އޮންލައިން ޕްލެޓްފޯމްތައް މެދުވެރިކޮށް އަންހެނުންނަށް ކުރާ އަނިޔާ ހުއްޓުވުމަށް ޚާއްސަ ޤާނޫނެއް ހެދުމަށް ސަރުކާރާއި މަޖިލީހަށް އެމްޑީޕީ އިން ގޮވާލައިފި
25 ނޮވެމްބަރު 2025 | އަންގާރަ 13:10ޑިސެމްބަރ 10 އާ ހަމައަށް ކުރިއަށްދާ އަންހެނުންނަށް ކުރާ އަނިޔާ ހުއްޓުވުމަށް ހިންގޭ 16 ދުވަހުގެ ކެމްޕެއިންގައި އެމްޑީޕީ އަންހެނުންގެ ރޫހު ބައިވެރިވާނެ
އެމްޑީޕީގެ އަންހެނުންގެ ރޫހުގެ ނޫސްވެރިންގެ ބައްދަލުވުން
އޮންލައިން ޕްލެޓްފޯމްތައް މެދުވެރިކޮށް އަންހެނުންނަށް ކުރާ އަނިޔާ ހުއްޓުވުމަށް ޚާއްސަ ޤާނޫނެއް ހެދުމަށް އިިދިކޮޅު މޯލްޑިވިއަން ޑިމޮކްރެޓިކް ޕާޓީ އެމްޑީޕީ ގެ އަންހެނުންގެ ރޫހުން ގޮވާލައިފި އެވެ.
އެމްޑީޕީ ގެ އަންހެނުން ގެ ރޫހުން އަންގާރަ ދުވަހު ބޭއްވި ނޫސްވެރިން ގެ ބައްދަލުވުމުގައި އެ ރޫހު ގެ ރައީސާ އަދި މަޖިލީހު ގެ ކުރީގެ މެމްބަރު ރޮޒައިނާ އާދަމް ވިދާޅުވީ "ބައިނަލްއަޤްވާމީ އަންހެނުންނަށް ކުރާ އަނިޔާ ހުއްޓުވުމަށް ހިންގޭ 16 ދުވަހު ގެ" ކެމްޕެއިންގައި މި އަހަރު ވެސް އެ ޕާޓީ އިން ބައިވެރިވާނެ ކަަމަށެވެ. ޑިސެމްބަރ 10 އާއި ހަމައަށް ކުރިއަށް ގެންދާ މި ކެމްޕެއިން ގެ މި އަހަރު ގެ ޝިއާރާއި ގުޅިގެން މުހިންމު މަސައްކަތްތަކެއް ކުރުމަށް ނިންމާފައިވާކަން އޭނާ ވަނީ ފާހަގަކުރައްވާފަ އެވެ.
އެގޮތުން މި އަހަރު ގެ ޝިއާރައި އެއްގޮތަށް، އޮންލައިން ޕްލެޓްފޯމްތައް ބޭނުންކޮށްގެން އަންހެނުންނަށާއި ކުޑަކުދިންނަށް ޚާއްސަކޮށް ކުޑަ އަންހެން ކުދިންނަށް ކުރާ އަނިޔާ ދެނެގަނެ އެކަމާއި މެދު މައުލޫމާތު ދިނުމަށް ހަމަޖެހިފައިވާ ކަމަށް ރޮޒައިނާ ވިދާޅުވި އެވެ. ރާއްޖޭގައި މިފަދަ ކަންކަން ހުއްޓުވުމަށް އެކަށީގެންވާ ފިޔަވަޅުތައް އެޅުމަށް ކަމާއި ބެހޭ ފަރާތްތަކަށް ރޮޒައިނާ ވަނީ ގޮވާލާފައެވެ.
" ސަރުކާރާއި ރައްޔިތުން ގެ މަޖިލީހަށް އޮންލައިންކޮށް އަންހެނުންނަށް ކުރާ އަނިޔާ ހުއްޓުވުމަށް ޤާނޫނުތައް ހެދުމަށް ގޮވާލަން. ޤާނޫނުތައް ނެތުމުން އެފަދަ އަމަލުތައް ހުއްޓުވުމުގައި އަޅަންޖެހޭ ފިޔަވަޅުތައް ސާފު ނުވޭ. ރައްޔިތުންނަށް ހައްގުތައް އެނގޭނެ ޤާނޫނީ އޮނިގަނޑެއް ނެތް. " ރޮޒައިނާ ވިދާޅުވި އެވެ.
ޑިޖިޓަލް އަނިޔާ ގެ ތަފްސީލްތަކަށް ރޮޒައިނާ ވަނީ އަލިއަޅުވާލައްވާފަ އެވެ. އޭ ގެ ތެރޭގައި ސައިބަރ ބުލީ ކުރުމާއި، ބަރަހަނާ ފޮޓޯތައް އާއްމުކުރުމާއި، ދޮގު މައުލޫމާތު ފެތުރުމާއި، ހަޑި ހުތުރު އެއްޗެހި ގޮވުމު ގެ އިތުރުން ޓްރޮލިންގ ފަދަ ކަންކަން ދިމާވާކަން އޭނާ ފާހަގަކުރެއްވި އެވެ. ހަމައެހެންމެ ޑީޕް ފޭކް މެދުވެރިކޮށް ހިންގާ އަމަލުތަކާއި، މީހުންނަށް ފާރަލުމު ގެ ކަންކަން ކުރިމަތިވާ ކަމަށް ރޮޒައިނާ ވިދާޅުވި އެވެ.
އެ ފަދަ ކަންކަން ހައްލުކުރުމަށް އިދާރާތައް ހަރުދަނާކުރަން ޖެހޭ ކަމަށާއި، ޤާނޫނުތައް ވެސް އިތުރަށް ވަރުގަދަ ވާން ޖެހޭ ކަމަށް ރޮޒައިނާ ވިދާޅުވި އެވެ.
