މެންބަރު މައުރޫފް ވިދާޅުވީ ރައީސް މުއިއްޒަކީ ރައްޔިތުންނަށް ހެޔޮ އެދިގެން ކަންކަން ކޮށްދެއްވާ ޒާތުގެ ރައީސެއް ނޫން ކަމަށާއި ވައުދުތައް ފުއްދަވާނެ ކަމަށް ރައްޔިތުން އުންމީދު ކޮށްގެން ނުވާނެ ކަމަށް.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުޅުމާލޭގެ ފޭސް 2ގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަނީ
ރައީސް ޑރ.މުހައްމަދު މުއިއްޒު މާލެސިޓީގައި ރައްޔިތުންނާއެކު ބައްދަލުވުންތަކެއް ބޭއްވެވީ ކުރިއަށް އޮތް ލޯކަލް ކައުންސިލް އިންތިޚާބުގައި މާލޭގައި މަގުމަތީގައި ހިނގާލާ އުޅުމުގެ ފުރުސަތު ހޯދުމުގެ ގޮތުން ކަމަށް ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މެންބަރު މައުރޫފް ވަނީ މިފަހުން ރައީސް މުއިއްޒު މާލެސިޓީ ގައި ދިރިއުޅޭ ރައްޔިތުންނާއެކު ބޭއްވެވި ސިލްސިލާ ބައްދަލު ކުރެއްވުންތަކަށް އަލިއަޅުވާލައްވައި ވާހަކަ ދައްކަވާފަ އެވެ.
މެންބަރު މައުރޫފް ވިދާޅުވީ އެއީ ފްރަސްޓްރޭޝަން ފިލުވާ ފޯރަމް ތަކެއް ކަމަށާއި، އެ ގޮތަށް އެ ފޯރަމްތައް ބޭއްވީ ކުރިއަށް އޮތް ލޯކަލް ކައުންސިލް އިންތިޚާބުގެ ކެންޕޭންއާ ގުޅިގެން ކަމަށެވެ. އަދި އެ ބައްދަލުވުންތައް ނުބާއްވާ މާލޭގެ މަގުމަތީގައި ރައީސް މުއިއްޒަށް މިނިވަންކަމާ ފަހިކަމާއެކު ހިނގާލުމުގެ ފުރުސަތު ރައްޔިތުން ނުދޭނެކަން އެމަނިކުފާނަށް ވެސް އެނގިވަޑައިގަންނަވާ ކަމަށެވެ.
ފްރަސްޓްރޭޝަން ފިލުވާ ފޯރަމްތަކެއްގެ ގޮތުގައި ބޭއްވީ. އަޅުގަނޑު މިދެންނެވީ 100% އާމިރު އެއީ މި ފޯރަމްތައް ނުބޭއްވި ނަމަ މާލޭގެ މަގުމަތީގައި ރައީސް މުއިއްޒަށް އުޅޭކަށް ނުކުރޭނެ. ރައްޔިތުން ނުކުމެ އަރައިގަންނާނެ. އެހެންނަމަވެސް ފޯރަމްތަކެއް ބޭއްވީމަ ރައްޔިތުންނަށް ހީވި މިކަންތައް ކޮށްދެނީއޭ. ވަގުތުން ކަންކަން ނިންމަނީއޭ. ބޯޑުތަކާ މަޝްވަރާ ކޮށް ނުލާ ނިންމާލާ. އެމްއޭސީއެލްގެ ކްލިއަރެންސްގެ ކަންތަކުގައި 80 ގަޑިއިރަށް ކަނޑައަޅާފައި އޮންނަ ކަމެއް. ބޯޑާ މަޝްވަރާ ކޮށްނުލާ 124 ގަޑިއިރަށް ބަދަލުކޮށްލީ. މޯލްޑިވްސް ޕޮލިސް ސަރވިސްއަށް ހުށެހެޅި ތަހުގީގު ކުރަމުން ދިޔަ މައްސަލައަކާ ގުޅިގެން މީހަކު ދެއްކި ވާހަކައެއްގައި ތިޖިނާއީ މައްސަލަ މިހާރު އަޅުގަނޑަށް މައުލޫމާތު ލިބިއްޖޭ ވިދާޅުވެފައި އެއަށް ވެސް ހައްލެއް އެތަނުގައި ދެއްވައިފި.ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު
މިއީ ރައްޔިތުންނަށް ކަންކަން ކޮށްދޭ ސަރުކާރެއް ނޫންކަން ފާހަގަކުރައްވައި މެންބަރު މައުރޫފް ވިދާޅުވީ ރައީސް މުއިއްޒުގެ މަކަރުވެރިކަން ރައްޔިތުންނަށް މިހާރު ސާފުވެ އެނގެން ޖެހޭ ކަމަށެވެ. އެއީ ރައްޔިތުންނަށް ހެޔޮ އެދިގެން ކަންކަން ކޮށްދެއްވާ ޒާތުގެ ރައީސް އެއް ނޫން ކަަމަށް އޭނާ ވިދާޅުވި އެވެ.
މެންބަރު މައުރޫފް ވިދާޅުވީ ވެރިކަމަށް ވަޑައިގަންނަވަން ވެވަޑައިގެންނެވި ވައުދުތައް ނުފުއްދަވާ ކަމަށާއި، މަޖިލިސް އިންތިޚާބަށް ވެސް ވެވަޑައިގެންނެވި ވައުދުތައް ނުފުއްދަވާ ކަމަށެވެ. އަދި ކުރިއަށް އޮތް ކައުންސިލް އިންތިޚާބާ ގުޅިގެން އެމަނިކުފާނު ވެވަޑައިގަންނަވާ ވައުދުތައް ފުއްދަވާނެ ކަަމަށް ރައްޔިތުން އުންމީދު ކޮށްގެން ނުވާނެ ކަމަށް މެންބަރު މައުރޫފް ވިދާޅުވި އެވެ.
