ޑޮކްޓަރުންގެ ހަޅުތާލުގައި ބައިވެރި ނުވުމަށް ބޮޑު ވަޒީރު ސްޓާމާ ގޮވާލައްވައިފި

އަންނަ ހަފުތާގެ ތެރޭގައި ބޭއްވުމަށް ހަމަޖެހިފައިވާ ހަޅުތާލުގައި ބައިވެރި ނުވުމަށް، އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ޑޮކްޓަރުންނަށް ގޮވާލައްވައިފި އެވެ. 

ސްޓާމާ ވިިދާޅުވީ އިނގިރޭސިވިލާތުގެ ހުރިހާ ސަރަހައްދެއްގައި ވެސް ނުރައްކާތެރި ހުމެއް ފެތުރެމުން އަންނަ ކަަމަށާއި، މިއީ ކޮރޯނާ ވައިރަސް ފެތުރުނު ދުވަސްވަރަށް ފަހު އެންމެ ނުރައްކާތެރި އެއް ދުވަސްވަރަށް ވެދާނެ ކަމަށް ލަފާ ކޮށްފައިވާ ކަމަށެވެ. މި ދަނޑިވަޅުގައި ޑޮކްޓަރުން ހަޅުތާލު ބާއްވައިފި ނަމަ، ޞިއްޙީ ނިޒާމު އަދި ރައްޔިތުންނަށް ވެސް ވަރަށް ބޮޑު ނުރައްކަލެއް ކުރިމަތި ވެދާނެ ކަމަށް ބޮޑު ވަޒީރު ވަނީ ވިދާޅުވެފަ އެވެ. 

ޑޮކްޓަރުންގެ ޔޫނިއަން ކަމަށްވާ، ބްރިޓިޝް މެޑިކަލް އެސޯސިއޭޝަން އިން މިހާރު އަންނަނީ، ހަޅުތާލު ކެންސަލް ކުރުމަށް އެ ޔޫނިއަންގެ މެމްބަރުންގެ ޚިޔާލު ހޯދަމުންނެވެ. އެގޮތުން ހަޅުތާލު ކެންސަލް ކުރުމަށް ޔޫނިއަންގެ މެމްބަރުން އެއްބަސްވޭތޯ ބެލުމުގެ މަސައްކަތް ކުރަމުން އަންނަ ކަމަށް ބުނެފައިވެ އެވެ. އެއަށް ފަހު، މެމްބަރުން ނިންމާ ގޮތެއް ހޯމަ ދުވަހު ހާމަ ކުރާނެ ކަމަށް ބެލެވެ އެވެ.

އެހެން  ނަމަވެސް، ހަޅުތާލު ފަސް ކުރުމާ ނުވަތަ ކެންސަލް ކުރުމާ ދެކޮޅަށް ޔޫނިއަންގެ މެމްބަރުން ވޯޓު ދީފި ނަމަ ޑިސެމްބަރު މަހުގެ 17 ވާ ބުދަ ދުވަހު އެ ހަޅުތާލު ފަށާނެ ކަމަށް ވަނީ ފާހަގަ ކޮށްފަ އެވެ. އެގޮތުން އެ ހަޅުތާލު ކުރިއަށް ގެންދާނީ ފަސް ދުވަހުގެ މުއްދަތަކަށް ކަމަށް ރިޕޯޓު ތަކުގައި ވަނީ ފާހަގަ ކޮށްފަ އެވެ. 

ޔޫނިއަންގެ ތަރުޖަމާނަކު ވިދާޅުވީ މުސާރަ އާއި، މަސައްކަތުގެ ޙާލަތު އަދި ޞިއްޙީ ނިޒާމުގެ އިތުބާރާ ގުޅޭ ގޮތުން ސަރުކާރުގެ ހުށަހެޅުމެއް ލިބުމުން ހަޅުތާލު ހުއްޓާލާނެ ކަމަށެވެ. އެ ހަޅުތާލު ކުރިއަށް ގެންދާ ނަމަ، އެކަމުގައި ގިނަ ބަޔަކު ބައިވެރިވާނެ ކަމަށާއި، އެކަމުގެ ސަބަބުން ބޮޑު ވަޒީރު ސްޓާމާގެ ސަރުކާރަށް ޕްރެޝަރު ބޮޑު ވާނެ ކަމަށް ވަނީ ލަފާ ކޮށްފަ އެވެ. 

ދިރާސާ ތަކުން ދައްކާ ގޮތުގައި އާންމުކޮށް ހުން ފަތުރޭ ދުވަސްވަރަށް ވުރެ ހަލުވިކޮށް ހުން ފެތުރުމުގެ ފުރުސަތު އެބަ އޮތެވެ. ވައިރަހުގެ އައު ވައްތަރެއް ފެތުރެމުންދާތީ، މިއަހަރުގެ ފްލޫ މޫސުމަކީ ވަރަށް ނުރައްކާތެރި މޫސުމަކަށް ވެދާނެ ކަމަށް ޞިއްޙީ މާހިރުން ވަނީ ބުނެފަ އެވެ. ގިނަ ބަޔަކު އެކަމަށް ސުޕަ ފްލޫ ކިޔަމުން އަންނަ ނަމަވެސް، އެއީ ފަރުވާ ހޯދުމަށް އުނދަގޫ ބައްޔެއް ނޫން ކަމަށް ބުނެފައިވެ އެވެ. 

އިނގިރޭސިވިލާތުގެ ޞިއްޙީ ޚިދުމަތް ދެމުން އަންނަ ފަރާތްތަކުން ބުނެފައިވާ ގޮތުގައި، ފާއިތުވި ހަފުތާގައި ދުވާލަކު މެދު ނުކެނޑި ދެހާސް ހަ ސަތޭކަ ފަސްދޮޅަށް މީހުން ފްލޫގެ ފަރުވާ އަށް ހޮސްޕިޓަލްގައި އެޑްމިޓު ކޮށްފައިވާ ކަމަށެވެ. މިއީ މި ދުވަސްވަރަށް ގިނަ އަދަދެއް ކަމަށް ފާހަގަ ކޮށްފައިވާއިރު، އެއީ ކުރީ ހަފުތާއާ އަޅާ ބަލާއިރު 55 މީހުންގެ އިތުރު ވުމެއް ކަމަށް ފާހަގަ ކޮށްފައިވެ އެވެ. ސްކޮޓްލޭންޑާއި، ވޭލްސް އަދި އުތުރު އަޔަލެންޑުގައި ވެސް ފްލޫގެ ކޭސްތައް އިތުރުވަމުންދާ ކަމަށް ތަފާސް ހިސާބު ތަކުން ދައްކަ އެވެ. 

މާހިރުން ފާހަގަ ކޮށްފައިވާ ގޮތުގައި ކުޑަ ކުދިންނާއި، ޒުވާނުން މި ބަލީގައި ވަރަށް ބޮޑަށް ބަލުވެ، ޙާލު ދެރަވެފައިވެ އެވެ. ގާޑިއަން ނޫހަށް ބޮޑު ވަޒީރު ސްޓާމާ ވިދާޅުވެފައި ވަނީ، ހަޅުތާލު ބާއްވައިގެން ނުވާނެ ކަމަށާއި، ރެޒިޑެންޓް ޑޮކްޓަރުން ހުށަހެޅި ހުށަހެޅުން ޤަބޫލުކޮށް ހަޅުތާލު ހުއްޓާލުމަށް އެދިވަޑައިގަންނަވާ ކަމަށެވެ.