އަވަސް އިންތިޚާބަކަށް ނުދާނެކަަމަށް ބޮޑު ވަޒީރު ބާންހަމް ވިދާޅުވެއްޖެ
27 ޖުލައި 2026 | ހޯމަ 06:14ބާންހަމް ވިދާޅުވީ، އަވަސް އިންތިޚާބެއް ބޭއްވުމުގެ ފުރުސަތު މިހާރު މުޅިން ބަންދުވެފައިވާ ކަަމަށް. އަދި މިއީ އިނގިރޭސިވިލާތުގެ ރައްޔިތުން އަވަސް އިންތިޚާބެއް ބޭނުންވާ ވަގުތެއް ކަމަށް ޤަބޫލު ނުކުރައްވާ ކަމަށް ވެސް، ބޮޑު ވަޒީރު ބާންހަމް ވަނީ ވިދާޅުވެފައި
އިނގިރޭސިވިލާތުގެ ބޮޑު ވަޒީރު އެންޑީ ބާންހަމް | ގެޓީ އިމޭޖަސް
އިނގިރޭސިވިލާތުގައި އަވަސް އިންތިޚާބެއް ބޭއްވުމުގެ އެއްވެސް ވިސްނުންފުޅެއް ނެތް ކަމަށް އެ ޤައުމުގެ ބޮޑު ވަޒީރު އެންޑީ ބާންހަމް ވިދާޅުވެއްޖެ އެވެ.
ބާންހަމް ބޮޑު ވަޒީރު ކަމަށް ވަޑައިގެންނެވުމުގެ ކުރިން، އޭނާ ބޭންފުޅު ވަނީ މަގާމާ ހަވާލުވެވަޑައިގަތުމަށް ފަހު އަވަސް އިންތިޚާބެއް ބާއްވަން ކަމުގެ އަޑުތަކެއް ފެތުރިގެން ދިޔަ އެވެ. ނަމަވެސް، އެކަމާ ގުޅޭ ގޮތުން އޭރު ބާންހަމް އެއްޗެއް ވިދާޅުވެފައި ނުވެ އެވެ. ބީބީސީ އަށް ދެއްވި އިންޓަވިޔުގައި އެކަމާ ގުޅޭ ގޮތުން ފުރަތަމަ ފަހަރަށް ވާހަކަ ދައްކަވަމުން ބާންހަމް ވިދާޅުވީ، އަވަސް އިންތިޚާބެއް ނުބާއްވާނެ ކަމަށެވެ.
އެގޮތުން ބާންހަމް ވިދާޅުވީ، އަވަސް އިންތިޚާބެއް ބޭއްވުމުގެ ފުރުސަތު މިހާރު މުޅިން ބަންދުވެފައިވާ ކަަމަށެވެ. އަދި މިއީ އިނގިރޭސިވިލާތުގެ ރައްޔިތުން އަވަސް އިންތިޚާބެއް ބޭނުންވާ ވަގުތެއް ކަމަށް ޤަބޫލު ނުކުރައްވާ ކަމަށް ވެސް، ބޮޑު ވަޒީރު ބާންހަމް ވަނީ ވިދާޅުވެފައި އެވެ.
ބީބީސީ އަށް ދެއްވި އިންޓަވިޔުގައި ބޮޑު ވަޒީރު ބާންހަމް ވާހަކަ ދައްކަވަނީ
އަވަސް އިންތިޚާބެއް ނުބާއްވަން ނިންމެވި ސަބަބުތަކާ ގުޅޭ ގޮތުން ވާހަކަ ދައްކަވަމުން ބާންހަމް ވިދާޅުވީ، އެންމެ ފަހުން ބޭއްވި އިންތިޚާބުގައި ރައްޔިތުންގެ ބޮޑު އަޣުލަބިއްޔަތަކުން ވޯޓު ދީފައި ވަނީ ވަކި މެނިފެސްޓޯ އަކަށް ކަމަށެވެ. އެހެންކަމުން، ޤާނޫނު ހަދާ މަޖިލީހުގެ މެންބަރުންގެ އެއްބާރުލުމާ އެކު، އެ މެނިފެސްޓޯގައިވާ ކަންކަން ފުރިހަމަ އަށް ތަންފީޒުކޮށް، ރައްޔިތުންނަށް ވެފައިވާ ވައުދުތައް ފުއްދުމުގައި ދެމި ހުންނަވާނެ ކަމަށް ބޮޑު ވަޒީރު ވައުދުވެ ވަޑައިގެންނެވި އެވެ.
މީގެ އިތުރުން ބާންހަމް ވިދާޅުވީ، މި ވަގުތު އެންމެ މުހިންމު ކަމަކީ އިނގިރޭސިވިލާތުގެ ކަންކަން ހަމަ މަގަށް އަޅުވައި، ޤައުމުގެ ހިންގުން ހަރުދަނާ ކުރުން ކަމަށެވެ. އަދި ގައުމު އޮންނަން ޖެހޭ ފަދަ ކުރިއަރާފައިވާ ހާލަތަކަށް ގެންދިއުމަށްޓަކައި ކުރަން ޖެހޭ މަސައްކަތްތަކަށް މުޅި ޤައުމުގެ ސަމާލުކަން ހުއްޓުވުމަކީ އޭނާގެ އެންމެ ބޮޑު އަމާޒު ކަމަށް ވެސް ބާންހަމް ފާާހަގަ ކުރެއްވި އެވެ.
ބޮޑު ވަޒީރު ބާންހަމްގެ މި ނިންމެވުމާ އެކު، އިނގިރޭސިވިލާތުގެ ސިޔާސީ މަސްރަހުގައި އަވަސް އިންތިޚާބަކާ މެދު އުފެދިފައިވާ ބަހުސްތަކަށް މިވަނީ ނިމުމެއް އައިސްފައި އެވެ. ސަރުކާރުގެ މިހާރުގެ އަމާޒަކީ އިންތިޚާބީ ވައުދުތައް ފުއްދައި، ޤައުމުގެ އިޤްތިޞާދީ އަދި އިޖުތިމާއީ ހާލަތު ރަނގަޅު ކުރުން ކަމަށް ބާންހަމްގެ ވާހަކަ އިން ސާފުވެގެން ދެ އެވެ.
އެންމެ ފަހުން އިނގިރޭސިވިލާތުގެ އާންމު އިންތިޚާބު ބާއްވާފައި ވަނީ 2024 ވަނަ އަހަރު އެވެ. އެ އިންތިޚާބުގައި ލޭބާ ޕާޓީ އިން ބޮޑު އަޣުލަބިއްޔަތެއް ހޯދާފައިވާއިރު، އިނގިރޭސިވިލާތުގައި ދެން އާންމު އިންތިޚާބެއް އޮންނާނީ 2029 ވަނަ އަހަރު އެވެ.
މަސްދަރު: ބީބީސީ
