ސިފައިންގެ އަންހެން އޮފިސަރުންނަށް ޖިންސީ އަނިޔާކޮށް ރޭޕު ކުރާ މައްސަލައާ އެކު، ޑިފެންސް ސެކްރެޓަރީ ސްޓްރީޓިން ރަތަށް!

އިނގިރޭސިވިލާތުގެ އާމީ ފައުންޑޭޝަން ކޮލެޖް (އޭއެފްސީ) ގައި ތަމްރީނު ހަދަމުން ދިޔަ އަންހެން ސިފައިންގެ އޮފިސަރުންނަށް ޖިންސީ ގޯނާކޮށް ރޭޕްކުރި ކަމަށް ބުނާ މައްސަލަތަކެއް ފެންމަތިވުމާ ގުޅިގެން، އެ ޤައުމުގެ ޑިފެންސް ސެކްރެޓަރީ ވެސް ސްޓްރީޓިން ވަރަށް ބޮޑަށް ކަންބޮޑުވުން ފާޅުކުރައްވައި ފިއެވެ.

ހެރޮގޭޓްގައި ހުންނަ މި ކޮލެޖުގައި ހިނގާފައިވާ މިފަދަ އަމަލުތަކުގެ ރިޕޯޓުތަކުން ނުހަނު ބޮޑު ސިހުމެއް ލިބިވަޑައިގެންފައިވާ ކަމަށް ސްޓްރީޓިން ވިދާޅުވި އެވެ.

ބީބީސީ އަށް މައުލޫމާތު ދިން ހަތަރު އަންހެނަކު ވަނީ، އެ ކޮލެޖުގައި އުޅުނު ދުވަސްވަރު އެކި ފަހަރު މަތިން ޖިންސީ ގޯނާ އާއި ފުރައްސާރައާ ކުރިމަތިލާން ޖެހުނު ކަމަށް ބުނެފައި އެވެ. އަދި އެތަނުގައި އަންހެނުންނަށް އިހުތިރާމް ކުޑަ ކުރުމާއި، ޖިންސީ އަނިޔާވެރި ކަމުގެ ސަގާފަތެއް އޮތްކަން އެމީހުން ވަނީ ފާހަގަ ކޮށްފައި އެވެ.

މި މައްސަލައާ ގުޅިގެން ޑިފެންސް ސެކްރެޓަރީ ވިދާޅުވީ، ހެރޮގޭޓްގައި ކަންތައްތައް ގޯސްވެގެން ދިޔަ ގޮތް ވަރަށް ތަފްސީލީ ގޮތެއްގައި ބައްލަވާނެ ކަމަށާއި، މުޅި ދިފާއީ ބާރުގެ ތެރޭގައި އޮތް ސަގާފަތް ބަދަލު ކުރުމަށް މަސައްކަތް ކުރައްވާނެ ކަމަށެވެ.

އިނގިރޭސި އަސްކަރިއްޔާ އިން ބުނެފައި ވަނީ، މިފަދަ ޖިނާއީ އަމަލުތަކަކީ އެއްވެސް ހާލެއްގައި ބަލައި ގަނެވޭނެ ކަންކަމެއް ނޫން ކަމަށާއި، މިފަދަ ކަންކަން ތަހައްމަލު ކުރަން ޖެހިފައިވާ ފަރާތްތަކުން އެކަން ރިޕޯޓު ކުރުމަށް ބާރު އަޅާ ކަމަށެވެ. އޭއެފްސީ އަކީ، އިނގިރޭސިވިލާތުގައި 19 އަހަރުން ދަށުގެ ކުދިންނަށް އަސްކަރީ ތަމްރީނު ދޭ އެންމެ ބޮޑު މަރުކަޒެވެ. އަދި އުމުރުން 16 އަހަރުގައި އަސްކަރިއްޔާއާ ގުޅޭ ހުރިހާ ކުދިން ތަމްރީނު ހަދަނީ މި ކޮލެޖުގައި އެވެ.

