ވެރިކަން ކުރާ ލޭބާ ޕާޓީ އަށްވުރެ، ރިފޯމް ޔޫކޭގެ މެމްބަރުންގެ އަދަދު އިތުރުވެއްޖެ ކަމަށް ބުނެފި

އިނގިރޭސިވިލާތުގައި ވެރިކަން ކުރަމުން އަންނަ ލޭބާ ޕާޓީ އަށް ވުރެ، ރިފޯމް ޔޫކޭގެ މެމްބަރުންގެ އަދަދު އިތުރު ވެއްޖެ ކަމަށް އެ ޕާޓީ އިން ބުނެފި އެވެ. 

ރިފޯމް ޔޫކޭ އިން މިހެން ބުނެފައިވާއިރު، ބޮޑު ވަޒީރު ކިއާ ސްޓާމާ ލީޑަރުކަން ކުރައްވާ ލޭބާ ޕާޓީގެ މެމްބަރުންގެ އަދަދު ބޮޑު ތަނުން ދަށްވާން ފަށާފައިވާ ކަމަށް ރިޕޯޓު ތަކުގައި ވަނީ ބުނެފަ އެވެ. ބޮޑު ވަޒީރު ސްޓާމާ އާއި، އޭނާގެ ސަރުކާރާ މެދު އެތައް ބަޔެއްގެ ނުރުހުން އޮތްއިރު، ސްޓާމާގެ މަޤުބޫލުކަން ދަށްވަމުން އަންނަ ކަމަށް ވެސް ބުނެފައިވެ އެވެ. 

ޓައިމްސް ނޫހުގައި ބުނެފައިވާ ގޮތުން، ލޭބާ ޕާޓީގެ އެތެރޭގެ ހިސާބުތައް ދައްކާ ގޮތުގައި އެ ޕާޓީގެ މެމްބަރުންގެ އަދަދު ވަނީ 250،000 (ދެ ލައްކަ ފަންސާސް ހާސް) އަށް ވުރެ ދަށްވެފަ އެވެ. އެއާ އެކު، ރިފޯމް ޔޫކޭ އިން ބުނެފައި ވަނީ އެ ޕާޓީގެ ފައިސާ ދައްކާފައިވާ މެމްބަރުންގެ އަދަދު 260،000 (ދެ ލައްކަ ފަސްދޮޅަސް ހާސް) އިން މައްޗަށް އަރާފައިވާ ކަމަށެވެ. 

މިއީ ހަގީގަތަކަށް ވެއްޖެ ނަމަ، ރިފޯމް ޔޫކޭ ވެގެން ދާނީ އިނގިރޭސިވިލާތުގެ ސިޔާސީ މައިދާނުގައި އެންމެ މެމްބަރުން ގިނަ ޕާޓީ އަށެވެ. މި ފަހުން އާންމު ކުރަމުން އަންނަ، އާންމު ރައްޔިތުންގެ ޚިޔާލު ހޯދުމުގެ ވޯޓު ތަކުގައި ވެސް ކުރި ހޯދާފައި ވަނީ ރިފޯމް ޔޫކޭ ކަމަށްވާއިރު، އެ ޕާޓީއާ ދެކޮޅަށް ވަރުގަދަ އަށް މަސައްކަތް ކުރަން ޖެހޭ ކަމަށް ބޮޑު ވަޒީރު ސްޓާމާ ވިދާޅުވެފައިވެ އެވެ. 

ޓައިމްސްގައި ބުނެފައިވާ އަދަދުތަކާާ ގުޅޭ ގޮތުން ސުވާލު ކުރުމުން، ލޭބާ ޕާޓީ އިން ވަނީ އެކަމާ ގުޅޭ ގޮތުން އެއްޗެއް ބުނުމަށް ދެކޮޅު ހަދައިފަ އެވެ. ލޭބާ ޕާޓީގެ ތަރުޖަމާނު ވިދާޅުވީ، އެ ޕާޓީގެ މެމްބަރުންގެ އަދަދު އަހަރީ ރިޕޯޓުގައި ޝާއިއު ކުރާނެ ކަމަށެވެ. ސިޔާސީ ޕާޓީ ތަކުން، އެ ޕާޓީގެ މެމްބަރުންގެ އަދަދު ހާމަ ކުރުމަށް ޤާނޫނުން ލާޒިމު ކޮށްފައި ނުވެ އެވެ. 

ރިފޯމް ޕާޓީ އިން މެމްބަރުންގެ އަދަދު ބަލަނީ އިންޓަނެޓުގައި ހުރި ލައިވް ކައުންޓަރަކުންނެވެ. އެ ޕާޓީ އިން ބުނެފައިވާ ގޮތުގައި އެ އަދަދު ގައި ހިމެނެނީ އަހަރަށް ފަންސަވީސް ޕައުންޑު، ނުވަތަ ފަންސަވީސް އަހަރުން ދަށުގެ މީހުންނަށް ދިހަ ޕައުންޑު ދައްކާފައިވާ މީހުން ކަމަށެވެ. 

