ޔުކްރެއިންގެ ރައްކާތެރިކަން ޔަޤީން ކުރަން ޖެހޭ: ފްރާންސް

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށް މަޝްވަރާ ކުރަމުން އަންނައިރު، ޔުކްރެއިންގެ ސަލާމަތާއި ރައްކާތެރިކަން ޔަޤީން ކުރަން ޖެހޭ ކަމަށް ފްރާންސްގެ ރައީސް އިމަނުއެލް މެކްރޮންގެ ޓީމުން ބުނެފި އެވެ.  

މެކްރޮންގެ ޓީމުން މިހެން ބުނެފައި ވަނީ، ހަނގުރާމަ ނިންމުމުގެ މަޝްވަރާތައް ކުރިއަށް ގެންދަމުން އަންނަ ދަނޑިވަޅެއްގަ އެވެ. ހަނގުރާމަ ނިންމުމަށް ކުރަމުން އަންނަ މަޝްވަރާ ތަކުގައި ފްރާންސް އަކީ އިސް ދައުރެއް އަދާ ކުރަމުން އަންނަ ޤައުމެކެވެ. 

ރަޝިޔާ އިން ވަނީ، ޔުކްރެއިން އިން އެ ޤައުމުގެ ބިމުގެ ބައި ތަކެއް ދޫކޮށްލަން ޖެހޭނެ ކަމަށް ބުނެފަ އެވެ. ނަމަވެސް، މިހާތަނަށް ޔުކްރެއިން އިން އެކަމާ އެއްބަސްވެފައި ނުވާއިރު، ޔުކްރެއިންގެ ރައީސް ވުލޮޑޮމިއަރ ޒެލެންސްކީ ގެންދަވަނީ ތަކުރާރުކޮށް އެކަމާ އިންކާރު ކުރައްވަމުންނެވެ. 

މެކްރޮންއާ ހަވާލާދީ އޭނާ ގެ ޓީމުން ބުނެފައި ވަނީ، ރަޝިޔާ އަށް ޔުކްރެއިންގެ ބިމުން ބައެއް ދޫކުރުމާ ގުޅޭ ގޮތުން މަޝްވަރާތައް ކުރިއަށް ގެންދިޔުމުގެ ކުރިން، ޚަރުދަނާ ގޮތެއްގައި ޔުކްރެއިން އަށް ސަލާމަތާއި ރައްކާތެރިކަން ބޭނުންވާ ކަމަށެވެ. ޔުކްރެއިން އަށް ސަލާމަތީ ޔަޤީންކަން ހޯދުމަށް ކުރަމުން އަންނަ މަސައްކަތުގައި ކުރިއެރުން ތަކެއް ލިބިފައިވާ ކަމަށާއި، އެއީ އެކަމުގައި އެމެރިކާ އިން އެހީތެރިކަން ދިނުމަށް ނިންމާފައިވާތީ ކަމަށް ބުނެފައިވެ އެވެ. 

މި ވާހަކަތައް މެކްރޮންގެ ޓީމުން ދައްކާފައިވާއިރު، ޔުކްރެއިންގެ ރައީސް ޒެލެންސްކީ އާއި، ޔޫރަޕުގެ ލީޑަރުން ވަނީ އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބުންނާ ބައްދަލު ކުރައްވައިފަ އެވެ. ޖަރުމަނުގެ ވެރި ރަށް ބާލިންގައި ކުރިއަށް ދިޔަ އެ ބައްދަލުވުމުގައި މެކްރޮންގެ އިތުރުން، އިނގިރޭސިވިލާތުގެ ބޮޑު ވަޒީރު ކިއާ ސްޓާމާ އަދި ޖަރުމަނުގެ ޗާންސެލަރު ފްރެޑްރިކް މާޒް ވެސް ބައިވެރިވެ ވަޑައިގެންފައިވެ އެވެ. 

ޓްރަމްޕްގެ ޚާއްސަ މަންދޫބުން ކަަމަށްވާ ސްޓީވް ވިޓްކޮފް އާއި ޖެރާޑް ކުޝްނާއާ އެކު ބޭއްވި މި ބައްދަލުވުމުގެ މައިގަނޑު މަޤުސަދަކީ ހަނގުރާމަ ނިންމުމަށް އެއްބަސްވުމެއް ޤާއިމު ކުރުމެވެ. ތިން އަހަރަށް ވުރެ ގިނަ ދުވަސްވެފައިވާ މި ހަނގުރާމަ ނިންމުމަށް ބައިނަލްއަޤުވާމީ މުޖުތަމައުން އަންނަނީ ގިނަ މަސައްކަތް ތަކެއް ކުރަމުންނެވެ.

ފްރާންސް އިން ފާހަގަ ކޮށްފައިވާ ގޮތުގައި ޔުކްރެއިން އަށް ރައްކާތެރިކަން ދިނުމުގެ ކަންކަން ސާފު ކުރުމަކީ މުހިންމު ކަމެކެވެ. ޔުކްރެއިންގެ ދިފާއުގައި ވަރަށް ބޮޑަށް ވަކާލާތު ކުރަމުން އަންނަ ފްރާންސް އިން ބުނެފައި ވަނީ، ބިމުގެ މައްސަލައިގައި މަޝްވަރާތައް ކުރުމުގެ ކުރިން، ޔުކްރެއިން އަށް ބޭނުންވާ ސަލާމަތީ ޔަޤީންކަން ކަށަވަރު ވާން ޖެހޭ ކަމަށް އެ ޤައުމުން ދެކޭ ކަމަށެވެ. 

ހަނގުރާމަ ނިންމުމަށް މިހާތަނަށް ވެސް ގިނަ މަސައްކަތް ތަކެއްކޮށް، އެތައް މަޝްވަރާ ތަކެއް ބާއްވާފައިވާއިރު، ޔުކްރެއިންގެ ބިން ތަކާއި އެ ޤައުމުގެ ސިޔާދަތު ރައްކާތެރިކޮށް، ކަށަވަރު ކުރުމަށް ބައިނަލްއަޤުވާމީ މުޖުތަމައުން ވެސް އަންނަނީ ގޮވާލަމުންނެވެ. އަދި ރަޝިޔާ އިން ކުރާ ހުރިހާ ޑިމާންޑަކަށް ދީލާާލައިގެން ނުވާނެ ކަމަށް ވެސް އެ ފަރާތްތަކުން އަންނަނީ ފާހަގަ ކުރަމުންނެވެ. 

ޖަރުމަނުގެ ބާލިންގައި ކުރިއަށް ގެންދިޔަ މަޝްވަރާ ތަކަށް ބަލާއިރު، އެ މަޝްވަރާ ތަކަކީ ހަނގުރާމަ ނިންމުމަށް ހައްލު ހޯދުމަށް މުހިންމު މަޝްވަރާ ތަކެއް ކަމަށް މާހިރުން ވަނީ ފާހަގަ ކޮށްފަ އެވެ.