ކޮވިޑުގެ ތެރޭގައި ސަރުކާރުން އެތަކެއް ވަޒީފާ ތަކެއް ސަލާމަތްކޮށް، ނުރައްކާ ކުޑަ ކުރި: ކުރީގެ ބޮޑު ވަޒީރު ސުނާކް
18 ޑިސެމްބަރު 2025 | ބުރާސްފަތި 06:02ކޮވިޑު ފެތުރެމުން ދިޔަ ދުވަސްވަރު ކަންތައް ވެގެން ދިޔަ ގޮތުގެ ވާހަކަ ދައްކަވަމުން ސުނާކް ވިދާޅުވީ، ކޮވިޑުގެ ސަބަބުން ޤައުމުގެ އިޤްތިޞާދަށް ކުރިމަތިވި އަސަރާއި، އެކަން ކަމާ ކުރިމަތިލާނެ ގޮތް ފޮތެއްގައި ލިޔެފައި ނެތް ކަމަށް.
އިނގިރޭސިވިލާތުގެ ކުރީގެ ބޮޑު ވަޒީރު ރިޝީ ސުނާކް
ކޮވިޑް-19 ގެ ބަލިމަޑު ކަމުގެ ތެރޭގައި އިނގިރޭސިވިލާތުގެ ސަރުކާރަށް ހުރިހާ ވަޒީފާ ތަކެއް ސާލަމަތް ކުރެވޭނެ ކަމަށް ނުބެލެވުނު ނަމަވެސް، ސަރުކާރުން ވަނީ އެތައް ވަޒީފާ ތަކެއް ސަލާމަތްކޮށް، ބޮޑު ނުރައްކާތެރި ކަމެއް ހުއްޓުވާފައި ކަމަށް އިނގިރޭސިވިލާތުގެ ކުރީގެ ބޮޑު ވަޒީރު ރިޝީ ސުނާކް ވިދާޅުވެއްޖެ އެވެ.
ކޮވިޑު ފެތުރިގެން ދިޔަ ދުވަސްވަރު އިނގިރޭސިވިލާތުގައި ވެރިކަން ކުރަމުން އައީ ކޮންޒަވޭޓިވް ޕާޓީ އިންނެވެ. އޭރު އެ ޤައުމުގެ ބޮޑު ވަޒީރުގެ މަގާމުގައި ބޮރިސް ޖޮންސަން ހުންނެވިއިރު، ސުނާކް ހުންނެވީ ޗާންސެލަރުގެ މަގާމުގަ އެވެ. ސުނާކް ވިދާލުވީ އެ ދުވަސްވަރު ހުރިހާ ވަޒީފާ ތަކެއް ސަލާމަތް ކުރުމަކީ ކުރެވޭނެ ކަމެއް ނޫން ކަމަށެވެ.
ނަމަވެސް، އެ ދަތި ޙާލަތުގައި ވެސް ސަރުކާރުން އެތައް ވަޒީފާ ތަކެއް ސަލާމަތް ކޮށްފައިވާ ކަމަށާއި، އެކަމުގެ ސަބަބުން ބޮޑު ނުރައްކާތެރި ކަމެއް ހުއްޓުވުނު ކަމަށް ސުނާކް ވަނީ ވިދާޅުވެފަ އެވެ. އެކަން ފާހަގަ ކުރައްވައި ސުނާކް ވިދާޅުވީ، އެއީ އިނގިރޭސިވިލާތުގެ ސަރުކާރަށް ހޯދުނު ކާމިޔާބެއް ކަމަށެވެ. އިތުރަށް ސުނާކް ވިދާޅުވީ، ބަލި ފެތުރެން ފެށި ފުރަތަމަ ދަނޑިވަޅުގައި ލަފާ ކުރި ވަރަށް ވުރެ، ވަޒީފާގެ ދާއިރާ އަށް ކުރި އަސަރު ކުޑަ ކަމަށާއި، އެކަން ރަނގަޅު ކަމަށެވެ.
