ރަޝިޔާ-ޔުކްރެއިން މައްސަލައިގެ ސުލްޙަ ޤާއިމު ކުރުމަކީ ދުރުގައި އޮތް ކަމެއް ނޫން: އުރުދުޣާން

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައިގެ ސުލްޙަ ޤާއިމު ކުރުމަކީ ދުރުގައި އޮތް ކަމެއް ނޫން ކަމަަށް، ތުރުކީގެ ރައީސް ރަޖަބު ޠައްޔިބު އުރުދުޣާން ވިދާޅުވެއްޖެ އެވެ. 

އުރުދުޣާން މިހެން ވިދާޅުވެފައި ވަނީ ރަޝިޔާގެ ރައީސް ވްލަޑިމިއަރ ޕުޓިންއާ ބައްދަލު ކުރައްވަ އެވެ. އެ ބައްދަލުވުމުގައި ވާހަކަ ދައްކަވަމުން އުރުދުޣާން ވިދާޅުވެފައި ވަނީ އެމެރިކާގެ ރައީސް ޑޮނަލްޑް ޓްރަމްޕްއާ މަޝްވަރާ ކުރެއްވުމަށް އުންމީދު ކުރައްވާ ކަމަށެވެ. އަދި ހަނގުރާމައިގެ ސުލްޙަ ޤާއިމު ކުރުން އެއީ ދުރުގައި އޮތް ކަމެއް ނޫން ކަަމަށް ވެސް ވިދާޅުވެފައިވެ އެވެ. 

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގިރުރާމައިގައި ބަނދަރުތަކާއި، ހަކަތައިގެ ވަސީލަތް ތަކަށް ދެމުން އަންނަ ހަމަލާ ތަކަށް އިޝާރާތް ކުރައްވައި އުރުދުޣާން ވިދާޅުވެފައި ވަނީ، އެ ހަމަލާތައް ވީ އެންމެ އަވަހަކަށް ހުއްޓާލުމަށް އެދިވަޑައިގަންނަވާ ކަމަށެވެ. 

ތުރުކެމިނިސްތާނުގައި ކުރިއަށް ދިޔަ ސަމިޓެއްގެ ތެރެއިން ޕުޓިން އާއި އުރުދުޣާން ވަނީ ބައްދަލު ކުރައްވައިފަ އެވެ. އެގޮތުން ހަނގުރާމަ ނިންމުމަށް ކުރަމުން އަންނަ މަސައްކަތަކީ ވަރަށް އަގު ހުރި މަސައްކަތެއް ކަމަށާއި، އެކަން ކާމިޔާބު ވާާނެ ކަމުގެ އުންމީދު އޮތް ކަމަށް ވެސް އުރުދުޣާން ވިދާޅުވެފައިވެ އެވެ. 

އުރުދުޣާން މިހެން ވިދާޅުވެފައިވާއިރު، ކަޅު ކަނޑުގައި ރަޝިޔާއާ ގުޅުން ހުރި ބައެއް އުޅަނދު ތަކަށް ހަމަލާ ދީފައިވާއިރު، ރަޝިޔާ އިން ބުނެފައި ވަނީ އެކަމުގެ ޒިންމާ ނަގަން ޖެހޭނީ ޔުކްރެއިން އިން ކަމަށެވެ. އެއާ އެކު، ޔުކްރެއިން އިން ވަނީ ބައެއް ހަމަލާ ތަކުގެ ޒިންމާ ނަގާ ކަމަށް ހާމަ ކޮށްފަ އެވެ. އެ ހަމަލާތައް ދީފައި ވަނީ ޑްރޯން ބޭނުން ކޮށްގެން ކަމަށް ރިޕޯޓު ތަކުގައި ބުނެފައިވެ އެވެ. 

އެ ހަމަލާތަކާާ ގުޅިގެން ތުރުކީ އިން ވަނީ ރަޝިޔާ އާއި ޔުކްރެއިންގެ ސަފީރުން ހާޒިރު ކޮށްފަ އެވެ. އަދި އެފަދަ ހަމަލާ ތަކަކީ ކަންބޮޑުވާން ޖެހޭ ފަދަ ހަމަލާ ތަކެއް ކަމަށާއި، އެ ފަދަ ހަމަލާ ދިނުން ހުއްޓާލުމަށް ވެސް ދެ ޤައުމަށް އަންގާފައިވާ ކަމަށް ރިޕޯޓު ތަކުގައި ވަނީ ބުނެފަ އެވެ. 

