މެކްރޮންއާ ބައްދަލު ކުރައްވަން ޕުޓިން ހުންނެވީ ތައްޔާރަށް

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައާ ގުޅޭ ގޮތުން، ފްރާންސްގެ ރައީސް އިމަނުއެލް މެކްރޮންއާ ބައްދަލު ކުރައްވަން ރަޝިޔާގެ ރައީސް ވްލަޑިމިއަރ ޕުޓިން ހުންނެވީ ތައްޔާރަށް ކަމަށް ހާމަ ކޮށްފި އެވެ.

އެކަން ހާމަ ކޮށްފައި ވަނީ ރަޝިޔާގެ ރިޔާސީ ގަނޑުވަރު، ކްރެމްލިން އިންނެވެ. ރަޝިޔާގެ ރައީސް ޕުޓިންގެ ތަރުޖަމާނު ދިމިޓްރީ ޕެސްކޮވް އާދީއްތަ ދުވަހު ވިދާލުވީ ޕުޓިން ހުންނެވީ މެކްރޮންއާ ބައްދަލު ކުރައްވަން ތައްޔާރަށް ކަމަށެވެ. 

ރަޝިޔާގެ ސަރުކާރުގެ ނޫސް އެޖެންސީ އާރުއައިއޭ އަށް ދެއްވި އިންޓަވިޔުގައި ޕެސްކޮވް ވިދާޅުވީ، ސިޔާސީ ގޮތުން ދެ ފަރާތުން ވެސް އެކަން ބޭނުންވާ ނަމަ، ވަރަށް ރަނގަޅަށް އެކަން ބަލަން ޖެހޭ ކަމަށެވެ. 

ޕެސްކޮވް މިހެން ވިދާޅުވެފައިވާއިރު، ދާދި ފަހުން މެކްރޮން ވިދާޅުވެފައި ވަނީ ހަނގުރާމަ ނިންމުމަށް ޔޫރަޕުން ޕުޓިން އާއެކު އަލުން ވާހަކަ ދައްކަން ފަށަން ޖެހޭ ކަމަށް އޭނާ ޤަބޫލު ކުރައްވާ ކަމަށެވެ. މެކްރޮން ވިދާޅުވީ ޔޫރަޕާއި، ޔުކްރެއިންގެ ފައިދާއަށް ޓަކައި ކުރިއަށް އޮތް ދެ ހަފުތާގެ ތެރޭގައި މަޝްވަރާތައް އަލުން ފެށުމަށް އެކަށޭނެ ޕްރޭމް ވޯކެއް ހޯދަން ޖެހޭ ކަމަށެވެ. 

ޔޫރަޕިއަން ޔޫނިއަންގެ ލީޑަރުން ހުކުރު ދުވަހު އެއްބަސްވެފައި ވަނީ ހަނގުރާމައިގެ ހަތަރު އަހަރު ހަމަވާން ކައިރިވެފައިވާއިރު، ޔުކްރެއިން އަށް 90 ބިލިއަން ޔޫރޯ (105 ބިލިއަން އެމެރިކާ ޑޮލަރު)ގެ ލޯނެއް ދިނުމަށެވެ. މި ފައިސާ އަކީ ޔުކްރެއިންގެ ބަޖެޓަށް ކުރިމަތި ވެފައިވާ ބޮޑެތި ދަތިތައް ޙައްލު ކުރުމަށް ދޭ ފައިސާ ކަމަށް ފާހަގަ ކޮށްފައިވެ އެވެ. 

ނަމަވެސް، އެ ފައިސާ ހޯދުމުގެ ގޮތުން މިހާރު ފްރީޒް ކޮށްފައިވާ ރަޝިޔާގެ އެސެޓުތައް ބޭނުން ކުރުމާ ގުޅޭ ގޮތުން ޔޫރަޕިއަން ޔޫނިއަންގެ ލީޑަރުންނަށް އެއްބަސްވުމަކަށް އާދެވިފައި ނުވެ އެވެ. މިއީ ޔުކްރެއިން އަށް އިޤްތިޞާދީ އެހީތެރިކަން ފޯރުކޮށް ދިނުމުގައި ޔޫރަޕުން ކުރިމަތިލާން ޖެހިފައިވާ ގޮންޖެހުން ތަކުގެ ތެރެއިން ކަމެކެވެ. 

ރަޝިޔާ އާއި ޔުކްރެއިންއާ ދެމެދު ހަނގުރާމަ ހިނގަމުން އަންނަ ތިން އަހަރަށް ވުރެ ގިނަ ދުވަސްވެ، ހަތަރު އަހަރުވާން ކައިރިވެފައިވާއިރު، މި ހަނގުރަމަ ނިންމުމަށް ބައިނަލްއަޤުވާމީ މުޖުތަމައުން އަންނަނީ ވަރަށް ގިނަ މަސައްކަތް ތަކެއް ކުރަމުންނެވެ. ރަޝިޔާ އާއި ޔުކްރެއިންއާ ދެމެދު ސީދާ ގޮތުން މަޝްވަރާތައް ކުރިއަށް ނުގެންދެވުނު ނަމަވެސް، ޔޫރަޕުގެ ބައެއް ލީޑަރުން ވަނީ ސުލްޙަ އަށް މަގު ފަހި ކުރުމަށް މަސައްކަތް ކުރަން ފައްޓަވައިފަ އެވެ.

މި ހަނގުރާމައިގައި ޔުކްރެއިން އަށް އެންމެ ބޮޑު އެހީތެރި ކަމެއް ދެމުން އަންނަ އެއް ޤައުމަކީ ފްރާންސް އެވެ. މީގެ ކުރިން ފްރާންސްގެ ރައީސް މެކްރޮން ވަނީ ރަޝިޔާގެ ރައީސް ޕުޓިން އަށް ފާޑު ވިދާޅުވެ ވާހަކަ ދައްކަވައިފަ އެވެ. އެގޮތުން ހަނގުރާމަ ނިންމުމަށް ރަޝިޔާ އާއި ޕުޓިން ބޭނުންފުޅުވާ ހުރިހާ ކަމެއް ކުރުމުގެ ފުރުސަތު ދީގެން ނުވާނެ ކަމަށް ވެސް މެކްރޮން ވިދާޅުވެފައިވެ އެވެ.