ޔުކްރެއިން ހަނގުރާމަ ނިންމުމުގެ އެއްބަސްވުމަކާ ހަމައަށް އައުމަށް ވަރަށް ބޮޑަށް ކައިރި ވެއްޖެ: ޓްރަމްޕް

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ހުއްޓާލުމަށް ކުރަމުން އަންނަ މަސައްކަތުގައި ސުލްޙައިގެ އެއްބަސްވުމަކާ ހަމައަށް ވާސިލުވުން ވަރަށް ބޮޑަށް ކައިރިވެފައިވާ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވެފައި ވަނީ ރަޝިޔާ-ޔުކްރެއިން ހަނގުރާމަ ނިންމުމަށް ކުރަމުން އަންނަ މަސައްކަތުގައި އެމެރިކާގެ އިސް އޮފިޝަލުންނާއި، ޔޫރަޕުގެ ލީޑަރުން ބައްދަލު ކުރައްވާފައި ވަނިކޮށެވެ. 

ޖަރުމަނުގެ ވެރި ރަށް ބާލިންގައި ކުރިއަށް ދިޔަ ބައްދަލުވުމުގައި ޔުކްރެއިންގެ ރައީސް ވުލޮޑޮމިއަރ ޒެލެންސްކީ ވެސް ބައިވެރިވެ ވަޑައިގެންފައިވާއިރު، އެ ބައްދަލުވުމުގައި ވަނީ ހަނގުރާމަ ނިންމުމަށް ކުރިއަށް ގެންދާ މަސައްކަތްތަކާ ގުޅޭ ގޮތުން މަޝްވަރާ ކުރައްވައިފަ އެވެ. އެ ބައްދަލުވުމުގައި ބައެއް ހުށަހެޅުން ތަަކަށް ވާހަކަ ދައްކަވާފައިވާއިރު، އެކަމާ ގުޅިގެން ރަޝިޔާ އިން މިހާތަނަށް ވަކި އެއްޗެއް ބުނެފައި ނެތެވެ. 

ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، ޒެލެންސްކީގެ އިތުރުން، އިނގިރޭސިވިލާތުގެ ބޮޑު ވަޒީރު ކިއާ ސްޓާމާ އާއި، ފްރާންސްގެ ރައީސް އިމަނުއެލް މެކްރޮން އާއި، ޖަރުމަނުގެ ޗާންސެލަރު ފްރެޑްރިކް މާޒް އަދި ނޭޓޯގެ ލީޑަރުންނާ މެދު ދިގު ދެމިގެން ދިޔަ މަޝްވަރާތަކެއް ކުރައްވާފައިވާ ކަމަށެވެ. އަދި އެ މަޝްވަރާ ތަކަކީ ވަރަށް ރަނގަޅު މަޝްވަރާ ތަކެއް ކަމަށް ވެސް ޓްރަމްޕް ވަނީ ސިފަ ކުރައްވައިފަ އެވެ. 

އެ މަޝްވަރާ ތަކާ ގުޅޭ ގޮތުން ވާހަކަ ދައްކަވަމުން ޒެލެންސްކީ ވިދާޅުވެފައި ވަނީ ޓްރަމްޕްގެ މަންދޫބުންނާ އެކު ބޭއްވެވި މަޝްވަރާތައް ފަސޭހަ ނޫން ކަމަށެވެ. ނަމަވެސް، އެ މަޝްވަރާ ތަކުގައި ޔުކްރެއިންގެ ސަލާމަތަށް ބޭނުންވާ ޔަގީންކަން ހޯދުމުގައި ކުރިއެރުން ތަކެއް ލިބިފައިވާ ކަމަށް ޒެލެންސްކީ ފާހަގަ ކުރެއްވި އެވެ. އެމެރިކާފެ ފަރާތުން ބޭނުންވާ ސަލާމަތީ ޔަގީންކަން ފާހަގަ ކުރައްވާފައި ވީ ނަމަވެސް، ރަޝިޔާ އިން ހުށަހަޅާފައިވާ ޔުކްރެއިންގެ ބިމުން ބައެއް ދޫކޮށްލުމުގެ މައްސަލައިގައި އަދި ވެސް ޚިޔާލު ތަފާތުވުންތައް އެބަ އޮތެވެ. 

މީގެ އިތުރުން ޖަރުމަނުގެ ޗާންސެލަރު މާޒް ވިދާޅުވެފައި ވަނީ، އެ މަޝްވަރާ ތަކުން ހަގީގީ ސުލްޙަ ހޯދުމުގެ މަގަކަށް ފުރުސަތު ލިބިފައިވާ ކަމަށެވެ. އަދި އެމެރިކާ އިން ސަލާމަތީ ޔަގީންކަން ދިނުމަށް ހުށަހަޅާފައިވާ ހުށަހެޅުމަށް ތައުރީފު ކުރައްވާ ކަމަށް ވެސް މާޒް ވަނީ ވިދާޅުވެފަ އެވެ. 

ޔޫރަޕުގެ ލީޑަރުން އެކުވެގެން ނެރެފައިވާ ބަޔާނެއްގައި ބުނެފައި، ސުލްޙައިގެ ދުވަސްވަރު ޔުކްރެއިންގެ ސިފައިންނަށް ދެމެހެއްޓެނިވި ގޮތެއްގައި އެހީތެރިކަން ދިނުމަަށް 800،000 (އައް ލައްކަ) ސިފައިން ބައި ތިއްބަން ޖެހޭނެ ކަމަށެވެ. އަދި އެމެރިކާ ސަރުކާރުގެ އިސް ނެގުމުގެ ދަށުން ހަނގުރާމަ ހުއްޓުމުގެ ޙާލަތު ބަލަން ޖެހޭނެ ކަމަށާއި، އެކަންކަން ތަހުގީގު ކުރެވޭނެ ނިޒާމެއް ކަނޑައަޅަން ޖެހޭނެ ކަމަށް ވެސް ވަނީ ބުނެފަ އެވެ. 

އެކަމާ ގުޅޭ ގޮތުން އެމެރިކާގެ އޮފިޝަލުން ބުނެފައި ވަނީ ޔުކްރެއިން އިން އެއްބަސްވުން ޤަބޫލު ކުރަން ޖެހޭނެ ކަމަށާއި، އެއީ ނޭޓޯގެ ފަސް ވަނަ މާއްދާއާ އެއްގޮތަށް، ސަލާމަތީ ޔަގީންކަން ދޭނެ އެއްބަސްވުމެއް ކަމަށެވެ. ނަމަވެސް، އެއީ ދާއިމީ ގޮތެއްގައި ދެމި އޮންނާނެ ޔަގީން ކަމެއް ނޫން ކަމަށް ވެސް ވަނީ ފާހަގަ ކޮށްފަ އެވެ.

ރަޝިޔާ އާާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަކީ ޓްރަމްޕްގެ ވަރަށް ބޮޑު ވައުދެކެވެ. އެމެރިކާގެ ރިޔާސީ އިންތިޚާބުގެ ކެމްޕެއިންގެ ތެރޭގައި ޓްރަމްޕް ވައުދުވެ ވަޑައިގެންފައި ވަނީ، ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެންނަވާނެ ކަމަށެވެ. މި ހަނގުރާމަ އަށް ތިން އަހަރު ވެގެންދާއިރު، ހަނގުރާމަ ހުއްޓާލުމަށް މިހާތަނަށް ކޮށްފައިވާ މަސައްކަތްތައް ކާމިޔާބުވެފައި ނުވެ އެވެ.