ވަރަށް އަވަހަށް ޓްރަމްޕްއާ ބައްދަލު ކުރަން ރާވާފައިވާ ކަމަށް ޒެލެންސްކީ ވިދާޅުވެއްޖެ

ދާދި އަވަަހަށް އެމެރިކާގެ ރައީސް ޑޮނަލްޑް ޓްރަމްޕްއާ ބައްދަލު ކުރައްވަން ރާވާފައިވާ ކަމަށް، ޔުކްރެއިންގެ ރައީސް ވުލޮޑޮމިއަރ ޒެލެންސްކީ ވިދާޅުވެއްޖެ އެވެ.

ޒެލެންސްކީ މިހެން ވިދާޅުވެފައި މި ވަނީ، ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިންމުމަށް އެމެެރިކާ އާއި، ބައިނަލްއަޤުވާމީ މުޖުތަމައުން ގިނަ މަސައްކަތް ތަކެއް ކުރަމުން އަންނަ ދަނޑިވަޅެއްގަ އެވެ. އަދި ސުލްޙައިގެ އެއްބސްވުމަކަށް އެމެރިކާ އިން ވަރަށް ބޮޑަށް ބާރު އަޅަމުން އަންނަ ވަގުތެއްގަ އެވެ. 

ވަރަށް އަވަހަށް ޓްރަމްޕްއާ ބައްދަލު ކުރައްވަން ރާވަފައިވާ ކަމަށް ވިދާޅުވެ، ޒެލެންސްކީ ވިދާޅުވީ އައު އަހަރު ފެށުމުގެ ކުރިން ވަރަށް ގިނަ ކަންކަން ނިންމޭނެ ކަމަށެވެ. ނަމަވެސް، އެކަމާ ގުޅޭ އިތުރު އެހެން ތަފްސީލެއް ޒެލެންސްކީ ދެއްވާފައި ނުވެ އެވެ. 

އިތުރަށް ޒެލެންސްކީ ވިދާޅުވެފައި ވަނީ ސަރަހައްދީ ކަންކަމާ ގުޅޭ ގޮތުން ކުރަން ޖެހޭ ވަރަށް ގިނަ ކަންކަން ހުރި ކަމަށާއި، ދެ ފަރާތުން ވެސް ޚިޔާލު ބަދަލުކޮށް، އަދި ވެރިންގެ ފެންވަރުގައި މަޝްވަރާ ކުރަން ޖެހޭ ކަމަށެވެ. އެކަން ފާހަގަ ކުރައްވައި ޒެލެންސްކީ ވިދާޅުވީ، ޔުކްރެއިން އިން މަސައްކަތް ކުރަމުން އަންނަނީ ސީދާ ޓްރަމްޕްއާ ބައްދަލު ކުރުމަށެވެ. 

މިދިޔަ ހަފުތާގެ ތެރޭގައި ޔުކްރެއިން ސަރުކާރުގެ އިސްވެރިންނާއި، އެމެރިކާގެ އިސް އޮފިޝަލުން ވަނީ ބައްދަލު ކޮށްފަ އެވެ. އެމެރިކާގައި ކުރިއަށް ދިޔަ މަޝްވަރާ ތަކުގައި ގިނަ ކަންކަމާ ގުޅޭ ގޮތުން ވާހަކަ ދައްކާފައިވާއިރު، އެ ބައްދަލުވުން ތަކުގެ އެންމެ ފުރިހަމަ މައުލޫމާތު ޒެލެންސްކީއާ ވަނީ ހިއްސާ ކުރައްވައިފަ އެވެ. 

އެ ބައްދަލުވުން ތަކަށް އިޝާރާތް ކުރައްވައި ޒެލެންސްކީ ވިދާޅުވެފައި ވަނީ، އެންމެ މަތީ ފެންވަރުގައި އެމެރިކާގެ ރައީސް ޓްރަމްޕްއާ ބައްދަލު ކުރެއްވުމަށް އެއްބަސްވެފައިވާ ކަމަށެވެ. ޒެލެންސްކީ މިހެން ވިދާޅުވެފައިވާއިރު، އޭގެ ކުރިން ބުރާސްފަތި ދުވަހު އޭނާ ވަނީ އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް، އަދި ޓްރަމްޕްގެ ދަނބިދަރިކަލުން ޖެރާޑް ކުޝްނާއާ ވެސް ވާހަކަ ދައްކަވައި މަޝްވަރާ ކުރައްވައިފަ އެވެ. 

މިދިޔަ ހަފުތާގެ ތެރޭގައި ޒެލެންސްކީ ވަނީ ހަނގުރާމަ ނިންމުމަށް ބޭނުންވާ ސުލްޙައިގެ 20 ނުކުތާގެ ޕްލޭނެއް ހުށަހަޅައިފަ އެވެ. އެ ޕްލޭން ގައި ވަނީ، ރަޝިޔާ އިން ކުރިމަތި ވެދާނެ އިތުރު ހަމަލާ އަކުން ސަލާމަތް ވުމަށް ބޭނުންވާ ސަލާމަތީ ޔަގީންކަން ލިބޭނެ ގޮތް ބަޔާން ކޮށްފަ އެވެ. ނަމަވެސް، ޔުކްރެއިންގެ ބިމުން ދޫކޮށްލަން ޖެހޭނެ ކަމަށް ރަޝިޔާ އިން ބުނެފައިވާ ބައިތަކާ ގުޅޭ ގޮތުން އެ ހުށަހެޅުގައި ކަމެއް ހިމަނާފައި ނުވެ އެވެ. 

ހަނގުރާމަ ނިންމުމަށް ރަޝިޔާ އަބަދު ވެސް ކުރާ ޝަރުތު ތަކުގެ ތެރޭގައި ޔުކްރެއިންގެ ބިމުން ބައި ތަކެއް ދޫކޮށްލުން ހިމެނޭއިރު، ޔުކްރެއިން އިން އެކަމާ ދެކޮޅު ހަދަ އެވެ. އަދި ޔުކްރެއިން އަށް ތާއީދު ކުރާ ޔޫރަޕުގެ ޤައުމު ތަކުން ވެސް އަންނަނީ އެކަމާ ދެކޮޅު ހަދަމުންނެވެ.