުންނަށް ވުރެ ދަށް އާބާދީތަކުގައި ތިން ކައުންސިލަރުން ހޮވާ އިރު، އަންހެން ކައުންސިލަރުން ހޮވުން މިހާރު ލާޒިމުވާނެ އެވެ. އަންނަ އެޕްރީލް 4 ގައި ބާއްވާ އިންތިހާބުގައި އަތޮޅު ކައުންސިލް އުވިގެންދާނެ އެވެ.
ކައުންސިލް އިންތިހާބެއް ގައި ވޯޓުލުން ކުރިއަށް ގެންދަނީ.
މިފަހަރުގެ ލޯކަލް ކައުންސިލް އިންތިހާބު ގައި 550 ގޮނޑި މަދު ވާނެ ކަމަށް އިލްކެޝަންސް ކޮމިޝަން އިން ބުނެފި އެވެ.
އިލްކެޝަންސް ކޮމިޝަން އިން މައުލޫމާތު ދިން ގޮތުގައި މި ފަހަރު ގޮނޑި މަދު ވަނީ ލޯކަލް ކައުންސިލްތަކުގެ ގާނޫނަށް ސަރުކާރުން ގެނައި ބަދަލުތަކުގެ ސަބަބުން ކަމުގައި އެވެ.
ސަރުކާރު ހިންގާ ޕީއެންސީގެ ޕީޖީ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހު މަޖިލީހަށް ހުށަހެޅި އިސްލާހު ފާސްކޮށް، ތަސްދީގުކޮށްފައި ވާއިރު އޭގައިވާ ގޮތުން 2،000 މީހުންނަށް ވުރެ ދަށް އާބާދީތަކަށް ދެން ހޮވާނީ ތިން ކައުންސިލަރުންނެވެ. މި އިސްްލާހު ގެނައުމުގެ ކުރިން އޮންނަ ގޮތުން 3،000 އަށް ވުރެ މަދު އާބާދީތަކަށް ފަސް ކައުންސިލަރުން އަދި އެއަށް ވުރެ ގިނަ އާބާދީތަކަށް ހަތް ކައުންސިލަރުން ހޮވަން ޖެހެ އެވެ.
އަދި ތިން ކައުންސިލަރުން ހޮވާ ކައުންސިލްތަކަށް އަންހެން ކައުންސިލަރެއް އަދި ފަސް ކައުންސިލަރުން ހޮވާ ކައުންސިލްތަކަށް އަންހެން ދެ ކައުންސިލަރުން ހޮވުން މިހާރު ލާޒިމު ވާނެ އެވެ.
އަންނަ އެޕްރީލް މަހުގެ ހަތަރު ވަނަ ދުވަހު ކައުންސިލް އިންތިހާބު ބާއްވަން ނިންމި އިރު މި ފަހަރު ގެ އިންތިހާބު ގައި އަތޮޅު ކައުންސިލް ގެ ރައީސް އިންތިހާބު ކުރުމެއް ނޯންނާނެ އެވެ. ކައުންސިލް އިންތިހާބުގެ ގާނޫނަށް ގެނެސްފައިވާ އިސްލާހު ރައީސް މުއިއްޒު ތަސްދީގު ކުރެއްވުމާ އެކު ދެން ބާއްވާ ކައުންސިލް އިންތިހާބާއެކު އަތޮޅު ކައުންސިލު އުވިގެންދާނެ އެވެ.
ކައުންސިލް އިންތިޚާބު ބާއްވަން ތައްޔާރުވަމުން އަންނައިރު، ކައުންސިލްތަކަށް ބައެއް ބަދަލުތައް ގެނެސްފައިވެ އެވެ. އެގޮތުން، ސަރުކާރުގެ ސާފު އަޣުލަބިއްޔަތު އޮންނަ ރައްޔިތުންގެ މަޖިލީހުން ވަނީ އަތޮޅު ކައުންސިލްތައް އުވާލުމަށާއި، އާބާދީ ކުޑަ ރަށްރަށުގައި ތިބޭ ކައުންސިލަރުން މަދުކުރުމަށް ފާސްކޮށް، ގާނޫނުއަސާސީއާއި ކަމާ ގުޅުންހުރި ގާނޫނުތައް އިސްލާހުކޮށްފަ އެވެ.
