ޔުކްރެއިންގެ މައްސަލައާ ގުޅޭ ގޮތުން ފްރާންސްގެ ރައީސް އިމަނުއެލް މެކްރޮން އާއި އިނގިރޭސިވިލާތުގެ ބޮޑު ވަޒީރު ކިއާ ސްޓާމާ އަދި ޖަރުމަނުގެ ޗާންސެލަރު ފްރެޑްރިކް މާޒް، އެމެރިކާާގެ ރައީސް ޑޮނަލްޑް ޓްރަމްޕްއާ މަޝްވަރާ ކުރައްވައިފި އެވެ.

ފްރާންސްގެ ރިޔާސީ ގަނޑުވަރުން ބުނެފައިވާ ގޮތުގައި، މި ލީޑަރުން ޓްރަމްޕްއާ މަޝްވަރާ ކުރައްވާފައި ވަނީ ބުދަ ދުވަހު އެވެ. އެގޮތުން އެ ފޯނު ކޯލު ގާތް ގަނޑަކަށް 40 މިނެޓަށް ދިގު ދެމިގެން ދިޔަ ކަމަށް ވަނީ ބުނެފަ އެވެ. އެގޮތުން އެ މަޝްވަރާގައި ވަނީ ޔުކްރެއިންގެ މިހާރުގެ ޙާލަތާ ގުޅޭ ގޮތުން ވަރަށް ތަފްސީލީ ގޮތެއްގައި މަޝްވަރާ ކުރައްވައިފަ އެވެ.

ފްރާންސް ސަރުކާރުގެ ތަރުޖަމާނު ވިދާޅުވެފައިވާ ގޮތުގައި، ޔުކްރެއިން އަށް އެހީތެރިވާ ޤައުމު ތަކުގެ ލީޑަރުން ބުރާސްފަތި ދުވަހު ވީޑިއޯ ކޯލް މެދުވެރިކޮށް މަޝްވަރާ ކުރައްވާނެ އެވެ. މި ބައްދަލުވުން ބޭއްވުމަށް ނިންމާފައި މި ވަނީ، ރަޝިޔާ ހަނގުރާމަ ނިންމުމަށް ޓްރަމްޕްގެ ފަރާތުން ބާރު އަޅަމުން އަންނަ ދަނޑިވަޅެއްގަ އެވެ. އަދި ސުލްޙައިގެ ޕްލޭން އަށް އެއްބަސްވުމަށް ޔުކްރެއިން އަށް ވެސް ގޮވާލަމުން އަންނަ ވަގުތެއްގަ އެވެ.

މެކްރޮން އާއި ސްޓާމާ އަދި މާޒް، ޓްރަމްޕްއާ މަޝްވަރާ ކުރައްވާފައިވާއިރު، ސަލާމަތީ ކަންކަން ކަށަވަރު ކުރެވޭ ނަމަ ޔުކްރެއިންގެ އިންތިޚާބު ބޭއްވުމަށް ވެސް ތައްޔާރަށް ހުންނެވި ކަމަށް ޒެލެންސްކީ ވަނީ ވިދާޅުވެފަ އެވެ. ޒެލެންސްކީ އެހެން ވިދާޅުވެފައިވާއިރު، މިއީ ޔުކްރެއިންގެ ސިޔާސީ މުސްތަޤުބަލާ ގުޅޭ މުހިންމު ވާހަކައެއް ކަމަށް މާހިރުން ވަނީ ފާހަގަ ކޮށްފަ އެވެ.

މި ހަފްތާގެ ހޯމަ ދުވަހު ޔޫރަޕުގެ ލީޑަރުން ވަނީ އިނގިރޭސިވިލާތުގެ ވެރި ރަށް ލަންޑަންގައި ޒެލެންސްކީއާ އެކު މަޝްވަރާ ކުރުންތައް ކުރިއަށް ގެންގޮސް، ޔުކްރެއިން އަށް އޮތް ތާއީދު ދައްކުވައި ދީފަ އެވެ. އެގޮތުން ޔުކްރެއިންގެ ސަލާމަތާއި ރައްކާތެރިކަން އަދި ޔުކްރެއިންގެ މަސްލަޙަތު ހިމާޔަތް ކުރުމުގައި ޤައުމު ތަކުން ދެމި އޮންނާނެ ކަމުގެ ޔަގީންކަން ވެސް ވަނީ އެ ބައްދަލުވުމުގައި ދީފަ އެވެ.

ރަޝިޔާ އިން ޔުކްރެއިންއާ ދެކޮޅަށް ހަމަލާތައް ފަށައި، ހަނގުރާމަ ފެށި ފަހުން ދެ އަހަރަށް ވުރެ ގިނަ ދުވަސްވެފައިވާއިރު، މި ހަނގުރާމަ ނިންމުމަށް ބައިނަލްއަޤުވާމީ މުޖުތަމައުން އަންނަނީ ވަރަށް ބޮޑަށް ބާރު އަޅަމުންނެވެ. ޚާއްސަކޮށް އެމެރިކާ އިން މިކަމުގައި އިސް ދައުރެއް އަދާ ކުރަމުން އަންނައިރު، ހަނގުރާމަ ނިމުމަކަށް ގެނައުމަކީ އެމެރިކާގެ ރައީސް ޓްރަމްޕް ވައުދުވެ ވަޑައިގެންފައިވާ ކަމެކެވެ.

ޔޫރަޕުގެ ލީޑަރުންނާއި، އެމެރިކާގެ ރައީސް ޓްރަމްޕްއާ ދެމެދު މިފަދަ ފޯނު ކޯލު މަޝްވަރާއެއް ކުރިއަށް ދިޔުމަކީ، ޔުކްރެއިން ހަނގުރާމަ ނިންމުމަށް ހަމަހަމަ އަދި ދެމެހެއްޓެނިވި ޙައްލެއް ހޯދުމަށް ބައިނަލްއަޤުވާމީ މުޖުތަމައުން ކުރަމުން އަންނަ މަސައްކަތް ތަކުގެ ބައެއް ކަމުގައި މާހިރުން ފާހަގަ ކޮށްފައިވެ އެވެ.