އެމެރިކާ އާއި ރަޝިޔާގެ އޮފިޝަލުން ފްލޮރިޑާގައި ބައްދަލު ކޮށްފި

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިންމުމަށް ކުރަމުން އަންނަ މަޝްވަރާ ތަކުގެ ތެރެއިން، އެމެރިކާ އާއި ރަޝިޔާގެ އޮފިޝަލުން ބައްދަލު ކޮށްފި އެވެ. 

އެމެރިކާ އާއި ރަޝިޔާގެ އޮފިޝަލުން ހޮނިހިރު ދުވަހު ބައްދަލު ކޮށްފައި ވަނީ، އެމެރިކާގެ ފްލޮރިޑާގަ އެވެ. މި ބައްދަލުވުން ބާއްވާފައި ވަނީ ހަނގުރާމަ ނިންމުމަށް، އެމެރިކާގެ ރައީސް ޑޮނަލްޑް ޓްރަމްޕް ދެ ޤައުމުގެ ވެރިންނަށް ވެސް ބާރު އަޅުއްވަމުން އަންނަ ވަގުތެއްގަ އެވެ. 

މި ބައްދަލުވުން ބާއްވާފައިވާއިރު، ހުކުރު ދުވަހު ޔުކްރެއިން އާއި ޔޫރަޕުގެ އޮފިޝަލުންނާ އެކު އެމެރިކާގެ އޮފިޝަލުން ވަނީ ހުކުރު ދުވަހު މިއާމީގައި ބަައްދަލު ކޮށްފަ އެވެ. މިއީ ތިން އަހަރު ދުވަހަށް ވުރެ ގިނަ ދުވަސް ވެފައިވާ މި ހަނގުރާމަ ނިންމުމަށް ކުރަމުން އަންނަ މަސައްކަތުގެ ތެރެއިން މުހިންމު މަސައްކަތެއް ކަމަށް ފާހަގަ ކޮށްފައިވެ އެވެ. 

ރަޝިޔާގެ ރައީސް ވްލަޑިމިއަރ ޕުޓިންގެ ޚާއްސަ މަންދޫބު ކިރިލް ޑޮމްޓްރިއެވް ނޫސްވެރިންނާ ވާހަކަ ދައްކަވަމުން ވިދާޅުވީ، އެމެރިކާގެ ޚާއްސަ މަންދޫބު ސްޓީވް ވިޓްކޮފް އާއި، ޓްރަމްޕްގެ ދަނބިދަރިކަލުން ޖެރާޑް ކުޝްނާ އާއެކު ބޭއްވި މަޝްވަރާތަކަކީ ވަރަށް ބިނާ ކުރުވަނިވި މަޝްވަރާ ތަކެއް ކަމަށެވެ. އަދި އެކަމާ ގުޅޭ އިތުރު މަޝްވަރާ ތަކެއް އާދީއްތަ ދުވަހު ކުރިއަށް ދާނެ ކަމަށް ވެސް ހާމަ ކުރެއްވި އެވެ. 

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ، މަޝްވަރާ ތަކުގައި އޭނާ ވެސް ބައިވެރިވެ ވަޑައިގެންފާނެ ކަމަށް ވިދާޅުވެފަ އެވެ. އާދީއްތަ ދުވަހު ބާއްވަން ތާވަލް ކޮށްފައިވާ މަޝްވަރާ ތަކުގައި ވެސް މައިގަނޑު ގޮތެއްގައި ދައްކާނީ ހަނގުރާމަ ނިންމުން އަވަސް ކުރުމުގެ ވާހަކަ ކަމަށް ފާހަގަ ކޮށްފައިވެ އެވެ. 

އެމެރިކާ، ޔުކްރެއިން އަދި ޔޫރަޕުގެ އޮފިޝަލުންނާ ހަވާލާދީ މިދިޔަ ހަފުތާގައި ރިޕޯޓު ކޮށްފައިވާ ގޮތުގައި، ހަނގުރާމަ ނިންމުމުގެ މަޝްވަރާ ތަކުގެ ބައެއްގެ ގޮތުން ޔުކްރެއިން އަށް ބޭނުންވާ ސަލާމަތީ ޔަގީންކަން ދިނުމުގައި ކުރިއެރުން ތަކެއް ވަނީ ހޯދިފަ އެވެ. ނަމަވެސް، ރަޝިޔާ އިން އެކަން ޤަބޫލު ކުރާނެކަން ޔަގީން ކުރެވިފައި ނުވެ އެވެ. ރޮއިޓާސް ގައި ބުނެފައި ވަނީ، ޑިމިޓްރިއެވް އާއި، ޔުކްރެއިންގެ ފަރާތުން މަޝްވަރާ ތަކުގައި ބައިވެރިވާ އޮފިޝަލުން ބައްދަލު ނުކުރަން ވަނީ ނިންމައިފަ އެވެ. 

