އަންހެނުންނާއި ކުޑަ ކުދިންނަށް އަނިޔާ ކުރުމަކީ، ޤައުމީ ބޮޑު މައްސަލަ އެއް: ހޯމް ސެކްރެޓަރީ ޝަބާނާ މަހުމޫދު
16 ޑިސެމްބަރު 2025 | އަންގާރަ 03:37ހޯމް ސެކްރެޓަރީ ވިދާޅުވީ ސަރުކާރުގައި މަސައްކަތް ކުރައްވަމުން ގެންދަވަނިކޮށް، އެކަމަނާ އަށް ނިންމަން ޖެހުނު އެންމެ ހިތާމަވެރި ނިންމުމަކީ ވެސް އެއީ ކަމަށް. އެގޮތުން، އަދުލު އިންސާފު ޤާއިމު ކުރުމުގެ ނިޒާމު އޮތީ އަންހެނުންނަށް ފެއިލްވެފައި ކަމަށް އެކަމަނާ ފާހަގަ ކުރެއްވި.
އިނގިރޭސިވިލާތުގެ ހޯމް ސެކްރެޓަރީ ޝަބާހާ މަހުމޫދު
އަންހެނުންނާއި ކުޑަ ކުދިންނަށް އަނިޔާ ކުރުމަކީ ޤައުމީ ބޮޑު މައްސަލައެއް ކަމަށް، އިނގިރޭސިވިލާތުގެ ހޯމް ސެކްރެޓަރީ ޝަބާހާ މަހުމޫދު ވިދާޅުވެއްޖެ އެވެ.
އެކަމަނާ މިހެން ވިދާޅުވެފައި ވަނީ އިނގިރޭސިވިލާތާއި، ވޭލްސްގައި ޖިންސީ ކުށްތައް ތަހުގީގު ކުރުމަށް ޚާއްސަ ޓީމުތައް ޤާއިމުކޮށް، އެކަން ރާވައި އިއުލާން ކުރައްވަމުންނެވެ.
މިކަމަކީ ދިގު މުއްދަތަކަށް ލަސްވެފައިވާ ކަމެއް ކަމަށްވާއިރު، މިހާރު ރާވާފައިވާ ކަންކަމުގެ ބޭނުމަކީ އަންހެނުންނާއި ކުޑަ ކުދިންނަށް ގެއްލުން ދެމުން އަންނަ މިންވަރު ކުރިއަށް އޮތް ދިހަ އަހަރުގެ ތެރޭގައި މަދު ކުރުމެވެ. މިކަމުގައި، އޮންލައިންކޮށް ޙަރަކާތްތެރިވާ ސިއްރު ފުލުހުންގެ ޔުނިޓު ތަކަށް ފަންޑު ފޯރުކޮށްދިނުމާއި، ގެވެށި އަނިޔާ އިން ރައްކާތެރި ވުމުގެ އަމުރުތައް ތަންފީޒު ކުރުން ވެސް ހިމެނެ އެވެ. މިކަން އިއުލާން ކުރުމަށް މިއަހަރުގެ ތެރޭގައި ވަނީ ތިން ފަހަރެއްގެ މަތިން މަސައްކަތް ކޮށްފަ އެވެ.
ހޯމް ސެކްރެޓަރީ ވިދާޅުވީ ސަރުކާރުގައި މަސައްކަތް ކުރައްވަމުން ގެންދަވަނިކޮށް، އެކަމަނާ އަށް ނިންމަން ޖެހުނު އެންމެ ހިތާމަވެރި ނިންމުމަކީ ވެސް އެއީ ކަމަށެވެ. އެގޮތުން، އަދުލު އިންސާފު ޤާއިމު ކުރުމުގެ ނިޒާމު އޮތީ އަންހެނުންނަށް ފެއިލްވެފައި ކަމަށް އެކަމަނާ ފާހަގަ ކުރެއްވި އެވެ. ޚާއްސަކޮށް އެކި ސަރަހައްދު ތަކުގައި ފުލުހުން މައްސަލަތައް ތަހުގީގު ކުރާ ގޮތް ވަރަށް ބޮޑަށް ތަފާތުވެފައިވާ ކަމަށް ވެސް ހޯމް ސެކްރެޓަރީ ވަނީ ފާހަގަ ކުރައްވައިފަ އެވެ.
