ސުލްޙައިގެ އެއްބަސްވުމަށް ފަހު އިންތިޚާބު ބާއްވާނަން: ޒެލެންސްކީ
ޔުކްރެއިންގައި އެންމެ ފަހުންް އިންތިޚާބު ބާއްވާފައި ވަނީ 2019 ވަަނަ އަހަރު. އެ ފަހަރުގެ އިންތިޚާބު ކާމިޔާބު ކުރައްވައި ވެރިކަމަށް ވަޑައިގެންނެވީ ޒެލެންސްކީ. އޭގެ ފަހުން، 2022 ވަނަ އަހަރުގެ ފެބްރުވަރީ މަހުގެ ތެރޭގައި ރަޝިޔާ އިން ވަނީ ޔުކްރެރިންއާ ދެކޮޅަށް ހަނގުރާމަ ފަށައިފަ. ހަނގުރާާމައިގެ ސަބަބުން ޔުކްރެއިން އިން ވަނީ އެ ޤައުމުގެ އިންތިޚާބުތައް ފަސްކޮށްފައި.
ޔުކްރެއިންގެ ރައީސް ޒެލެންސްކީ
ރަޝިޔާ އާއެކު ސުލްޙައިގެ އެއްބަސްވުމެއްގައި ސޮއި ކުރެވުމާ އެކު، ޔުކްރެއިންގެ އިންތިޚާބު ބާއްވާނެ ކަމަށް އެ ޤައުމުގެ ރައީސް ވުލޮޑޮމިއަރ ޒެލެންސްކީ ވިދާޅުވެއްޖެ އެވެ.
ޒެލެންސްކީ މިހެން ވިދާޅުވެފައި މި ވަނީ، ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިންމުމަށް ބައިނަލްއަޤުވާމީ މުޖުތަމައުން ގިނަ މަސައްކަތް ތަކެއް ކުރަމުން އަންނަ ވަގުތެއްގަ އެވެ.
އެކަމާ ގުޅޭ ގޮތުން ވާހަކަ ދައްކަވަމުން ޒެލެންސްކީ ވިދާޅުވީ ސުލްޙައިގެ އެއްބަސްވުމެއް ޤާއިމު ކުރުމަކީ އިންތިޚާބު ބޭއްވުމުގެ ކުރިން ކުރަން ޖެހޭ އެންމެ މުހިންމު ކަންތައް ކަމަށެވެ. ޔުކްރެއިންގެ ޑިމޮކްރަސީގެ އުސޫލު ތަކަށް ވަފާތެރި ވުމަކީ ވަރަށް މުހިންމު ކަމެއް ކަމަށާއި، ނަމަވެސް ހަނގުރާމައިގެ ޙާލަތުގައި ޤައުމު އޮއްވާ އިންތިޚާބު ނުބޭއްވޭނެ ކަމަށް ޒެލެންސްކީ ވިދާޅުވެފައިވެ އެވެ.
ޔުކްރެއިންގައި އެންމެ ފަހުންް އިންތިޚާބު ބާއްވާފައި ވަނީ 2019 ވަަނަ އަހަރު އެވެ. އެ ފަހަރުގެ އިންތިޚާބު ކާމިޔާބު ކުރައްވައި ވެރިކަމަށް ވަޑައިގެންނެވީ ޒެލެންސްކީ އެވެ. އޭގެ ފަހުން، 2022 ވަނަ އަހަރުގެ ފެބްރުވަރީ މަހުގެ ތެރޭގައި ރަޝިޔާ އިން ވަނީ ޔުކްރެރިންއާ ދެކޮޅަށް ހަނގުރާމަ ފަށައިފަ އެވެ. ހަނގުރާާމައިގެ ސަބަބުން ޔުކްރެއިން އިން ވަނީ އެ ޤައުމުގެ އިންތިޚާބުތައް ފަސްކޮށްފަ އެވެ.
ޒެލެންސްކީ މިހެން ވިދާޅުވެފައިވާއިރު، ހަތަރު އަހަރުވާން ކައިރިވެފައިވާ މި ހަނގުރާމަ ނިންމުމަށް ބައިނަލްއަޤުވާމީ މުޖުތަމައުން އަންނަނީ މަޝްވަރާތައް ކުރިއަށް ގެންދަމުންނެވެ. އެގޮތުން އެމެރިކާ ސަރުކާރުގެ އޮފިޝަލުން ވަނީ ރަޝިޔާ އާއި ޔުކްރެއިން ސަރުކާރުގެ އޮފިޝަލުންނާ ވެސް ވަކި ވަކިން ބައްދަލު ކޮށްފަ އެވެ.
ޔުކްރެއިންގެ ޤާނޫނު އަސާސީގައި ބުނެފައި ވަނީ ހަނގުރާމައެއް ނުވަތަ ހަމަ ނުޖެހުމެއް ހިނގަމުން އަންނަ ދަނޑިވަޅެއްގައި އިންތިޚާބު ބާއްވައިގެން ނުވާނެ ކަމަށެވެ. އެހެންކަމުން، ޔުކްރެއިންގައި އިންތިޚާބެއް ބޭއްވުމުގެ ކުރިން ސުލްޙައިގެ އެއްބަސްވުމެއް ޤާއިމު ކުރަން ޖެހޭނެ ކަމަށް މާހިރުން ވެސް ވަނީ ފާހަގަ ކޮށްފަ އެވެ.
ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެންނަން ވާނީ އެއްވެސް ޝަރުތެއް ނެތި ކަމަށް ޒެލެންސްކީ ވަނީ ކުރިން ވެސް ވިދާޅުވެފަ އެވެ. ނަމަވެސް، ރަޝިޔާ އިން ވަނީ ޔުކްރެއިން އިން އެ ޤައުމުގެ ބިމުން ބައި ތަކެއް ދޫކޮށްލަން ޖެހޭނެ ކަމަށް ޝަރުތު ކޮށްފަ އެވެ.
މަސްދަރު: އޭއެފްޕީ
