ހޮންޑޫރަސްގެ ރިޔާސީ އިންތިޚާބު ކާމިޔާބު ކުރެއްވީ، ޓްރަމްޕް ތާއީދު ކުރެއްވި އަސްފޫރާ

ބޮޑު ވާދަވެރި ކަމަކަށް ފަހު، ހޮންޑޫރަސްގެ ރިޔާސީ އިންތިޚާބު ނަސްރީ އަސްފޫރާ ކާމިޔާބު ކުރައްވާފައިވާ ކަމަށް ރަސްމީކޮށް އިއުލާން ކޮށްފި އެވެ. 

އިންތިޚާބުގެ ރަސްމީ ނަތީޖާ އިއުލާން ކޮށްފައި ވަނީ ހަފުތާއެއްހާ ދުވަހުގެ ލަސްވުމަކަށް ފަހު އެވެ. އެއީ ޓެކްނިކަލް މައްސަލަ އާއި، ވޯޓުގެ ޚިޔާނާތާ ގުޅުން ހުރި މައްސަލަ ތަކެއްގެ ސަބަބުންނެވެ. 

އިންތިޚާބާ ބެހޭ ޤާއުމީ އިދާރާ އިން ހާމަ ކޮށްފައިވާ ނަތީޖާ އަށް ބަލާއިރު، އެމެރިކާގެ ރައީސް ޑޮނަލްޑް ޓްރަމްޕްގެ ތާއީދު އޮތް ކޮންޒަވޭޓިވް ނެޝަނަލް ޕާޓީގެ ކެންޑިޑޭޓް އަސްފޫރާ އަށް ވަނީ 40.3 އިންސައްތަ ވޯޓު ލިބިފަ އެވެ. އޭނާގެ ވާދަވެރިޔާ ސެންޓަ ރައިޓް ލިބަރަލް ޕާޓީގެ ސަލްވާޑޯ ނަސްރުﷲ އަށް ލިބިފައި ވަނީ 39.5 އިންސައްތަ ވޯޓެވެ. އެހެންކަމުން މިއީ ވަރަށް ވާދަވެރި އަދި ފަރަގު ކުޑަ ނަތީޖާ އެކެވެ. 

އަސްފޫރާ އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ އޭނާ ހުންނެވީ ހޮންޑޫރަސްގެ ވެރިކަން ކުރަން ތައްޔާރަށް ކަމަށެވެ. އަދި އެކަމުގައި އޭނާ ފެއިލް ނުވާނެ ކަމަށް ވެސް ވިދާޅުވި އެވެ. އެހެން ނަމަވެސް، ނޫސްވެރިންނާ ބައްދަލު ކުރައްވައި ވާހަކަ ދައްކަވަމުން އޭނާގެ ވާދަވެރިޔާ ނަސްރުﷲ ވިދާޅުވީ، އިންތިޚާބުގެ ނަތީޖާ އޭނާ ޤަބޫލު ނުކުރާނެ ކަމަށެވެ. އަދި އެއީ އެތައް ގޯސްތަކެއް ހިމެނޭ ނަތީޖާއެއް ކަމަށް ވިދާޅުވި އެވެ.

އިންތިޚާބުގެ ނަތީޖާ ޤަބޫލު ނުކުރާނެ ކަމަށް ނަސްރުﷲ ހާމަ ކުރެއްވި ނަމަވެސް، އޭނާގެ ސަޕޯޓަރުންނަށް ގޮވާލައްވާފައި ވަނީ ހަަމަޖެހިލައިގެން ތިބުމަށެވެ. 

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ، ހުރިހާ ފަރާތްތަކުން ވެސް އިންތިޚާބުގެ ނަތީޖާ އަށް އިހުތިރާމް ކުރެއްވުމަށް ގޮވާލައްވައިފަ އެވެ. އެހެން ނަމަވެސް، ހޮންޑޫރަސްގެ ކޮންގްރެސްގެ ރައީސް ލުއިސް ރެޑޮންޑޯ ވަނީ އިންތިޚާބުގެ ނަތީޖާ އަކީ ޤާނޫނާ ޚިލާފު ނަތީޖާއެއް ކަމަށް ވިދާޅުވެފަ އެވެ. 

ހޮންޑޫރަސްގެ އިންތިޚާބުގެ ވޯޓުލުން ކުރިއަށް ގެންދިޔައީ ނޮވެމްބަރު މަހުގެ 30 ވަނަ ދުވަހު ކަމަށް ވީ ނަމަވެސް، ޓެކްނިކަލް މައްސަލަތަކާ ގުޅިގެން އިންތިޚާބުގެ ވޯޓު ގުނުން ވަނީ ދެ ފަހަރު ލަސްވެފަ އެވެ. އިންތިޚާބާ ބެހޭ ޤައުމީ އިދާރާގެ ރައީސް އަނާ ޕައޯލާ ހޯލް ވަނީ، ވޯޓު ގުނުން ލަސްވުމުގެ ޒިންމާ އަމިއްލަ ކުންފުންޏެއްގެ ބޮލުގައި އަޅުވައިފަ އެވެ. 

ވޯޓު ގުނުން ލަސްވުމުގެ ސަބަބުންނާއި، ދިމާވި މައްސަލަ ތަކުގެ ސަބަބުން 15 އިންސައްތަ ވޯޓު ގުނާފައި ވަނީ އަތުންނެވެ. އިންތިޚާބުގެ ވޯޓު ގުނުން ލަސްވުމުގެ ސަބަބުން ހޮންޑޫރަސްގައި ވަނީ ނުތަނަވަސްކަން ބޮޑުވެފަ އެވެ. ވެރިކަން ކުރާ ލިބަރަލް ޕާޓީގެ ގިނަ ސަޕޯޓަރުން ވަނީ ވޯޓު އޮޅުވާލާފައިވާ ކަމަށް ބުނެ އިހުތިޖާޖަށް ނިކުމެފަ އެވެ. 

ވެރިކަމުގައި މިހާރު ހުންނެވި ރައީސް ޒިއޯމާރާ ކާސްތުރޯ ވަނީ އިންތިޚާބީ ބަޣާވާތެއް ކޮށްފައިވާ ކަމަށް ތުހުމަތު ކުރައްވައިފަ އެވެ. އޭނާ ވިދާޅުވީ އެމެރިކާގެ ރައީސް ޓްރަމްޕްގެ ފަރާތުން އިންތިޚާބަށް ނުރައްކާތެރި ހުރަސް ތަކެއް، އަދި ނުބައި އަސަރު ތަކެއް ކޮށްފައިވާ ކަމަށެވެ. 

އިންތިޚާބު ކާމިޔާބު ކުރެއްވި އަސްފޫރާ އަށް ޓްރަމްޕް ތާއީދު ކުރައްވާފައިވާއިރު، ޓްރަމްޕް ވިދާޅުވެފައި ވަނީ އަސްފޫރާ އަށް އިންތިޚާބު ގެއްލިއްޖެ ނަމަ ބޮޑެތި ނުރައްކާ ތަކެއް ދިމާވާނެ ކަމަށެވެ. އަދި އޭނާ އަށް ކާމިޔާބު ނުވެއްޖެ ނަމަ، އެމެރިކާ އިން ހޮންޑޫރަސް އަށް ދެމުން އައި މާލީ އެހީތެރިކަން ހުއްޓާލައްވާނެ ކަމަށް ވެސް ޓްރަމްޕް ވިދާޅުވެފައިވެ އެވެ.