ކާރު ބޮމެއް ގޮއްވާލައިގެން ރަޝިޔާ ގެ އިސް ޖެނެރަލަކު މަރާލައިފި، ޔޫކްރެއިން އާ ގުޅުމެއް އޮތްތޯ ތަހުގީގު ކުރަނީ
ޔޫކްރެއިން ހަނގުރާމަ ނިންމުމަށް މިއާމީގައި ބޭއްވި މަޝްވަރާތަކަށް ފަހު މޮސްކޯގެ ދެކުނުގައި ރަޝިޔާގެ ޖެނެރަލް ސްޓާފްގެ ތަމްރީނު ބައިގެ ވެރިޔާ 56 އަހަރުގެ ލެފްޓިނަންޓް ޖެނެރަލް ފާނިލް ސަރްވަރޯވް ކާރު ބޮމަކުން މަރާލައިފި. ރަޝިޔާގެ ތަހުގީގުކުރާ ފަރާތްތަކުން ބުނީ މި ހަމަލާއާ ޔޫކްރެއިންގެ ޚާއްސަ ފައުޖުތަކާ ގުޅުންހުރިތޯ ބަލަމުންދާ ކަމަށް.
ރަޝިޔާގެ ޖެނެރަލް ސްޓާފްގެ ސިފައިންގެ އޮޕަރޭޝަނަލް ޓްރެއިނިން ޑިރެކްޓަރޭޓްގެ ވެރިޔާ ލެފްޓިނެންޓް ޖެނެރަލް ފަނިލް ސާވަރޯވް، ޑިސެމްބަރު 22، 2025 ގައި މޮސްކޯގައި ކާރު ބޮމެއް ގޮއްވާލައިގެން މަރާލި ސަރަހައްދު ގައި ތަހުގީގު ކުރާ މީހަކު ހަރަކާތްތެރި ވަނީ.
ހޯމަ ދުވަހުގެ ހެނދުނު މޮސްކޯގެ ދެކުނުގައި ކާރު ބޮމެއް ގޮއްވާލައިގެން ރަޝިޔާގެ އިސް ޖެނެރަލެއް މަރާލައިފި އެވެ.
މި ހާދިސާ ހިނގާފައި މިވަނީ ޔޫކްރެއިން ހަނގުރާމަ ނިންމުމަށް ރަޝިޔާ އާއި ޔޫކްރެއިންގެ ވަފުދުތަކުން މިއާމީ ގައި ބައްދަލުކޮށް މަޝްވަރާކުރިތާ ގަޑިއިރުކޮޅެއް ގެ ތެރޭގަ އެވެ.
މި ހާދިސާ އާ ބެހޭގޮތުން ޔޫކްރެއިން އިން އަދި އެއްވެސް އެއްޗެއް ބުނެފައެއް ނުވެއެވެ.
ނަމަވެސް ރަޝިޔާގެ ތަހުގީގުކުރާ ފަރާތްތަކުން ބުނީ މި ހާދިސާ އާ ޔޫކްރެއިންގެ ޚާއްސަ ފައުޖުތަކާ ގުޅުންހުރިތޯ ބަލަމުންދާ ކަމަށެވެ.
މި ހަމަލާ ދީފައިވަނީ، ޔޫކްރެއިން އިން ހިންގި ކަމަށް އެނގިފައިވާ، ނުވަތަ ޔޫކްރެއިން އިން ހިންގި ކަމަށް ބޮޑަށް ގަބޫލުކުރެވޭ، ޖެނެރަލުންނާއި ހަނގުރާމަ އަށް ތާއީދުކުރާ ފަރާތްތައް މަރާލަން ދިން އެހެނިހެން ހަމަލާތަކާ އެއްގޮތަކަށް ކަމަށް ރިޕޯޓުތައް ބުނެ އެވެ.
ރަޝިޔާގެ ޖެނެރަލް ސްޓާފްގެ ތަމްރީނު ބައިގެ ވެރިޔާ، 56 އަހަރުގެ ލެފްޓިނަންޓް ޖެނެރަލް ފާނިލް ސަރްވަރޯވް މަރުވެފައި ވަނީ، އޭނާގެ ކާރު ޕާކްކޮށްފައި އޮއްވާ، ކާރުގެ ދަށުގައި ހަރުކޮށްފައިވާ ބޮމެއް ގޮވުމުންނެވެ.
ހާދިސާ ހިނގި ސަރަހައްދުން އެއެފްޕީގެ ރިޕޯޓަރުންނަށް ފެނިފައި ވަނީ ވަރަށް ބޮޑަށް ގެއްލުން ލިބިފައިވާ ހުދު ކުލައިގެ އެސްޔޫވީއެކެވެ. އެ ކާރުގެ ދޮރުތަކާއި ފަހަތު ބިއްލޫރިގަނޑު ވަނީ ވިއްސައިގެން ގޮސްފަ އެވެ. ކާރު އޮތީ ވަރަށް ބޮޑަށް އަނދާފަ އެވެ.
ހާދިސާ ހިނގި ސަރަހައްދު ގެ މީހުން ބުނެފައިވަނީ ބާރުގަދަ އަޑެއް އިވުނު ކަމަށެވެ.
ބޮޑެތި ކުށްތައް ތަހުގީގުކުރާ ރަޝިޔާގެ އިންވެސްޓިގޭޓިވް ކޮމިޓީން ބުނީ، މި މަރުގެ މައްސަލަ ތަހުގީގު ކުރަމުންދާ ކަމަށެވެ. އެގޮތުން، މި ޖަރީމާ ޔޫކްރެއިންގެ ޚާއްސަ ފައުޖުތަކުން ރޭވީ ކަމަށް ވެދާނެ ކަމަށް ބެލެވޭ ކަމަށް ވެސް ބުނެފައިވެ އެވެ.
ސަރްވަރޯވްގެ ރަސްމީ ބަޔޮގްރަފީ ގައި، ރަޝިޔާގެ ދިފާއީ ވުޒާރާގެ ވެބްސައިޓުގައިވާ ގޮތުން، އޭނާ ވަނީ 1990ގެ އަހަރުތަކުގައި ޗެޗްނިޔާ ހިމެނޭ ގޮތަށް، އުތުރު ކޯކަކަސަސް ގައި ހިންގި ރަޝިޔާ ސިފައިންގެ ހަރަކާތްތަކުގައި ބައިވެރިވެފައެވެ.
އަދި 2015-2016 ވަނަ އަހަރު ސީރިޔާ ގައި ހަރަކާތްތެރިވި ރަޝިޔާ ސިފައިންނަށް ވެސް އޭނާ ވަނީ ކޮމާންޑްކޮށްފައެވެ.
