ސޮމާލީލޭންޑް ރަސްމީކޮށް ބަލައި ގަތުމަށް ޓްރަމްޕް ތާއީދު ނުކުރައްވާ ކަމަށް ބުނެފި

ސޮލާމީލޭންޑް އަކީ ރަސްމީކޮށް ޤައުމެއްގެ ގޮތުގައި ބަލައި ގަތުމަށް، އެމެރިކާގެ ރައީސް ޑޮނަލްޑް ޓްރަމްޕް ތާއީދު ނުކުރައްވާ ކަމަށް ނިއު ޔޯކް ޕޯސްޓުގައި ބުނެފި އެވެ. 

ޓްރަމްޕްއާ ވަރަށް ގާތް ގުޅުމެއް އޮންނަ، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވަނީ ސޮމާާލީލޭންޑަކީ ރަސްމީކޮށް ޤައުމެއްގެ ގޮތުގައި ބަލަައި ގަންނަން ނިންމަވައިފަ އެވެ. އެއާ އެކު، ނަތަންޔާހޫ ވިދާޅުވެފައި ވަނީ އިސްރާއީލް އަކީ، ސޮމާލީލޭންޑް ޤައުމެއްގެ ގޮތުގައި ބަލައި ގަންނާނެ ފުރަތަމަ ޤައުމު ކަމަށެވެ. 

އެކަމާ ގުޅޭ ގޮތުން، ސޮމާލީލޭންޑް ޤައުމެއްގެ ގޮތުގައި ޤަބޫލު ކުރުމާ ބެހޭ ގޮތުން ނިއު ޔޯސް ޕޯސްޓުން ވަނީ ސުވާލު ކޮށްފަ އެވެ. އެ ނޫހުގެ ނޫސްވެރިޔަކު ހުކުރު ދުވަހު ޝާއިއު ކޮށްފައި ވަނީ، އެކަމާ ގުޅޭ ގޮތުން ސުވާލު ކުރުމުން ޓްރަމްޕް "ނޫނެކޭ" ވިދާޅުވި ކަމަށެވެ. އަދި ސޮމާލީލޭންޑަކީ ކޮބައިކަން ހަގީތުގައި އެއްވެސް މީހަަކަށް އިނގޭތޯ އައްސަވައި ޓްރަމްޕް ސުވާލު އުފެއްދެވި ކަމަށް ބުނެފައިވެ އެވެ. 

ސޮމާލީލޭންޑަކީ 1991 ވަނަ އަހަރު ސޯމާލިއާ އިން ވަކިވެ ގަތް ސަރަހައްދެކެވެ. ނަމަވެސް، މިހާތަނަށް ދުނިޔޭގެ އެއްވެސް ޤައުމަކުން އެއީ މިނިވަން ޤައުމެއްގެ ގޮތުގައި ރަސްމީކޮށް ބަަލައިގެންފައި ނުވެ އެވެ. ސޮމާލީލޭންޑް އިން ވަކި ދައުލަތެއްގެ ގޮތުގައި އިދާރާ ތަކެއް ހިންގަމުން އަންނައިރު، އެ ސަރަހައްދަކީ ސޯމާލިއާގެ ބައެއްގެ ގޮތުގައި ބައިނަލްއަޤުވާމީ މުޖުތަމައުން އަންނަނީ ބަލަމުންނެވެ. 

ސޮމާލީލޭންޑް ރަސްމީކޮށް ބަލައި ގަންނަން ނިންމާފައިވާ ކަމަށް ނަތަންޔާހޫ ވިދާޅުވެފައިވާއިރު، އެއީ ސަރަހައްދީ ގޮތުން އިސްރާއީލް އިން ގުޅުން ބަދަހި ކުރުމަށް ކުރާ މަސައްކަތުގެ ބައެއްގެ ގޮތުގައި ވަނީ ފާހަގަ ކޮށްފަ އެވެ. އިސްރާއީލް ފިޔަވައި އެހެން އެއްވެސް ޤައުމަކުން މިހާތަނަށް އެކަން ބަަލައިގެންފައި ނުވެ އެވެ. 

މާހިރުން ފާހަގަ ކޮށްފައިވާ ގޮތުގައި، ސޮމާލީލޭންޑާ ގުޅޭ ގޮތުން އެމެރިކާ އިން ގެންގުޅެމުން އަންނަ ސިޔާސަތަށް އެއްވެސް ބަދަލެއް ނާންނާނެ އެވެ. ޚާއްސަކޮށް އެމެރިކާގެ ރައީސް ޓްރަމްޕްގެ ވާހަކަ ތަކުން އެކަން ސާފުވެގެން ދާ ކަމަށް މާހިރުން ވަނީ ފާހަގަ ކޮށްފަ އެވެ. އެމެރިކާ އިން މިހާތަނަށް ނިންމާފައި ވަނީ، ސޮމާލީލޭންޑަކީ ސޯމާލިއާގެ އިސްތިޤުލާލާއި، އެ ޤައުމުގެ ސަރަހައްދެއްގެ ގޮތުގައި ބަަލައިގަތުމުގެ ސިޔާސަތެވެ. 

ސޮމާލީލޭންޑަކީ ވަކި ޤައުމެއްގެ ގޮތުގައި ބަލައި ގަންނަން އިސްރާއީލް އިން ނިންމުމާ އެކު، ސޯމާލިއާގެ ސަރުކާާރުން ވަނީ އެކަމުގެ ކަންބޮޑުވުން ފާޅު ކޮށްފަ އެވެ. އެ ޤައުމުގެ ސަަރުކާރުން ބުނެފައި ވަނީ، އެއީ ސޯމާލިއާގެ އިސްތިޤުލާލާއި، އެ ޤައުމުގެ ސަރަހައްދީ ހަމަހަމަ ކަމަށް އަރައިގަންނަ ފަދަ ހަމަލާއެއް ކަމަށެވެ.