ކޮވިޑު ފެތުރެމުން ދިޔަ ދުވަސްވަރު ކަންތައް ވެގެން ދިޔަ ގޮތުގެ ވާހަކަ ދައްކަވަމުން ސުނާކް ވިދާޅުވީ، ކޮވިޑުގެ ސަބަބުން ޤައުމުގެ އިޤްތިޞާދަށް ކުރިމަތިވި އަސަރާއި، އެކަން ކަމާ ކުރިމަތިލާނެ ގޮތް ފޮތެއްގައި ލިޔެފައި ނެތް ކަމަށެވެ. އެގޮތުން އޭރު ސަރުކާރާއި، ސަރުކާރުގެ ވަޒީރުން ވެސް ކުރިމަތިލާން ޖެހުނީ، މީގެ ކުރިން އެއްވެސް މީހަކު ކުރިމަތިލާފައި ނުވާ ޙާލަތަކާ ކަމަށް ސުނާކް ވިދާޅުވި އެވެ.
މީގެ އިތުރުން ސުނާކް ވިދާޅުވެފައި ވަނީ ކޮވިޑު ފެތުރިގެން އައި ފުރަތަމަ ދުވަސްވަރު އެއްވެސް ޔަޤީން ކަމެއް ނެތް ކަމަށެވެ. އެގޮތުން އެ ބަލި ފެތުރިގެން ދާނެ ފުޅާ މިނާއި، އެކަމުގައި ހޭދަ ކުރަން ޖެހޭނެ މުއްދަތު އަދި ސަރުކާރުން އަޅާ ފިޔަވަޅު ތަކުގެ ސަބަބުން ރައްޔިތުންނަށް ކުރާނެ ސާފު އަސަރެއް އަންދާޒާ ކުރެވިފައި ނުވާ ކަމަށް އޭނާ ވިދާޅުވި އެވެ. އަދި މާހިރުންނަށް ވެސް އެކަން ކުރުމުގައި އެތައް ގޮންޖެހުން ތަކެއް ދިމާވެފައިވާ ކަމަށް ސުނާކް ވިދާޅުވެފައިވެ އެެވެ.
ކޮވިޑާ ގުޅިގެން ކުރިއަށް ގެންދިޔަ އިންކުއަރީ ގައި ފާހަގަ ކޮށްފައި ވަނީ، ސަރުކާރުން އެ ވައިރަސް އެހާ ސީރިއަސް ކޮށް ނުނަގާ ކަމަށެވެ. އަދި އެކަން ކުރަން ސަރުކާރު ވަަރަށް ބޮޑު ތަނުން ލަސްވެގެން ދިޔަ ކަމަށާއި، 2020 ވަނަ އަހަރުގެ ފެބްރުވަރީ މަހުގެ ތެރޭގައި އަޅަން ޖެހޭ ފިޔަވަޅުތައް ވެސް ނޭޅި، ލަސް ވެގެން ދިޔަ ކަމަށް ވަނީ ފާހަގަ ކޮށްފަ އެވެ.
އިތުރަށް ވާހަކަ ދައްކަވަމުން ސުނާކް ވިދާޅުވީ، އޭރު އޭނާ ގެ އެންމެ ބޮޑު އަމާޒަކަށްވީ ވަޒީފާގެ ދާއިރާ އަށް ކުރިމަތިވާ ގޮންޖެހުންތައް މަދު ކުރުން ކަމަށެވެ. ޚާއްސަކޮށް އެ ދާއިރާ އަށް ކުރިމަތިވާން އޮތް ނުރައްކާތައް ހުއްޓުވަން ޚާއްސަ ސަމާލު ކަމެއް ދީފައި ވާނެ ކަމަށް ސުނާކް ފާހަގަ ކުރެއްވި އެވެ. އެކަން ފާހަގަ ކުރައްވައި ސުނާކް ވިދާޅުވީ، ވަޒީފާފެ ދާއިރާ ސަލާމަތް ކުރުމަށް އަވަސް ފިޔަަވަޅު ތަކެއް ސަރުކާރުން އަޅަން ޖެހުނު ކަމަށެވެ.
އޭރު ސުނާކް ވަނީ ވަޒީގެ ދާއިރާ އަށް ޚާއްސަކޮށްގެން ސްކީމެއް ވެސް ތައާރަފު ކުރައްވައިފަ އެވެ. ކަންކަން ކުރުމުގައި ވަރަށް ބޮޑަށް ބަލައިގެން، އަދި ސަމާލުވެގެން ކަންކަން ކުރަން ޖެހުނު ކަަމަށް ފާހަގަ ކުރައްވަމުން ސުނާކް ވިދާޅުވީ، އެ ސްކީމް ވެސް ރަނގަޅު ގޮތުގައި ކުރިއަށް ގެންދެވުނު ކަމަށް ޤަބޫލު ކުރައްވާ ކަމަށެވެ.
މަސްދަރު: ބީބީސީ
