ޒެލެންސްކީ އާއި ޔޫރަޕުގެ ލީޑަރުންނާ ބައްދަލު ކުރައްވަން ވިޓްކޮފް ޖަރުމަނަށް ވަޑައިގަންނަވަނީ

ޔުކްރެއިންގެ ރައީސް ވުލޮޑޮމިއަރ ޒެލެންސްކީ އާއި ޔޫރަޕުގެ ލީޑަރުންނާ ބައްދަލު ކުރައްވަން، އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް ޖަރުމަނަށް ވަޑައިގަންނަވާ ގޮތަށް ހަމަޖެހިއްޖެ އެވެ. 

ކުރިއަށް އޮތް ހަފްތާ ބަންދުގެ ތެރޭގައި އޮންނަ އެ މަޝްވަރާ ތަކުގައި، ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިންމުމަށް ކުރިއަށް ގެންދާ މަތީ ފަންތީގެ މަޝްވަރާ ތަކާ މެދު ވާހަކަ ދައްކަވާނެ އެވެ. 

ޖަރުމަނުގެ ވެރި ރަށް ބާލިންގައި އޮންނަ އެ މަޝްވަރާ ބައްދަލުވުމުގައި، އެމެރިކާ އިން ކުރަމުން އަންނަ މަސައްކަތް ތަކުގެ އެންމެ ފަހުގެ މައުލޫމާތު ވެސް ވިޓްކޮފް ހިއްސާ ކުރައްވާނެ އެވެ. ޓްރަމްޕް އާއި އެމެރިކާ އިން މަސައްކަތް ކުރަމުން އަންނަނީ ވީ އެންމެ އަވަސް މުއްދަތެއްގެ ތެރޭގައި ސުލްޙައިގެ އެއްބަސްވުމެއް އެކުލަވާލުމަށެވެ. އެކަމުގައި މިހާތަނަށް ވަނީ ޔުކްރެއިން އާއި ރަޝިޔާގެ އޮފިޝަލުންނާ ދެމެދު ގިނަ ބައްދަލުވުން ތަކެއް ބާއްވައިފަ އެވެ. 

ޖަރުމަނުގައި އޮންނަ މަޝްވަރާގައި ޔޫރަޕުގެ ލީޑަރުންގެ ތެރެއިން ބައިވެރި ވާނީ ކޮން ލީޑަރުންނެއް ކަމަށް މިހާތަނަށް ޔަގީންވެފައި ނުވެ އެވެ. ނަމަވެސް، އެމެރިކާގެ ވޯލް ސްޓްރީޓް ޖާނަލް އިން ރިޕޯޓު ކޮށްފައިވާ ގޮތުގައި އިނގިރޭސިވިލާތުގެ ކީ ސްޓާމާ އާއި، ފްރާންސްގެ ރައީސް އިމަނުއެލް މެކްރޮން އަދި ޖަރުމަނުގެ ޗާންސެލަރު ފްރެޑްރިކް މާޒް މި މަޝްވަރާގައި ބައިވެރިވެ ވަޑައިގަންނަނަވާނެ އެވެ. 

މި ބައްދަލުވުން ބާއްވަން ތައްޔާރު ވަމުން އަންނައިރު،  ދާދި ފަހުން ޔުކްރެއިން އިން ވަނީ އެމެރިކާ އިން ހުށަހަޅާފައިވާ ސުލްޙައިގެ ޕްލޭން އިސްލާޙު ކުރުމަށް ބޭނުންވާ ކަމަށް ހާމަ ކޮށްފަ އެވެ. އެއާ އެކު، ޔޫރަޕުގެ ލީޑަރުންނާއި ޒެލެންސްކީ، ލަންޑަންގައި ބޭއްވި ބައްދަލުވުމުގައި އެކަން ކަަމަށް މަޝްވަރާ ކޮށްފައިވާ ކަމަށާއި، އިސްލާޙު ގެންނަން ބޭނުންވާ ކަންކަން އެމެރިކާ އަށް އަންގާނެ ކަމަށް ވެސް ބުނެފައިވެ އެވެ، 

ރަޝިޔާ އިން އަންނަނީ ހުއްޓުމެއް ނެތި ޔުކްރެއިން އަށް އެކި ފަހަރު މަތިން ހަމަލާތައް ދެމުންނެވެ. ދާދި ފަހުން ވެސް ރަޝިޔާ އިން ޔުކްރެއިން އަށް ހަމަލާ ދީފައިވާއިރު، ޒެލެންސްކީ ވިދާޅުވެފައި ވަނީ އާންމު ތަންތަނާއި، ހަކަތަ އަދި ސިނާއީ ބިނާ ތަކަށް ވެސް ރަޝިޔާ އިން ހަމަލާ ދީފައިވާ ކަމަށެވެ. އެ ހަމަލާ ތަކުގައި 450 އަށް ވުރެ ގިނަ ޑްރޯން އަދި 30 މިސައިލް ބޭނުން ކޮށްފައިވާ ކަމަށް ވެސް ހާމަ ކޮށްފައިވެ އެވެ. ހަމަލާ ތަކުގައި ދެ މީހަކަށް އަނިޔާވެފައިވާއިރު، ހަތް ސަރަަހައްދެއްގައި ކަރަންޓު ކެނޑުގެ މައްސަލަ ވަނީ ދިމާވެފަ އެވެ.

ދެ ވަނަ ބޮޑު ހަނގުރާމަ އަށް ފަހު، ޔޫރަޕުގައި ހިނގަމުން އަންނަ އެންމެ ބޮޑު މި ހަނގުރާމަ ނިންމުމަށް ބައިނަލްއަޤުވާމީ މުޖުތަމައުން އަންނަނީ ވަރަށް ބޮޑަށް މަސައްކަތް ކުރަމުންނެވެ. އެކަމުގައި އެންމެ ބޮޑު ދައުރެއް އަދާ ކުރާ އެއް ޤައުމަކީ އެމެރިކާ ކަމަށްވާއިރު، ރަޝިޔާގެ މަސްލަޙަތު ހިމާޔަތް ކުރުމަށް އެ ޤައުމުން މަސައްކަތް ކުރަމުން އަންނަ ކަމަށް ބުނެ އެމެރިކާ އަށް ނުރުހުން އަމާޒުވެފައިވެ އެވެ. ނަމަވެސް، އެމެރިކާ އިން ވަނީ އެކަން ދޮގު ކޮށްފަ އެވެ.