ނޯތު ޔޯކްޝަޔާ ފުލުހުން ބީބީސީ އަށް ދީފައިވާ މައުލޫމާތުތަކަށް ބަލާއިރު، މިދިޔަ ޖޫން މަހުގެ ނިޔަލަށް އެއް އަހަރު ދުވަހުގެ ތެރޭގައި އެ ކޮލެޖާ ގުޅުންހުރި ޖިންސީ ކުށުގެ 16 މައްސަލައެއް ވަނީ ރިޕޯޓު ކޮށްފައި އެވެ. މީގެ ތެރޭގައި ޖިންސީ ގޯނާ ކުރުމާއި، ބޭއަދަބީ ގޮތް ގޮތަށް ހަށިގަނޑު ދެއްކުން ފަދަ މައްސަލަތައް ހިމެނެ އެވެ. މީގެ އިތުރުން، މިނިސްޓްރީ އޮފް ޑިފެންސްގެ ތަފާސް ހިސާބުތަކުން ދައްކާ ގޮތުގައި 2018 ވަނަ އަހަރުން ފެށިގެން 2025 ވަނަ އަހަރުގެ ޖޫން މަހުގެ ނިޔަލަށް އެ ކޮލެޖުގައި ހިނގާފައިވާ ޖިންސީ ފުރައްސާރައިގެ 176 ޝަކުވާއެއް ވަނީ ހުށަހަޅާފައި އެވެ.

މި މައްސަލައިގައި ވާހަކަ ދެއްކި އެއް އަންހެނަކު ކަމަށްވާ "ޓިލީ" (އަސްލު ނަމެއް ނޫން) ބުނި ގޮތުގައި، އޭނާގެ އުމުރުން 17 އަހަރުގައި އޭނާ އާއެކު ތަމްރީނު ހަދަމުން ދިޔަ ފިރިހެން ސިފައިންތަކެއް ވަނީ އޭނާ ރޭޕު ކޮށްފައި އެވެ. ގަޑިއިރުތަކަކަށް ދެމިގެން ދިޔަ އެ ހާދިސާގައި އޭނާ އަށް އިހުސާސް ކުރެވުނީ، އިންސާނެއްގެ ބަދަލުގައި "މަސްގަނޑެއްގެ" ގޮތުގައި ކަމަށް އޭނާ ބުންޏެވެ. އަދި "އޭމީ" ނަމަކަށް ކިޔާ ކުއްޖެއްގެ މަންމަ ބުނި ގޮތުގައި، އޭނާގެ ދަރިފުޅު އުޅުނު ކޮޓަރީގެ ތަޅު ހަލާކުވެފައި ހުރުމުން، ފިރިހެން ސިފައިން ވަދެފާނެތީ އެ ކުއްޖާ ނިދީ ދޮރު މަތީގައި އޮށޯވެގެން އޮވެ އެވެ.

މި މައްސަލައާ ގުޅިގެން ޗިލްޑްރަންސް ކޮމިޝަނަރު ޑޭމް ރޭޗަލް ޑި ސޫޒާ ވިދާޅުވީ، މި ބިރުވެރި ހަމަލާތައް ތަހުގީގުކޮށް، ކުދިންގެ ރައްކާތެރިކަން ކަށަވަރު ކޮށްދިނުމުގައި އިހުމާލުވި ފަރާތްތައް ޖަވާބުދާރީ ކުރުވާނެ ކަމަށެވެ. އަދި ކުރީގެ އެމްޕީ ސާރާ އެތާޓަން ވިދާޅުވީ، ކޮލެޖުގެ އިތުބާރު އަލުން ހޯދޭނީ މިނިވަން ތަހުގީގެއް ހިންގައިގެން ކަމަށެވެ. މީގެ އިތުރުން އެމްޕީ އެމާ ލެވެލް ވިދާޅުވީ، މިއީ ކުޑަކުދިން ކިޔަވާ އެހެން މަރުކަޒެއް ނަމަ މިހާރު އެތަނެއް ބަންދު ކޮށްފައި ވާނެ ކަމަށެވެ.