2020ގެ ތަފާސްހިސާބަށް ބަލާ ނަމަ އިންޓަރނެޓް ބޭނުންކޮށްގެން އެކި ކަހަލަ އަނިޔާ ކޮށްފައިވާ މިންވަރު މައްޗަށް ދިޔަ ކަމަށް ކުރީގެ ޖެންޑަރ މިނިސްޓަރު އައިޝަތު މުހައްމަދު ދީދީ ވިދާޅުވެއްޖެ އެވެ.

16 ޑޭޒް އޮފް އެކްޓިވިޒަމްގައި ބައިވެރިވެ އަންހެނުންނަށް ކުރާ އަނިޔާ އާއި ދެކޮޅަށް މަސައްކަތް ކުރުމުގެ މުހިންމު ކަމަށް އައިޝާ ވަނީ އަލިއަޅުވާލައްވާފަ އެވެ. އޮންލައިންކޮށް ކުދިން ކުރާ ކަންކަމާއި އިންޓަރނެޓްގެ ވަސީލަތްތައް ކުރިން ބޭނުން ކުރާ ގޮތް ހަގީގަތުގައި މައިންބަފައިންނަށް އެންމެ އެކަށީގެންވާ ގޮތެއްގައި ނުބެލޭ ކަމަށް އޭނާ ވަނީ ފާހަގަކުރައްވާފަ އެވެ.

"އަޅުގަނޑު ބަލާލިން ފަސް އަހަރުގެ ތަފާސް ހިސާބަށް. 2020 ގަ އެންމެ ބޮޑަށް ފާހަގަވީ ބިރުދައްކާ ބްލެކްމެއިލްކުރިކަން. ކޮންކަމަކަށްތޯ ބިރުދެއްކީ؟ އެހާ ފުންކޮށް ނެތް ތަފާސްހިސާބުތައް ފެންނަން އާއްމުނަށް ފެންނާކަށް." އޭނާ ވިދާޅުވި އެވެ.

އަގުހެޔޮކޮށް އިންޓަރނެޓް ފޯރުކޮށްދޭ އިރު އިންޓަރނެޓް ބޭނުން ކުރުމަށް ހުރި ގޮންޖެހުންތައް ކުދިންނަށް ވަރަށް ރަނގަޅަށް އެނގެން ޖެހޭ ކަަމަށް އޭނާ ވަނީ ވިދާޅުވެފަ އެވެ.

މީގެ އިތުރުން ކޮވިޑް އަށް ފަހު ދުވަހަކު ވެސް ރާއްޖޭގައި ގޭތެރެ އިން އަނިޔާ ލިބުން ނުފެންނަ ފަދަ ގޮތަކަށް ކަންކަން ފެނިގެން ދިޔަ ކަމަށް އޭނާ ވިދާޅުވި އެވެ. އެ ކަންކަން ހިނގާ މިންވަރާއި ބަލާފައި އަދިވެސް އެކަންކަން ރިޕޯޓް ކުރާ މިންވަރު މަދު ކަމަށް އޭނާ ވިދާޅުވި އެވެ.

ފުރާވަރުގެ އުމުރު ފުރާ އަކީ ކުދިންނަށް އިތުރަށް ސަމާލުކަން ދޭން ޖެހޭ ދުވަސްވަރެއް ކަމަށާއި އެ ދުވަސް ވަރު ސަމާލުކަން ނުދެވިއްޖެ ނަމަ އެހެން މީހުންގެ ނުފޫޒާއި އެހެން މީހުންނާއި އޮންނަ ގުޅުން އުފެދޭ ގޮތް ތަފާތުވާ ކަން އޭނާ ފާހަގަކުރެއްވި އެވެ. އެހެންކަމުން ކުދިންނާއި މައިންބަފައިންނާއި މެދު އޮންނަ ގުޅުމަކީ ބަދަހި ގުޅުމަކަށް ވުން ވަރަށް މުހިންމު ކަމަށް އޭނާ ވިދާޅުވި އެވެ.