އިނގިރޭސިވިލާތުގެ ސަރުކާރުން ބުނެފައިވާ ގޮތުގައި، އަލަށް އެކުލަވާލާފައިވާ ޓީމު ތަކުގައި، ޖިންސީ ކުށްތައް ތަހުގީގު ކުރުމުގެ ޚާއްސަ ހުނަރު ތަކެއް ލިބިފައިވާ އޮފިސަރުން ޙަރަކާތްތެރި ވާނެ އެވެ. އެގޮތުން މުވައްޒަފުންނަށް އަނިޔާ ދިނުމުގެ ކުށް ކުރާ މީހުންނާއި، އެކަމުގެ ޝިކާރަ އަކަށް ވެފައިވާ މީހުންގެ ވިސްނުން ދެނެގަތުމަށް ރަނގަޅު ތަމްރީނު ލިބިފައި ހުންނާނެ ކަމަށް ހާމަ ކޮށްފައިވެ އެވެ. މިހާރު ވެސް، ފުލުހުންގެ ބާރު ތަކުގެ ތެރެއިން 50 އިންސައްތަ އަށް ވުރެ ގިނަ ބާރު ތަކުގައި މިފަދަ ޓީމުތައް އޮތްއިރު، 2029 ވަނަ އަހަރުގެ ނިޔަލަށް ހުރިހާ ބާރު ތަކެއްގައި މި ޓީމު ޤާއިމު ކުރުމަށް ވަނީ ހަމަޖެހިފަ އެވެ.
މީގެ އިތުރުން ގެވެށި އަނިޔާ އިން ރައްކާތެރި ވުމުގެ އަމުރުތައް އިނގިރޭސިވިލާތް އަދި ވޭލްސްގެ އެކި ސަރަހައްދު ތަކުގައި ތަންފީޒު ކުރާނެ އެވެ. މި އަމުރު ތަކުން ކުށްވެރިޔާ އަށް އެހެން މީހުންނަށް ގެއްލުން ދިނުމާއި، މީހުންގެ ގެތަކަށް ވަނުން އަދި އޮންލައިންކޮށް ގެއްލުންދޭ އެންމެހާ ކޮންޓެންޓު ޕޯސްޓުތައް ވެސް މަނާ ކުރެވޭނެ އެވެ. އެ އަމުރާ ޚިލާފު ވުމަކީ ބޮޑު ކުށެއްގެ ގޮތުގައި ވެސް ވަނީ ކަނޑައަޅައިފަ އެވެ.
ހޯމް ސެކްރެޓަރީ ވިދާޅުވީ އެ އަމުރު ތަކުގެ ފައިދާ އަށް ބަލާ ނަމަ، ފުރަތަމަ ފިޔަވަހީގެ ނަތީޖާ ފެންނަނީ ވެސް ވަރަށް ރަނގަޅަށް ކަމަށެވެ. އަމުރުތަކާ ޚިލާފުވި މީހުން ހައްޔަރު ކުރުމުގެ އަދަދު ވެސް އިތުރު ކަމަށް ފާހަގަ ކުރައްވައި އެކަމަނާ ވިދާޅުވީ، އިންޓަނެޓުގައި އަންހެނުންނާއި ކުޑަ ކުދިންނަށް އަނިޔާ ކުރާ މީހުން ހޯދުމަށް ބޮޑު ހޭދައެއް ކުރައްވާނެ ކަަމަށެވެ. އެކަމަށް ޙަރަކާތްތެރިވާާ ސިއްރު ފުލުހުންގެ ޔުނިޓު ތަކަށް ދެ މިލިއަން ޕައުންޑަށް ވުރެ ގިނަ ފައިސާ ޚަރަދު ކުރާނެ ކަމަށް ހޯމް ސެކްރެޓަރީ ވަނީ ވިދާޅުވެފަ އެވެ.
މަސްދަރު: ބީބީސީ
