މެމްބަރު މައުރޫފް ކުއްލި ސަރޖަރީ އެއް ކޮށްފި، އިތުރު ސަރޖަރީ އެއް ކުރަން ޖެހޭ

މަސްވެރިން ގެ އިހުތިޖާޖުން އަނިޔާވެރި ކަމާ އެކު ހައްޔަރުކޮށް ފުލުހުން ގެ ބަންދުގައި ބަހައްޓާފައި ހުރި ކެންދޫ ދާއިރާ ގެ މެންބަރު، މައުރޫފް ޒާކިރު ކުއްލި ސަރޖަރީ އެއް ކޮށްފި އެވެ.

އޭނާ ސަރޖަރީ އެއް ކުރީ ހޮނިހިރު ދުވަހު އައިޖީއެމްއެޗްގަ އެވެ. އޭނާ ގެ ޤާނޫނީ ވަކީލް މުހައްމަދު ނިޝާން އިބްރާހިމް ރާއްޖެ އެމްވީ އަށް ވިދާޅުވީ މައުރޫފްގެ އޮޕަރޭޝަން އައިޖީއެމްއެޗުން ކުރަން އޭނާ ގެ އާއިލާ އިން ވެސް، ޤާނޫނީ ވަކީލުން ވެސް އަދި އެމްޑީޕީ ޕީޖީ އިން ވެސް ބޭނުން ނުވާ ކަމަށެވެ. ނަމަވެސް މި ވަގުތު ސަރޖަރީ ކުރީ އެ ނޫން ގޮތަކަށް އެކަން ކުރެވެން ނެތުމުން ކަމަށް ނިޝާން ވަނީ ވިދާޅުވެފަ އެވެ. ނިޝާން ވަނީ މި އޮޕަރޭޝަނަކީ ލޭ ކްލޮޓް ހުރުމުން ކުރި ސަރޖަރީ އެއް ކަމަށް ވެސް ބުނެފަ އެވެ.

"ކުޑަ ސަރޖަރީ އެއް މި ކުރީ. ހައްޔަރު ކުރުމު ގެ ތެރޭގައި ސިޑިން ދެމުމުން ވެސް އަނިޔާވެފައި ވެސް އެބަ ހުރި. އަދި ފަހުން އިތުރު ސަރޖަރީ އެއް ކުރަން ޖެހޭނެ. މިހާރު މި ކުރީ ކުޑަ ސަރޖަރީ އެއް. މި ވަގުތު ކުރީ ހަމަޖެހިގެން ހުރުމަށް ކުރަން ޖެހޭ ކުޑަ ސަރޖަރީ އެއް މި ކުރީ. މިއީ ސްޓޭބިލައިޒް ކުރަން ކުރި ކަމެއް." ނިޝާން ވިދާޅުވި އެވެ.

މައުރޫފް ހައްޔަރު ކުރީ ބުރާސްފަތި ދުވަހު ކުރިއަށް ދިޔަ މަސްވެރިން ގެ އިހުތިޖާޖުން ކަނޑުމަތިންނެވެ. އޭގެ ފަހުން ހުކުރު ދުވަހު ކްރިމިނަލް ކޯޓުން އޭނާ ގެ ބަންދަށް 5 ދުވަސް ވަނީ ޖަހާފަ އެވެ.

އޭނާ ހައްޔަރު ކުރީ ވަރަށް އަނިޔާވެރިކޮށް ކަމަށް އެމްޑީޕީ ޕީޖީ ގްރޫޕުން ވެސް ބުނެ އެވެ. އަދި މެންބަރު މައުރޫފް ޒާކިރު ފުލުހުން ގެ ބެލުމު ގެ ދަށަށް ގެންގޮސްފައިވާ މައްސަލަ މަޖިލީހު ގެ އިމްތިޔާޒާއި ސުލޫކު ކޮމެޓީއިން ބަލައި ދިނުމަށް އެދި ސިޓީ އެއް ވެސް ހުށަހަޅާފައިވެ އެވެ.   މިއީ ކަނޑައެޅިގެން މަޖިލީހު ގެ މެންބަރުން ގެ ކަރާމާތައް އަރައިގަތުން ކަމަށް އެމްޑީޕީ ޕީޖީ ގްރޫޕުން ދެކެ އެވެ.

މެމްބަރު މައުރޫފް ހައްޔަރު ކުރި މައްސަލަ އައިޕީޔޫ އަށާއި އައިއެލްއޯ އަށް ވެސް އެމްޑީޕީ އިން ވަނީ ހުށަހަޅާފަ އެވެ.