ބާންހަމްއާ ދިމާވި އުމުރުން ދުވަސްވީ މީހަކު ބުނީ، ކޮންމެ ފަސް މިނެޓަކުން ބޮޑު ވަޒީރު ބަދަލުވާތީ އައު މީހަކު މަޤާމާ ހަވާލުވިޔަސް ނޭނގޭ ކަމަށް!
30 ޖުލައި 2026 | ބުރާސްފަތި 09:57ބާންހަމްގެ ޖަވާބާ އެކު އުމުރުން ދުވަސްވީ މީހާ އަށް ލިބުނީ ބޮޑު ހަރިރާން ކަމެއް. އެއާ އެކު އޭނާ ވަނީ، އަނެއްކާ އެހެން އައު މީހަކު ބޮޑު ވަޒީރު ކަމަށް އައިތޯ ސުވާލު ކުރައްވާފައި. ދެން އޭނާ ވިދާޅުވީ ކޮންމެ ފަސް މިނެޓަކުން ބޮޑު ވަޒީރު ބަދަލު ވަމުން އަންނަ ކަމަށް. އެ މީހާ އެހެން ބުނުމާ އެކު، ބާންހަމް ވިދާޅުވީ އެކަން އެނގިވަޑައި ގަންނަވާ ކަމަށް
ބުދަ ދުވަހު އުމުރުން ދުވަސްވީ މީހުން ބަލަހައްޓާ މަރުކަޒަށް ކުރި ޒިޔާރަތުގައި ބޮޑު ވަޒީރު ބާންހަމް، އުމުރުން ދުވަސްވީ މީހަކާ ވާހަކަ ދައްކަވަނީ | ސޯޝަލް މީޑިއާ
އިނގިރޭސިވިލާތުގެ ބޮޑު ވަަޒީރު އެންޑީ ބާންހަމް، މެންޗެސްޓަރގައި ހުންނަ އުމުރުން ދުވަސްވީ މީހުން ބަލަހައްޓާ މަރުކަޒަކަށް ކުރި ޒިޔާރަތެއްގައި ތަފާތު ކަމެއް ދިމާވެ، އެކަން ގިނަ ބައެއްގެ ސަމާލު ކަމަށް އައިސްފި އެވެ.
ބުދަ ދުވަހު އުމުރުން ދުވަސްވީ މީހުން ބަލަހައްޓާ މަރުކަޒަށް ކުރި ޒިޔާރަތުގައި ބާންހަމް ވަނީ، އެ ތަނުގައި ތިބި ގިނަ އަދަދެއްގެ މީހުންނާ ބައްދަލުކޮށް ވާހަކަ ދައްކައިފަ އެވެ. އޭގެ ތެރެއިން ބައްދަލުވި އުމުރުން ދުވަސްވީ މީހަކު ވަނީ، ބާންހަމް އަކީ އެ ދާއިރާާގެ ގޮނޑި އަށް ވާދަ ކުރައްވާ ކެންޑިޑޭޓުތޯ އައްސަވައިފަ އެވެ.
އެ ސުވާލުގެ ޖަވާބުގައި ބޮޑު ވަޒީރު ބާންހަމް ވިދާޅުވީ، އޭނާ އަކީ ކުރިން ކެންޑިޑޭޓެއްގެ ގޮތުގައި ހުންނެވި ބޭފުޅެއް ކަމަށެވެ. އަދި ދާދި ފަހުން އޮތް ބައި އިލެކްޝަނެއް ކާމިޔާބު ކުރެއްވި ކަމަށް ވެސް ބާންހަމް ވިދާޅުވި އެވެ. އެއަށް ފަހު ހިނިތުންވެފައި ހުންނަވައި ބާންހަމް ވިދާޅުވީ، މިހާރު އޭނާ އަކީ ބޮޑު ވަަޒީރު ކަމަށެވެ.