އެކަމާ ގުޅޭ ގޮތުން މި ފަހުން ވާހަކަ ދައްކަވަމުން ޔުކްރެއިންގެ ރައީސް ވުލޮޑޮމިއަރ ޒެލެންސްކީ ވިދާޅުވެފައި ވަނީ، ހަކަތައިގެ ވަސީލަތްތަކާއި، ދަތުރުފަތުރާ ގުޅޭ ގޮތުން ހަނގުރާމަ ހުއްޓާލުމުގެ ޕްލޭން ތަކެއް ތުރުކީ އިން ރާވަމުން އަންނަ ކަަމަށެވެ. އަދި އެކަމުގެ މައުލޫމާތު ތުރުކީގެ ރައީސް އުރުދުޣާން ހިއްސާ ކުރައްވާފައިވާ ކަމަށާއި، އެކަމަށް ޔުކްރެއިން އިން ތާއީދު ކުރާ ކަމަށް ޒެލެންސްކީ ވިދާޅުވި އެވެ. 

އިތުރަށް ޒެލެންސްކީ ވިދާޅުވީ، ތުރުކީގެ ރައީސް އުރުދުޣާން ހުށަހަޅުއްވާފައި ވަނީ އެކަމާ ގުޅޭ ގޮތުން ބައްދަލުވުން ތަކެއް ބާއްވަވަން ކަމަށެވެ. އެގޮތުން އެންމެ ފުރަތަމަ ޓީމު ފެންވަރުގައި ބައްދަލުވުން ބޭއްވުމަށް ފަހު، ލީޑަރުންގެ ފެންވަރުގައި ބައްދަލުވުމެއް ބާއްވަން ހުށަހަޅުއްވާފައިވާ ކަމަށާއި، އެކަމަށް އޭނާ ހުންނެވީ ތައްޔާރަށް ކަމަށް ޒެލެންސްކީ ވިދާޅުވި އެވެ. 

އިތުރަށް ވާހަކަ ދައްކަވަމުން ޒެލެންސްކީ ވިދާޅުވެފައި ވަނީ، އެމެރިކާ އިން މިހާރު ޤަބޫލު ކުރަނީ ޔުކްރެއިން އިން ހަނގުރާމަ ހުއްޓާލުމުގެ އެއްބަސްވުމަކާ ގާތަށް ދިޔަ ކަމަށެވެ. އެހެން ނަމަވެސް، އެއްބަސްވުމެއްގައި ސޮއި ކުރުމެއް ނެތި ވަގުތީ ގޮތުން ހަނގުރާމަ ހުއްޓާލުމަށް އެއްބަސް ނުވާާނެ ކަމަށް ރަޝިޔާ އިން އެމެރިކާ އަށް އަންގާފައިވާ ކަމުގެ މައުލޫމާތު ލިބޭ ކަަމަށް ޒެލެންސްކީ ވަނީ ވިދާޅުވެފަ އެވެ. 

މިދިޔަ ނޮވެމްބަރު މަހުގެ ތެރޭގައި ޔުކްރެއިން އާއި އެ ޤައުމުގެ ބައިވެރިންނާ އެކު އޮތް ބައްދަލުވުމެއްގައި ތުރުކީގެ ރައީސް އުރުދުޣާން ވިދާޅުވެފައި ވަނީ ބަނދަރު އިންފްރާސްޓްރަކްޗާއާ ގުޅޭ ހަނގުރާމަ ހުއްޓާލުމުގެ އެއްބަސްވުމަކީ، ސުލްޙައިގެ ފުރިހަމަ އެއްބަސްވުމަކަށް މަޝްވަރާ ކުރުމުގެ އަސާސެއް ކަމަށެވެ.

ނޮވެމްބަރު މަހު އުކްރެއިންގެ ބައިވެރިންގެ އޮންލައިން ބައްދަލުވުމެއްގައި އެރުދުގާން ވިދާޅުވީ އެނާޖީ އާއި ބަނދަރު އިންފްރާސްޓްރަކްޗާއާ ގުޅޭ ހަނގުރާމަ ހުއްޓުމުގެ އެއްބަސްވުމަކީ ފުރިހަމަ ސުލްހަ އެއްބަސްވުމަކަށް މަޝްވަރާކުރުމުގެ އަސާސެއް ކަމަށެވެ.