އިނގިރޭސީ ޤާނޫނު ހަދާ މަޖިލީހުގެ މެންބަރު ޓިއުލިޕް އަށް ބަންގްލަދޭޝްގެ ކޯޓަކުން ޖަލު ޙުކުމެއް އިއްވައިފި

އިނގިރޭސިވިލާތުގެ ޤާނޫނު ހަދާ މަޖިލީހުގެ މެމްބަރު ޓިއުލިޕް ސިއްދީގަށް ބަންގްލަދޭޝްގެ ކޯޓަކުން ޖަލު ޙުކުމެއް އިއްވައިފި އެވެ.

ޓިއުލިޕް އަކީ ބަންގްލަދޭޝްގެ ކުރީގެ ބޮޑު ވަޒީރު ޝައިޚް ހަސީނާގެ އާއިލާ އަށް ނިސްބަތްވާ ފަރާތެކެވެ. އެގޮތުން އޭނާ އަކީ ހަސީނާގެ ދައްތަގެ ދަރި އެކެވެ.

ބަންގްލަދޭޝްގެ ވެރި ރަށް ޑާކާގައި ހިންގި ސަރުކާރުގެ ޕްރޮޖެކްޓެއްގައި ބިން ހޯދުމުގައި ހިންގި ކޮރަޕްޝަންއާ ގުޅިގެން ޓިއުލިޕްގެ މައްޗަށް އިއްވާފައި ވަނީ ދެ އަހަރު ދުވަހުގެ ޖަލު ހުކުމެކެވެ.

ޑާކާގެ ކޯޓުން ކޮށްފައިވާ ޙުކުމުގައި ފަނޑިޔާރު ރަބީއުލް އަލަމް ވިދާޅުވެފައި ވަނީ، ފަސް އަހަރު ދުވަސް ކުރިން ހިނގާފައިވާ އެ މުއާމަލާތުގައި ހަސީނާ ބޮޑު ވަޒީރު ކަމުގެ ނުފޫޒު އަދި މަގާމުގެ ފައިދާ ނަހަމަ ގޮތުގައި ބޭނުން ކޮށްފައިވާ ކަމަށެވެ. މިދިޔަ އަހަރުގެ ތެރޭގައި ހަސީނާގެ ސަރުކާރާ ދެކޮޅަށް ކުރި ވަރުގަދަ މުޒާހަރާތަކާ ގުޅިގެން އޭނާ ވަނީ ޤައުމު ދޫކުރައްވައި ވަޑައިގެން، އިންޑިއާގެ ހިމާޔަތް ހޯއްދަވައިފަ އެވެ. ހަސީނާ ޙާޒިރު ނުވުމުގެ ސަބަބުން ޙުކުމް އިއްވާފައި ވަނީ ޣައިރު ޙާޒިރުގަ އެވެ.

އިނގިރޭސިވިލާތުގައި ވެރިކަން ކުރަމުން އަންނަ ލޭބާ ޕާޓީ އަށް ނިސްބަތްވާ ޓިއުލިޕް މި މައްސަލައިގައި ކުށްވެރި ވެފައި ވަނީ، ނުރަނގަޅު ގޮތުގައި ހަސީނާ އަށް ނުފޫޒު ފޯރުވައިދީ، އޭނާގެ މަންމަ ޝައިޚް ރެހާނާ އާއި ދެ ބޭބެ އަށް ޑާކާ ގައި ހިންގި ސަރުކާރުގެ ޕްރޮޖެކްޓުން ބިން ހޯދައި ދިނުމަށް އެހީތެރިވެދީފައި ވާތީ އެވެ. ހަސީނާގެ ދައްތަ މިހާރު ދިރިއުޅެމުން އަންނަނީ ބަންގްލަދޭޝްގައި ކަމަށް ނުބެލެވޭއިރު، ޣައިރު ޙާޒިރުގައި އޭނާގެ މައްޗަށް ވަނީ ހަތް އަހަރު ދުވަހުގެ ޖަލު ޙުކުމެއް އިއްވައިފަ އެވެ.

ކޯޓުން އިއްވާފައިވާ ޙުކުމުގައި ބުނެފައި ވަނީ، އެ މައްސަލައިގައި އެ ތިން މީހުން ވެސް 100،000 ޓަކާ ނުވަތަ 820 އެމެރިކާ ޑޮލަރުން ޖޫރިމަނާ ކުރުމަށެވެ. އަދި ކަނޑައަޅާފައިވާ މުއްދަތުގެ ތެރޭގައި އެ ފައިސާ ނުދައްކައިފި ނަމަ، އިތުރު ހަ މަސް ދުވަހުގެ ޖަލު ޙުކުމެއް އަންނާނެ ކަމަށް ވެސް ބުނެފައިވެ އެވެ. މި މައްސަލައިގައި ދައުވާ ކުރި އިތުރު 14 މީހުންނަށް ވެސް ވަނީ، ފަސް އަހަރު ދުވަހުގެ ޖަލު ޙުކުމެއް އިއްވައިފަ އެވެ.

އެންޓި ކޮރަޕްޝަން ކޮމިޝަންގެ ޕްރޮސެކިއުޓަރު ހާމް މައިނުލް ޙަސަން ވިދާޅުވެފައި ވަނީ، ހަސީނާގެ ޕްރިންސިޕަލް ސެކްރެޓަރީ ސަލާހުއްދީން އަޙުމަދާއި، ޓިއުލިޕް ބައްދަލު ކުރެއްވި ކަމަށާއި، އެކަމުގެ ތަފްސީލު ވެސް ހުރި ކަމަށެވެ. އަދި އެ ދެ މީހުން ބަދަލު ކޮށްފައިވާ މެސެޖު ތަކުގެ ތަފްސީލުތައް މައްސަލައިގެ ތަހުގީގު ޓީމަށް ލިބިފައިވާ ކަމަށާއި، އެހެންވެ މި މައްސަލައިގައި ޓިއުލިޕް ކުށްވެރި ވާނެ ކަމަށް ހާމަވެފައިވާ ކަމަށެވެ.

މި މައްސަލައިގައި ހަސީނާ އާއި ޓިއުލިޕް ވެސް ދައުވާ ތަކުން ދިފާއުވުމަށް ޤާނޫނީ ވަކީލުން ހަމަޖައްސާފައި ނުވެ އެވެ. ދެ ބޭފުޅުން ވެސް ވަނީ ދައުވާތައް ބާތިލު ކަމަށް ވިދާޅުވެ، އެއީ ސިޔާސީ ބޭނުމެއް ކުރާ ކަމެއް ކަމަށް ވިދާޅުވެފަ އެވެ.

ލަންޑަންގެ ހެމްޕްސްޓެޑް އެންޑް ހައިގޭޓް ދާއިރާގެ މެމްބަރު ޓިއުލިޕް މި މައްސަލައިގައި އާންމުކޮށް ވާހަކަ ދައްކަވާފައި ނުވެ އެވެ. މީގެ ކުރިން އޭނާ ވިދާޅުވެފައި ވަނީ އެ ދައުވާތައް ބާތިލު ކުރުމަށް އެދޭ ކަމަށާއި، ސަބަބަކީ އެއީ ސިޔާސީ ބޭނުމެއްގައި ކުރާ ދޮގު ދައުވާ ތަކަކަށް ވުމުން ކަމަށެވެ.