ޣައްޒާ ގައި އިޒްރޭލުން ހިންގި ހަނގުރާމައިގެ ޖަރީމާތަކުގެ ތަހުގީގަށް ހުރަސް އަޅަން އިޒްރޭލުން ކުރި މަސައްކަތް އައިސީސީ އިން ބޭރު ކޮށްލައިފި

ޣައްޒާ ގައި ފަލަސްތީން ރައްޔިތުންނާ ދެކޮޅަށް އިޒްރޭލުން ހިންގި ޖަރީމާތަކުގެ ތަހުގީގު ހުއްޓުވުމަށް އިޒްރޭލުން ހުށަހެޅި ހުށަހެޅުމެއް އިންޓަނޭޝަނަލް ކްރިމިނަލް ކޯޓު (އައިސީސީ)ގެ އިސްތިއުނާފު މަޖިލީހުން ބަލައި ނުގަނެ ބޭރު ކޮށްލައިފި އެވެ.

ހޯމަ ދުވަހު ކޯޓުން އާންމު ކުރި ނިންމުމުގައި، 2023 އޮކްޓޯބަރު 7 ވަނަ ދުވަހު ހަމާސް އިން އިޒްރޭލުގެ ދެކުނަށް ދިން ހަމަލާއަށް ފަހު، ޣައްޒާ އަށް އިޒްރޭލުން ދިން ހަމަލާތަކުގައި ހިންގި ކަމަށް ބުނާ ޖަރީމާ ތަކުގެ ތަހުގީގު ހިންގުމަށް އައިސީސީ އިން ޕްރޮސިކިއުޓަރަށް ދިން ހުއްދަ ބާތިލް ކުރުމަށް ފަނޑިޔާރުން ދެކޮޅު ހަދާ ކަމަށް ބުނެފައި ވެއެވެ.

މި ނިންމުމާ އެކު، ކޯޓުން ކުރިއަށް ގެންދާ ތަހުގީގަށް ހުއްޓުމެއް ނައިސް ކުރިއަށް ގެންދިއުމަށް މަގު ފަހިވެގެން ދާނެ ކަމަށް ބެލެ އެވެ.

މި ތަހުގީގު ގެ ދަށުން ހުސްވި އަހަރުގެ ނޮވެމްބަރު މަހު އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި ކުރީގެ ދިފާއީ ވަޒީރު ޔޯވް ގަލަންޓް ހިންގާފައިވާ ހަނގުރާމައިގެ ކުށްތަކާއި އިންސާނިއްޔަތާ ދެކޮޅު ކުށްތަކުގެ ތުހުމަތުގައި ހައްޔަރު ކުރުމުގެ އަމުރެއް އައިސީސީ އިން ވަނީ ނެރެފަ އެވެ.

ދަ ހޭގް ގައި ހުންނަ މި ކޯޓުގެ ގާނޫނީ ހައިސިއްޔަތު އިޒްރޭލުން ގަބޫލު ނުކުރާއިރު، ޣައްޒާ ގައި ހަނގުރާމައިގެ ކުށްތައް ހިންގި ކަމަށް ބުނާ ވާހަކަ އެތައް ފަހަރަކު އިޒްރޭލުގެ ވެރިން ދޮގުކޮށްފައިވެ އެވެ.

އައިސީސީ ން ހަމާސްގެ ލީޑަރު އިބްރާހިމް އަލް-މަސްރީ ހައްޔަރު ކުރުމަށް ވެސް ވޯރަންޓެއް ނެރުނެވެ. ނަމަވެސް އޭނާ މަރުވި ކަމުގެ އިތުބާރު ހުރި ރިޕޯޓުތައް ލިބުމުން އެ ވޯރަންޓު ފަހުން އަނބުރާ ގެންދިޔައެވެ.

ކޯޓުގެ ނިންމުމުގައި ވަނީ ނަތަންޔާހޫ އާއި ގަލަންޓަށް ނެރުނު ހައްޔަރު ކުރުމުގެ ވޯރަންޓުތައް މިހާރު ވެސް ސައްހަ ކަމަށެވެ.

މި ހުކުމް ނެރެވުނީ، އިޒްރޭލުން ޣައްޒާ އަށް ދެމުން އަންނަ ހަމަލާތަކުން ވަރަށް ބޮޑަށް ގެއްލުން ލިބެމުން އަންނަ ދަނޑިވަޅެއްގައެވެ. 2025 އޮކްޓޯބަރު 11 ވަނަ ދުވަހު ހަނގުރާމަ ހުއްޓާލުމުގެ އަމުރު ތަންފީޒު ކުރަން ފެށި ފަހުން، ޣައްޒާ ގެ ސިއްހަތާ ބެހޭ އޮފިޝަލުން ބުނާ ގޮތުގައި، މަދުވެގެން 391 ފަލަސްތީނު ރައްޔިތުން ޝަހީދުވެފައިވާ އިރު، 1،063 މީހުން ޒަހަމް ވެފައިވެއެވެ. އަދި މަރުވެފައިވާ 632 މީހުންގެ ހަށިގަނޑު ހޯދިފައިވެއެވެ.

2023 އޮކްޓޯބަރު 7 ވަނަ ދުވަހުން ފެށިގެން، މަދުވެގެން 70،663 ފަލަސްތީނު ރައްޔިތުން ޝަހީދުވެފައިވާ އިރު، 171،139 މީހުން ޒަހަމް ވެފައިވެއެވެ.