ހަމާސް ގެ ސީނިއާ ކޮމާންޑަރަކު ޣައްޒާ ގައި ޝަހީދު ކޮށްލައިފި

ހަމާސް ގެ ސީނިއާ ކޮމާންޑަރު ރައީދު ސައީދު ޣައްޒާ ގައި އިޒްރޭލުން ޝަހީދު ކޮށްލައިފި އެވެ.

އޭނާ އަކީ 2023 އޮކްޓޯބަރު 7 ގައި އިޒްރޭލަށް ހަމާސް އިން ދިން ހަމަލާ ރޭވުމުގައި އިސްކޮށް ހަރަކާތްތެރިވި ފަރާތެއް ކަމަށް ރިޕޯޓް ތައް ބުނެއެވެ.

އޭނާ ޝަހީދު ކޮށްލީ ހޮނިހިރު ދުވަހު ޣައްޒާ ސިޓީގައި ކާރަކަށް ދިން ހަމަލާއެއްގަ އެވެ.

މި ހަމަލާގައި ހަތަރު މީހުން މަރުވެ، މަދުވެގެން 25 މީހުން ޒަހަމްވެފައިވާ ކަމަށް ޣައްޒާ ގެ ސިއްހީ އޮތޯރިޓީތަކުން ބުނެފައިވެއެވެ. މަރުވި މީހުންގެ ތެރޭގައި ސައީދު ހިމެނޭ ކަން ހަމާސް އިން އަދި ޑޮކްޓަރުންގެ ފަރާތުން ވިޔަސް ކަށަވަރުކޮށްދީފަ އެއް ނުވެއެވެ.

އިޒްރޭލު ސިފައިން ބުނެފައިވަނީ ޣައްޒާ ސިޓީގައި ހަމާސްގެ ސީނިއާ ކޮމާންޑަރަކަށް ހަމަލާ ދީފައިވާ ކަމަށެވެ. ނަމަވެސް ނަން ހާމަ ކޮށްފަ އެއް ނުވެއެވެ.

އިޒްރޭލުގެ ދިފާއީ އޮފިޝަލަކު ރޮއިޓާސް އަށް ބުނެފައިވަނީ މި ހަމަލާގައި ސައީދަށް އަމާޒު ކޮށްފައިވާ ކަމަށާއި، އަދި އޭނާ އަކީ ހަމާސް ގެ ހަތިޔާރު އުފައްދާ ބައިގެ އިސް ވެރިޔާ ކަމަށް ވެސް ބުނެފައިވެއެވެ. 

ހަމާސްގެ މަސްދަރުތަކުން ވެސް ސައީދު ސިފަކޮށްފައިވަނީ އިއްޒުއްދީން އަލް-ހައްދާދުގެ ފަހުން، ގްރޫޕްގެ ސިފައިންގެ ބާރުގެ ދެވަނަ އިސްވެރިޔާ ކަމަށެވެ.