އެކަމަމާ ގުޅޭ ގޮތުން ރިފޯމް ޕާޓީގެ ލީޑަރު ނައިޖެލް ފަރާޖް ވިދާޅުވީ، މިއީ އިނގިރޭސިވިލާތުގެ ސިޔާސީ މައިދާނުގައި އެންމެ ބޮޑު ޕާޓީ އަކަށް ރިފޯމް ޔޫކޭ ވުމުގެ ތާރީޚީ ދުވަހެއް ކަމަށެވެ. އަދި އޭނާ ވިދާޅުވީ ދެ ސިޔާސީ ޕާޓީގެ ދައުރު ނިމިއްޖެ ކަމަށެވެ. މީގެ ކުރިން އިނގިރޭސިވިލާތުގައި ލީޑު ކުރަމުން އައީ ލޭބާ ޕާޓީ އާއި، ކޮންސަވޭޓިވް ޕާޓީ އިންނެވެ. 

ލޭބާ ޕާޓީގެ މެމްބަރުން އަދަދު ދަށްވާން ފަށާފައިވާއިރު، ރިޕޯޓުތައް ބުނާ ގޮތުގައި 2020 ވަނަ އަހަރު އެ ޕާޓީގެ ލީޑަރުގެ މަޤާމަށް މިހާރުގެ ބޮޑު ވަޒީރު ސްޓާމާ ވަޑައިގެންނެވި ފަހުންނެވެ. ލޭބާ ޕާޓީގެ އަހަރީ ހިސާބު ތަކުގައި ބުނެފައިވާ ގޮތުން، ފާއިތުވި އަހަރު އެ ޕާޓީގެ މެމްބަރުންގެ އަދަދު 333،000 (ތިން ލައްކަ ތިރީސް ތިން ހާސް) އަށް ދިޔަ އެވެ. މިއީ ޖެރެމީ ކޯބިންގެ ދައުުރުގައި 530،000 (ފަސް ލައްކަ ތިރީސް ހާސް) އަށް ދިޔަ އަދަދަށް ވުރެ، ބޮޑު ތަނުން ދަށް އަދަދެކެވެ. 

ވެރިކަން ކުރާ ލޭބާ ޕާާޓީގެ ސްޓޭންޑާޑް މެމްބަޝިޕް ފީ އަކީ، އަހަރަކަށް ހަތް ދިހަ ޕައުންޑާއި، ފަންސާސް ޕެންސް އެވެ. 

މީގެ އިތުރުން އިނގިރޭސިވިލާތުގެ ގްރީން ޕާޓީ އިން ބުނެފައި ވަނީ މިއަހަރުގެ ސެޕްޓެމްބަރު މަހުގެ ތެރޭގައި އެ ޕާޓީގެ ލީޑަރުގެ މަގާމަށް ޒެކް ޕޮލަންސްކީ ވަޑައިގެންނެވި ފަހުން، މެމްބަރުންގެ އަދަދު ވަނީ އިތުރުވެފަ އެވެ. އެގޮތުން މެމްބަރުންގެ އަދަދު 70،000 (ހަތްދިހަ ހާސް) އިން، 180،000 (އެއް ލައްކަ އަށްޑިހަ ހާސް) އަށް އިތުރުވެފައިވާ ކަމަށް ބުނެފައިވެ އެވެ.

މީގެ އިތުރުން ކޮންޒަވޭޓިވް ޕާޓީ އިން، އެ ޕާޓީގެ މެމްބަރުންގެ އަދަދު ދާއިމީ ގޮތެއްގައި ޝާއިއު ނުކުރެ އެވެ. މިދިޔަ އަހަރު އޮތް އާންމު އިންތިޚާބުގައި ވޯޓުލީއިރު، 131،000 (އެއް ލައްކަ ތިރީސް އެއް ހާސް) އިން މަތީގައި ޕާޓީގެ މެމްބަރުންގެ އަދަދު ހުރިއިރު، މިހާރު އެ އަދަދު 123،000 (އެއް ލައްކަ ތޭވީސް ހާސް) އަށް ވެއްޓިފައިވާ ކަމަށް ރިޕޯޓުތައް ބުނެ އެވެ.

ކޮންޒަރވޭޓިވް ޕާޓީން މެންބަރުންގެ އަދަދު ދާއިމީ ގޮތެއްގައި ޝާއިއު ނުކުރެ އެވެ. ފާއިތުވި އަހަރުގެ ލީޑަރު އިންތިޚާބުގައި ވޯޓު ލުމުގެ ހައްގު ލިބުނު އެއްލައްކަ ތިރީސް ހާހާއި ހަ ސަތޭކަ އަށްދިހަ މެންބަރުން ތިބި ނަމަވެސް މިހާރު އެ އަދަދު އެއްލައްކަ ތޭވީސް ހާހަށް ދިޔަ ކަމަށް ރިޕޯޓުތައް ބުނެ އެވެ.