ގަދަ ވިއްސާރައިގެ ސަބަބުން ޣައްޒާ އިން 16 މީހަކު މަރުވިއިރު، ގަދަ ފިނީގެ ސަބަބުން ތިން ކުޑަ ކުދިން ވެސް މަރުވެއްޖެ

ޣައްޒާގައި ގަދަ ވިއްސާރައިގެ ސަބަބުން ފާއިތުވި 24 ގަޑިއިރުގެ ތެރޭގައި މަދު ވެގެން 16 މީހަކު މަރުވެފައިވާ ކަމަށް، ޣައްޒާގެ ސިވިލް ޑިފެންސް އިން ހާމަ ކޮށްފި އެވެ. 

ސިވިލް ޑިފެންސް އިން ހާމަ ކޮށްފައިވާ ގޮތުގައި މަރުވި މީހުންގެ ތެރޭގައި، ގަދަ ފިނީގެ ސަބަބުން މަރުވި ތިން ކުޑަ ކުދިން ވެސް ހިމެނެ އެވެ. ހަނގުރާމައިގައި ދެ އަހަރަށް ވުރެ ގިނަ ދުވަސްވެފައިވާއިރު، މިއީ ޣައްޒާ އަށް ކުރިމަތިވި ގަދަ ވިއްސާރައިގެ ސަބަބުން ހިނގާފައިވާ މަރުގެ ހާދިސާ ތަކެއް ކަމަށް ބުނެފައިވެ އެވެ. 

މިދިޔަ ބުދަ ދުވަހުން ފެށިގެން ޣައްޒާ ހުރިހާ ސަރަހައްދަކަށް ވެސް ވައި ގަދަވެ ވިއްސާރަ ކޮށްފައިވާއިރު، ބައެއް ސަރަހައްދު ތަކުގައި ވަނީ ފެންބޮޑުވެފަ އެވެ. މިއީ ހަނގުރާމައިގެ ސަބަބުން މިހާރު ވެސް އެތައް ދަތި ކަމެއް ކުރިމަތިވެފައިވާ ޣައްޒާގެ ރައްޔިތުުންނަށް ކުރިމަތިވެފައިވާ އިތުރު ދަތި ކަމެއް ކަމަށް ފާހަގަ ކޮށްފައިވެ އެވެ. 

ފިނި ގަދަ ވުމުގެ ސަބަބުން މަރުވެފައިވާ ތިން ކުދިންގެ ތެރެއިން، ދެ ކުދިން މަރުވެފައި ވަނީ ޣައްޒާ ސިޓީގަ އެވެ. އަނެއް ކުއްޖާ މަރުވެފައި ވަނީ ޣައްޒާގެ ދެކުނުގައި އޮންނަ ޚާން ޔުނިސްގައި ކަމަށް ސިވިލް ޑިފެންސް އިން ވަނީ ހާމަ ކޮށްފަ އެވެ. 

ޣައްޒާގެ އަލް ޝިފާ ހޮސްޕިޓަލް އިން ބުނެފައި ވަނީ ނުވަ އަހަރުގެ ހަދީލް އަލް މަސްރީ އާއި، އެންމެ ހަތަރު މަަސް ދުވަހުގެ ތައިމް އަލް ހަވާޖާ ނަމަކަށް ކިޔާ ދެ ކުދިން މަރުވެފައިވާ ކަމަށެވެ. ޚާން ޔުނިސްގައި ހުންނަ އަލް ނާޞިރު ހޮސްޕިޓަލް އިން ބުނީ، އަށް މަސް ދުވަހުގެ ރަފާޙް އަބޫ ޖަޒާރު ނަމަކަށް ކިޔާ ކުއްޖަކު މަރުވެފައިވާއިރު، އެ ކުއްޖާ މަރުވެފައި ވަނީ އަލް މަވާސީގެ ތަންބު ކޭމްޕުގައި ފިނި ގަދަ ވުމުގެ ސަބަބުންނެވެ. 

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ސަބަބުން، ޣައްޒާގެ ގިނަ އިމާރާތް ތަކެއް ވަނީ ބިމާ ހަމަވެ، ސުންނާފަތިވެފަ އެވެ. މިހާރު ޣައްޒާގެ އެކި ސަރަހައްދު ތަކުގައި ވަނީ އެތައް ހާހުން ވަގުތީ ހިޔާވަހިކަން ޤާއިމު ކޮށްފަ އެވެ. އެ ތަންތަނުގައި ގިނަ ބަޔަކު އަންނަނީ ހިޔާވަހިކަން ހޯދަމުންނެވެ. 

ޣައްޒާގެ ސިވިލް ޑިފެންސްގެ ތަރުޖަމާނު މަޙުމޫދު ބައްސާލް ވިދާޅުވީ، އުތުރުގައިވާ ބީރު އަލް ނަޖާ ސަރަހައްދުގައި ގެއެއް ވެއްޓިފައިވާ ކަމަށާއި، އެ ހާދިސާގައި ހަ މީހަކު މަރުވެފައިވާ ކަމަށެވެ. ޣައްޒާގެ ޝައިޚް ރަދްވާން ސަރަހައްދުގައި ހުރި ގެއެއްގެ ތެރެއިން އިތުރު ދެ މީހެއްގެ ހަށިގަނޑު ފެނިފައިވާ ކަމަށް ވެސް އޭނާ ވަނީ ވިދާޅުވެފަ އެވެ. 

އިތުރަށް ބައްސާލް ވިދާޅުވީ، އިތުރު ފަސް މީހުން މަރުވެފައި ވަނީ ތަފާތު އެކި ހާދިސާ ތަކުގެ ސަބަބުން ކަމަށެވެ. ސިވިލް ޑިފެންސްގެ ބަޔާނުގައި ބުނީ ބޯކޮށް ވިއްސާރަ ވުމުގެ ސަބަބުން ވައިގަދަވެ 13 އިމާރާތެއް ވެއްޓިފައިވާ ކަމަށެވެ. އަދި ސަލާމަތީ ޚިދުމަތް ފޯރުކޮށްދޭ ފަރާތްތަކުން އަންނަނީ އެ ތަންތަނުގައި ޙަރަކާތްތެރި ވަމުން ކަމަށް ވެސް ބުނެފައިވެ އެވެ.