އެމެރިކާގެ ހުށަހެޅުން ޒެލެންސްކީ ވިދާޅުވެފައި ނެތުމުން، ޓްރަމްޕް ހިތްހަމަ ނުޖެހިއްޖެ

ރަޝިޔާ އާއި ޔުކްރެއިން އާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށް އެމެރިކާ އިން ހުށަހަޅާފައިވާ ހުށަހެޅުން، ޔުކްރެއިން ގެ ރައީސް ވުލޮޑޮމިއަރ ޒެލެންސްކީ ވިދާޅުވެފައި ނެތް ކަމަށާއި، އެއީ ހިތްހަމަ ނުޖެހޭ ކަމެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ކެނެޑީ ސެންޓަރު އޮނަރސް ހަފްލާ އަށް ވަޑައިގެންނެވުމުގެ ތެރޭގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ރަޝިޔާ ގެ ރައީސް ވްލަޑިމިއަރ ޕުޓިން އާއި ޔުކްރެއިން ގެ ރައީސް ޒެލެންސްކީ ހިމެނޭހެން ޔުކްރެއިން ގެ ލީޑަރުންނާ މަޝްވަރާ ކުރައްވަމުން ގެންދަވާ ކަމަށެވެ.

ނަމަވެސް، މިހާތަނަަށް އައިއިރު އެމެރިކާގެ ހުށަހެޅުން ޔުކްރެއިން ގެ ރައީސް ޒެލެންސްކީ ވިދާޅުވެފައި ނެތުމަކީ ކަންބޮޑުވާ ކަމެއް ކަމަށް ޓްރަމްޕް ވިދާޅުވެފައިވެ އެވެ. ޓްރަމްޕް ވިދާޅުވީ، އެންމެ ފަހުން އޭނާ އަށް ލިބިވަޑައިގެންފައިވާ މައުލޫމާތަށް ބަލާއިރު، ޒެލެންސްކީ އެ ހުށަހެޅުން ވިދާޅުވެފަ އެއް ނެތެވެ.

އެމެރިކާ އާއި ޔުކްރެއިން ގެ އޮފިޝަލުންނާ ދެމެދު ކުރިއަށް ގެންދިޔަ މަޝްވަރާތައް މިދިޔަ ހޮނިހިރު ދުވަހު ވަނީ ނިމިފަ އެވެ. ނަމަވެސް، އެކި އެކި މަސްދަރުތަކާ ހަވާލާދީ މީޑިއާ ތަކުގައި ބުނެފައި ވަނީ، އެ މަޝްވަރާ ތަކުގައި ފާހަގަ ކުރެވޭ ފަދަ ކުރިއެރުމެއް ލިބިފައި ނުވާ ކަމަށެވެ. އެހެން އެކަން އޮތް ނަމަވެސް، ހަގީގީ ސުުލްހަ އެއް ޤާއިމު ކުރުމަށް އިތުރު މަޝްވަރާތައް ކުރިއަށް ގެންދިޔުމަށް ޒެލެންސްކީ ވައުދުވެ ވަޑައިގެންފައިވާ ކަމަށް ފާހަގަ ކޮށްފައިވެ އެވެ.

މި މަޝްވަރާތައް ބާއްވާފައި ވަނީ އެމެރިކާގެ ރައީސް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް އާއި، ޓްރަމްޕްގެ ދަރިކަލުން ޖެރާޑް ކުޝްނާ، ރަޝިޔާ ގެ ރައީސް ޕުޓިން އާ ބައްދަލު ކުރައްވައި އެމެރިކާގެ ހުށަހެޅުން ތަފްސީލު ކޮށްދީފައި ވަނިކޮށެވެ. އެއާ އެކު، އެމެރިކާގެ ހުށަހެޅުމުގެ ބައެއް ކަންކަން ރަޝިޔާ އިން ޤަބޫލު ނުކުރާ ކަމަށް ވެސް ބުނެފައިވެ އެވެ.

އެމެރިކާގެ ފަރާތުން ހުށަހަޅާފައިވާ ޕްލޭން މިދިޔަ ނޮވެމްބަރު މަހުގެ ތެރޭގައި ވަނީ އާންމުވެފަ އެވެ. އެ ޕްލޭން އަށް ޔުކްރެއިން އާއި ޔޫރަޕުގެ ގިނަ ޤައުމު ތަކުންް ނުރުހުން ފާޅު ކޮށްފައި ވީ ނަމަވެސް، އެމެރިކާ އިން ކުރަމުން އަންނަ މަސައްކަތް ފާހަގަ ކުރާ ކަމަށް ބުނެފައިވެ އެވެ. ޕްލޭންގައި އެންމެ ބޮޑު މައްސަލައެއްގެ ގޮތުގައި ފާހަގަ ކޮށްފައި ވަނީ، ތިން އަހަރު ދުވަސްވީ ހަނގުރާމަ ހިންގި ރަޝިޔާ އާ ދެމެދު ލުއިކޮށް ކަންތައް ކުރުމަށް ހިމަނާފައިވާތީ އެވެ.

ޓްރަމްޕް ވިދާޅުވެފައި ވަނީ، މިހާރު ކުރަމުން އަންނަ މަސައްކަތަކީ ތިން އަހަރަށް ދެމިގެން ގޮސްފައިވާ ހަނގުރާމަ އެއް ނިންމުމަށް ކުރަމުން އަންނަ މަސައްކަތް ކަމަށެެވެ. އަދި އެ މައްސަލައިގައި އެކަށީގެންވާ ޙައްލެއް ހޯދުމަށް އެމެރިކާ އިން ވަރަށް ބޮޑަށް މަސައްކަތް ކުރަމުންދާ ކަމަށް ވެސް ޓްރަމްޕް ވިދާޅުވެފައިވެ އެވެ.

މަޝްވަރާތައް ކުރިއަށް ގެންދަމުން އައި ނަމަވެސް، ދެ ފަރާތުގެ ދެމެދުގައި ސުލްޙަ ޤާއިމު ކުރުމަށް ދަތިވެފައި ވަނީ އިންތިހާ އަށް ޚިޔާލު ތަފާތުވުން އޮތުމުން ކަމަށް މަސްރަހު ދިރާސާ ކުރާ ފަރާތްތަކުން ބުނެފައިވެ އެވެ.

މި ހަނގުރާމައިގައި އެތައް ހާސް ބަޔަކު މަރުވެފައިވާއިރު، އެތައް މިލިއަން ބަޔަކަށް ވަނީ ގެދޮރު ދޫކޮށް ދާން މަޖުބޫރުވެފަ އެވެ. މި ދަނޑިވަޅަކީ، ހަނގުރާމަ ނިމުމަށް ގެނައުމަށް ބައިނަލްއަޤުވާމީ މުޖުތަމައުން ވެސް ވަރަށް ބޮޑަށް ގޮވާލަމުން އަންނަ ވަގުތެކެވެ.