ރަޝިޔާގެ ހަމަލާ ތަކުގެ ސަބަބުން ޔުކްރެއިންގެ 2600 އަށް ވުރެ ގިނަ އިމާރާތަކަށް ހޫނު ކުރެވޭނެ ގޮތެއް ނެތިފައި

ރަޝިޔާ އިން ޔުކްރެއިން އަށް ދިން ހަމަލާ ތަކެއްގެ ސަބަބުން، ޔުކްރެއިންގެ 2600 އަށް ވުރެ ގިނަ އިމާރާތް ތަކަކުން ހޫނު ކުރާ ނިޒާމުތައް މަސައްކަތް ނުކުރާ ކަމަށް ބުނެފި އެވެ.

ޔުކްރެއިންގެ ކަމާ ގުޅޭ އިދާރާ ތަކުން ހޮނިހިރު ދުވަހު ބުނެފައިވާ ގޮތުގައި ހަމަލާ ތަކުގެ ސަބަބުން 2600 އަށް ވުރެ ގިނަ އިމާރާތް ތަކަށް ހޫނު ކުރެވޭނެ ގޮތެއް ނެތިފައިވާ ކަމަށެވެ. އޭގެ އިތުރުން 187 ނާސަރީ އަކާއި، 138 ސްކޫލަކުން ވެސް ހީޓިން ކެނޑިފައި ހުރި ކަމަށް އިދާރާ ތަކުން ބުނެފައިވެ އެވެ. 

މި ހަމަލާ ތަކުގެ ސަބަބުން ވަރަށް ގިނަ އަދަދެއްގެ ރައްޔިތުން ފިނު މޫސުމުގައި ހޫނު ކުރެވޭނެ ގޮތެއް ނެތި ދިރިއުޅުމަށް މަޖުބޫރުވެފައިވާ ކަމަށް ވެސް ބުނެފައިވެ އެވެ. ހޮނިހިރު ދުވަހުގެ ހެނދުނު ވަގުތު ޔުކްރެއިންގެ ވެރި ރަށް ކީވްގެ ފިނި ހޫނުމިން 0 ޑިގްރީ ސެލްސިއަސް (32 ފްރެންހައިޓް)ގައި ހުރި ކަމަށް ބުނެފައިވެ އެވެ. މިފަދަ ފިނު މޫސުމެއްގައި ހޫނު ކުރެވޭނެ ގޮތެއް ނެތުމަކީ ރައްޔިތުންނަށް ވަރަށް ބޮޑު ދަތި ކަމެއް ކަމަށް ވެސް ފާހަގަ ކޮށްފައިވެ އެވެ. 

ވެރި ރަށް ކީވް ރީޖަންގެ އިދާރީ ފަރާތް ތަކުން ބުނެފައި ވަނީ މި ހަމަލާގެ ސަބަބުން، 320،000 (ތިން ލައްކަ ވިހި ހާސް) ގެދޮރުން ކަރަންޓު ކެނޑިފައިވާ ކަމަށެވެ. ކީވް ރީޖަން އަކީ ވެރި ރަށް ކީވް ވަށައިގެންވާ ސަރަހައްދެއް ކަމަށް ވީ ނަމަވެސް، ވެރި ރަށް ކީވް އެ ސަރަހައްދުގައި ނުހިމެނެ އެވެ. 

ރަޝިޔާ އިން ޔުކްރެއިންއާ ދެކޮޅަށް ހިންގަމުން އަންނަ ހަނގުރާމައިގައި، ޔުކްރެއިންގެ އިންފްރާސްޓްރަކްޗާ އަށް އަމާޒުކޮށް ހަމަލާ ދީ، އެތައް ގެއްލުން ތަކެއް އަންނަނީ ދެމުންނެވެ. އެ ހަމަލާ ތަކުގެ ސަބަބުން ޔުކްރެއިންގެ ރައްޔިތުން އަންނަނީ އެތައް ގޮން ޖެހުންތަކާއި، އުނދަގޫތައް ތަހަންމަލު ކުރަމުންނެވެ. މި ހަމަލާ ތަކުގެ ސަބަބުން، ފިނި މޫސުމުގައި ހޫނު ކުރެވޭނެ ގޮތެއް އަދި ކަރަންޓު ނެތުމުގެ މައްސަލަތައް އަންނަނީ ބޮޑު ވަމުންނެވެ. 

ސްކޫލް ތަކާއި ނާސަރީ ތަކުގައި ހޫނު ކުރެވޭނެ ގޮތެއް ނެތުމުގެ ސަބަބުން، ކުޑަ ކުދިންނަށް ވެސް ވަރަށް ބޮޑެތި ދަތި ތަކެއް ކުރިމަތި ވެފައިވާ ކަމަށް ބުނެފައިވެ އެވެ. މި ޙާލަތުގައި އިދާރީ ފަރާތް ތަކުން މި މައްސަލަތައް ހައްލު ކުރުމަށް މަސައްކަތް ކުރަމުން އަންނަ ކަމަށް ރިޕޯޓު ކޮށްފައިވެ އެވެ.