މީގެ އިތުރުން ޔުކްރެއިންގެ ރައީސް ވުލޮޑޮމިއަރ ޒެލެންސްކީ ހޮނިހިރު ދުވަހު ވިދާޅުވެފައި ވަނީ، އެމެރިކާ އާއި ޔުކްރެއިން އަދި ރަޝިޔާ ހިމެނޭހެން، ތިން ފަރާތުގެ މަޝްވަރާ ތަކެއް ބޭއްވުމަށް އެމެރިކާ އިން ހުށަހަޅާފައިވާ ހުށަހެޅުން ޤަބޫލު ކުރާނީ، އެކަމުން ގައިދީން ބަދަލު ކުރުމުގެ މަސައްކަތް ފަސޭހަވެ އަދި ޤައުމުގެ ލީޑަރުންގެ ބައްދަލުވުން ތަކަށް މަގު ފަހިވާ ނަމަ އެވެ. އެމެރިކާ އިން ހުށަހަޅާފައި ވަނީ ތިން ޤައުމުގެ ނެޝަނަލް ސެކިއުރިޓީ އެޑްވައިޒަރުން ބައްދަލު ކުރުމަށެވެ. 

އެމެރިކާގެ އިންޓެލިޖެންސް ރިޕޯޓެއްގައި ބުނެފައި ވަނީ، ރަޝިޔާގެ ރައީސް ޕުޓިންގެ ނިޔަތަކީ ޔުކްރެއިންގެ ހުރިހާ ސަރަހައްދެއް ހިފުން ކަމަށާއި، އެކަމުގެ އިންޒާރު ވެސް ޕުޓިން ދެއްވާ ކަމަށެވެ. މިކަން ހާމަ ކޮށްފައި ވަނީ އިންޓެލިޖެންސްއާ ގުޅުން ހުރި ބައެއް މަސްދަރުތަކާ ހަވާލާދީ އެވެ. އެހެންކަމުން މިއީ، ރަޝިޔާ އިން އޮތީ މަޝްވަރާ އާއި، ސުލްޙަ އަށް ތައްޔާރަށް ކަމަށް އެމެރިކާ އިން ބުނަމުން އަންނަ ބުނުމާ ފުށުއަރާ ކަމެއް ކަމަށް ފާހަގަ ކޮށްފައިވެ އެވެ. 

ރަޝިޔާގެ ވެރި ރަށް މޮސްކޯގައި އޮތް ނޫސްވެރިންގެ ބައްދަލުވުމެއްގައި ޕުޓިން ވިދާޅުވެފައި ވަނީ، ހަނގުރާމަ ނިންމުމަށް 2024 ވަނަ އަހަރު ރަޝިޔާ އިން ކަނޑައަޅާފައިވާ ޝަރުތުތައް އެއްވެސް ވަރަަކަށް ބަދަލު ނުވާ ކަމަށް ވިދާޅުވެފަ އެވެ. އެގޮތުން ނޭޓޯގައި ބައިވެެރިވުމަށް ޔުކްރެއިން އިން ކުރަމުން އަންނަ އުންމީދު ދޫކޮށްލައި، ރަޝިޔާ ދިން ދައުވާ ކުރަމުން އަންނަ ޔުކްރެއިންގެ ހަތަރު ސަރަހައްދު ފުރިހަމަ އަށް ދޫކޮށްލަން ވާނެ ކަމަށް ފާހަގަ ކުރައްވާފައިވެ އެވެ. 

ޔުކްރެއިންގެ ރައީސް ޒެލެންސްކީ އަށް ލަފާ ދެއްވާ ރުސްޓެމް އުމެރޮވް ވިދާޅުވެފައި ވަނީ، އެމެރިކާގެ ބައިވެރިންނާ އެކު ކުރިއަށް އޮތް ތަނުގައި މަޝްވަރާތައް ކުރިއަށް ގެންގޮސް، ގުޅިގެން މަސައްކަތް ކުރުމަށް ޔުކްރެއިން އިން އެއްބަސްވެފައި ވާނެ ކަމަށެވެ. އަދި މަޝްވަރާ ތަކުގެ އެންމެ ފަހުގެ މައުލޫމާތު ޔުކްރެއިންގެ ރައީސް ޒެލެންސްކީއާ ވެސް ހިއްސާ ކުރައްވާފައިވާ ކަމަށް އޭނާ ވިދާޅުވި އެވެ. 

މިދިޔަ ހުކުރު ދުވަހު ނޫސްވެރިންނާ ވާހަކަ ދައްކަވަމުން ރޫބިއޯ ވިދާޅުވެފައި ވަނީ، ހަނގުރާމަ ނިންމުމަށް ކުރަމުން އަންނަ މަޝްވަރާ ތަކުގައި ބޮޑެތި ކުރިއެރުން ތަކެއް ހޯދިފައިވާ ކަމަށެވެ. އެހެން ނަމަވެސް، އަދި ވެސް ކުރަން ޖެހޭ ކަންކަން ހުރި ކަމަށާއި، ކުރިއަށް އޮތީ ދިގު ދަތުރެއް ކަމަށް އޭނާ ވިދާޅުވެފައިވެ އެވެ.