ބާންހަމްގެ ޖަވާބާ އެކު އުމުރުން ދުވަސްވީ މީހާ އަށް ލިބުނީ ބޮޑު ހަރިރާން ކަމެކެވެ. އެއާ އެކު އޭނާ ވަނީ، އަނެއްކާ އެހެން އައު މީހަކު ބޮޑު ވަޒީރު ކަމަށް އައިތޯ ސުވާލު ކުރައްވައިފަ އެވެ. ދެން އޭނާ ވިދާޅުވީ ކޮންމެ ފަސް މިނެޓަކުން ބޮޑު ވަޒީރު ބަދަލު ވަމުން އަންނަ ކަމަށެވެ. އެ މީހާ އެހެން ބުނުމާ އެކު، ބާންހަމް ވިދާޅުވީ އެކަން އެނގިވަޑައި ގަންނަވާ ކަމަށެވެ.
ބުދަ ދުވަހު އުމުރުން ދުވަސްވީ މީހުން ބަލަހައްޓާ މަރުކަޒަށް ކުރި ޒިޔާރަތުގައި ބާންހަމް މީހަކާ ދެއްކެވި ވާހަކަ.
މި ވީޑިއޯ އާއެކު ބައެއް ފަރާތް ތަކުން ބުނެފައި ވަނީ، އިނގިރޭސިވިލާތުގެ ސަރުކާރަށް ފަހަކަށް އައިސް އަންނަމުންދާ އަވަސް ބަދަލު ތަކުގެ ސަބަބުން، އާންމު ރައްޔިތުންގެ މެދުގައި އޮޅުން ބޮޅުން ބޮޑުވެފައިވާ ކަމަށެވެ. ޚާއްސަކޮށް ފާއިތުވި އަހަރު ތަކުގައި ގިނަ ބޮޑު ވަޒީރުން ތަކެއް އައިސްފައިވާއިރު، ޤައުމުގެ ރައްޔިތުން ތިބީ ސިޔާސީ ކަންކަމާ މެދު މާޔޫސްވެފައި ކަމަށް ވެސް ބައެއް ފަރާތް ތަކުން ވަނީ ބުނެފައިވެ އެވެ.
އިނގިރޭސިވިލާތުގެ ބޮޑު ވަޒީރުގެ މަގާމަށް ބާންހަމް ވަޑައިގެންނެވީ ޖުލައި މަހުގެ 20 ވަނަ ދުވަހު އެވެ. އެއީ އޭނާގެ ކުރިން ބޮޑު ވަޒީރުގެ މަގާމުގައި ހުންނެވި ކިއާ ސްޓާމާ މަގާމުން އިސްތިއުފާ ދެއްވުމާ އެކު އެވެ. އެއާ އެކު ބާންހަމް ވެގެން ގޮސްފައި ވަނީ، ފާއިތުވި 10 އަހަރުގެ ތެރޭގައި އިނގިރޭސިވިލާތަށް ވަޑައިގެންނެވި ހަތް ވަނަ ބޮޑު ވަޒީރަށެވެ.
ބާންހަމް އަކީ އިނގިރޭސިވިލާތުގެ ސިޔާސީ މައިދާނުގައި ތަޖުރިބާ ހުންނެވި ބޭފުޅެކެވެ. ޚާއްސަކޮށް ވެރިކަން ކުރާ ލޭބާ ޕާޓީގެ ތެރޭގައި ބާންހަމްގެ ނުފޫޒު ވަރަށް ބޮޑަށް އޮވެ އެވެ. ސަރުކާރާ ހަވާލުވެ ވަޑައިގެންނެވުމަށް ފަހު ބާންހަމް ގެންދަވަނީ، ގިނަ ބަދަލު ތަކެއް ގެންނަވައި، ރައްޔިތުންގެ އާންމު ދިރިއުޅުމަށް ފަސޭހަ ވާނެ ގިނަ ކަންތައް ތަކެއް ކުރައްވަން އިސްކަން ދެއްވާނެ ކަމަށް ވިދާޅުވަމުންނެވެ.
މަސްދަރު: ޕޮލިޓިކްސް ޔޫކޭ
