ޓްރަމްޕް ވިދާޅުވީ ޕުޓިން އާއި ޒެެލެންސްކީ ވެސް ހުންނެވީ ސުލްޙަ އަށް ތައްޔާރަށް ކަމަށް

ރަޝިޔާގެ ރައީސް ވްލަޑިމިއަރ ޕުޓިން އާއި، ޔުކްރެއިންގެ ރައީސް ވުލޮޑޮމިއަރ ޒެލެންސްކީ ވެސް ހުންނެވީ ހަނގުރާމައިގެ ސުލްޙަ އަށް ތައްޔާރަށް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އާދީއްތަ ދުވަހު ޓްރަމްޕް މިހެން ވިދާޅުވެފައި ވަނީ، އެމެރިކާގެ ފްލޮރިޑާގައި ޔުކްރެއިންގެ ރައީސް ޒެލެންސްކީއާ ބައްދަލު ކުރެއްވުމަށް ފަހު އެވެ. ޓްރަމްޕް ވިދާޅުވީ ދެ ލީޑަރުން ވެސް ތިއްބެވީ ސުލްޙަ އަށް ތައްޔާރަށް ކަމަށާއި، އެކަމުގައި ދެ ބޭފުޅުން ވެސް ވަރަށް ސީރިއަސް ކަމަށެވެ. 

އެކަން ފާހަގަ ކުރައްވައި ޓްރަމްޕް ވިދާޅުވީ ހަނގުރާމަ ނިންމުމުގެ ފަހު މަރުޙަލާގައި ދެ ލީޑަރުންނާ ވެސް އޭނާ ވާހަކަ ދައްކަވާފައިވާ ކަމަށާއި، އެ ލީޑަރުން ވެސް އެކަމުގައި ސީރިއަސް ކަމެއް ގެންގުޅުއްވާ ކަމަށެވެ. އެމެރިކާގެ ރިޔާސީ ދެ ވަނަ ދައުރަކަށް ޓްރަމްޕް ވަޑައިގެންނެވީ ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެންނާނެ ކަމުގެ ވައުދާ އެކު އެވެ. 

އެ މަސައްކަތަށް ވަކި ވަގުތެއް ކަނޑައަޅާފައި ނެތް ނަމަވެސް، ޓްރަމްޕް ވިދާޅުވީ އަހަރު ނިމުމުގެ ކުރިން ޑިޕްލޮމެޓިކް ސްޕްރިންޓެއް ފައްޓަވާފައިވާ ކަމަށެވެ. އެގޮތުން ގިނަ ކަންތައްތަކަށް މަޝްވަރާ ކުރެވިފައިވާ ކަމަށާއި، ދެ ފަރާތުގެ ވާހަކަ ވެސް އަޑު އެހުމަކީ މުހިންމު ކަމެއްގެ ގޮތުގައި ޓްރަމްޕް ވަނީ ސިފަ ކުރައްވައިފަ އެވެ.

މިއަހަރުގެ އޮކްޓޫބަރު މަހުގެ ތެރޭގައި ވެސް ޒެލެންސްކީ ވަނީ ޓްރަމްޕްއާ ބައްދަލު ކުރައްވައި ވާހަކަ ދައްކަވައިފަ އެވެ. އެފަހަރެކޭ އެއް ގޮތަށް، މި ފަހަރުގެ ބައްދަލުވުމުގައި ވެސް ޓްރަމްޕް ވަނީ ފޯނުން ޕުޓިން އަށް ގުޅުއްވައިގެން، ޒެލެންސްކީގެ ޙާޒިރުގައި ވާހަކަ ދައްކަވައިފަ އެވެ. އެއާ އެކު ޓްރަމްޕް ވަނީ ހަނގުރާމަ ނިންމުމުގައި ރަޝިޔާއާ އެކު އައު އުންމީދު ތަކެއް އޮތް ކަމަށް ފާހަގަ ކުރައްވައިފަ އެވެ. 

ޓްރަމްޕްއާ ބައްދަލު ކުރައްވަން ޒެލެންސްކީ ފްލޮރިޑާ އަށް ދަތުރު ކުރައްވަމުން ދަނިކޮށް ވެސް، ރަޝިޔާ އިން ވަނީ ޔުކްރެއިން އަށް އަމާޒުކޮށް ހަމަލާ ދީފަ އެވެ. އެއާ އެކު، ހަނގުރާމަ ނިންމުމާއި، ސުލްޙަ ހޯދުމުގެ އިޚުލާސްތެރި ނިޔަތް ޕުޓިންގެ ކިބައިގައި ހުރި ކަމަށް ޤަބޫލު ކުރަންތޯ ސުވާލު ކުރުމުން ޓްރަމްޕް ވިދާޅުވީ، ޕުޓިން ހުންނެވީ ވަރަށް ސީރިއަސްކޮށް ކަމަށެވެ. 

މަޝްވަރާ ތަކަށް ފަހު ނޫސްވެރިންނާ ވާހަކަ ދެއްކެވުމުގެ ކުރިން، ޓްރަމްޕްގެ އޭނާގެ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައި ވަނީ ޕުޓިން ވާހަކަ ދެއްކެވީ ވަރަށް ޕޮޒިޓިވްކޮށް ކަމަށެވެ. އެއަށް ފަހު ނޫސްވެރިންނާ ވާހަކަ ދައްކަވަމުން ވެސް ޓްރަމްޕް އެހެން ވިދާޅުވެފައިވާއިރު، ހަނގުރާމަ ނިންމުމަށް އެކުލަވާލާ އެއްބަސްވުމުން ޔުކްރެއިން އަށް ބޮޑެތި ފައިދާ ތަކެއް ލިބޭނެ ކަމަށް ވެސް ވިދާޅުވެފައިވެ އެވެ. 

މީގެ އިތުރުން ޓްރަމްޕް ވިދާޅުވެފައި ވަނީ ސެކިއުރިޓީ އެއްބަސްވުމެއް ވެސް އޮންނާނެ ކަމަށާއި، އެއީ ވަރަށް ވަރުގަދަ އެއްބަސްވުމަކަށް ވާނެ ކަމަށެވެ. އެ މަސައްކަތުގައި ޔޫރަޕުގެ ޤައުމު ތަކުން ވެސް ވަރަށް ބޮޑަށް ބައިވެރިވާނެކަން ފާހަގަ ކުރައްވައި ޓްރަމްޕް ވިދާޅުވީ، ރައްކާތެރިކަން ފޯރުކޮށްދިނުމުގައި އެ ޤައުމުތަކުގެ ބައިވެރިވުން ބޮޑު ވާނެ ކަމަށެވެ. 

ހަނގުރާމަ ނިންމުމުގެ މަޝްވަރާތައް ކުރިއަށް ގެންދަމުން އަންނައިރު، އެމެރިކާ އިން އަންނަނީ އެކަމުގައި އިސް ދައުރެއް އަދާ ކުރަމުންނެވެ. އަދި ވީ އެންމެ އަވަސް މުއްދަތެއްގެ ތެރޭގައި ހަނގުރާމަ ނިންމަން ޖެހޭ ކަމަށް ވެސް ޓްރަމްޕް އަންނަނީ ތަކުރާރުކޮށް ވިދާޅުވަމުންނެވެ.